الوجبة المفرحة.. مع عمر طاهر

كيف يذاكر عبد الله؟
سألت عبدالله (إنت بتذاكر كام ساعة في اليوم؟) فقال لي (أنا باقعد أذاكر طول الليل لحد ما أنام.. حوالي أربع ساعات).
أنا طبعاً ماصدقتش عبدالله لأنه دايما بينجح بالعافية وفي المدرسة دايما بيشتكوا منه علشان دايما فاتح بقه ومش فاهم حاجة.. طلبت من مامة عبد الله إنها تراقبه بيذاكر إزاي في الأربع ساعات، وتحكي لي هو بيعمل إيه بالضبط، الماما كانت مركزة معاه وحسبت كل حاجة بيعملها بالدقيقة ودي كانت النتيجة
- 30 دقيقة في توضيب المكتب والأوضة. - 20 دقيقة في فتح الشنطة وإخراج الكتب والأقلام. - 10 دقايق راحة. - 10 دقايق لمراجعة الهوم ورك المطلوب. - 15 دقيقة مكالمة تليفون مع خالد زميله في الفصل بيسأله هو الأستاذ طلب إيه في الهوم وورك بالضبط. - 15 دقيقة بيشتكي لماما من الأستاذ علشان مش بيعرف يشرح كويس وصوته عالي وبيزعق في الفصل. - 5 دقايق بيحاول يعرف هيخلص الهوم وورك إزاي. - 10 دقايق في البلكونة بيتفرج علي زفة عريس وعروسة في الشارع. - 10 دقايق بيتحايل علي ماما علشان تعمل لهم كيكة بالشيكولاته. - 10 دقايق بيحتفل مع أخته إن ماما وافقت تعمل لهم كيكة. - 10 دقايق قاعد علي المكتب وسرحان في اللمبة. - 10 دقايق بيكلم تيتة وجدو يسأل عليهم وبالمرة يشكي لتيتة من المدرس. - 5 دقايق باصص في الكتاب وبيلعب في مناخيره. - 5 دقايق بيقنع ماما إنه يلعب ماتش واحد بلاي ستيشن، وماما بتقول له استأذن من بابا. - 5 دقايق مكالمة مع بابا وبابا بيرفض. - 10 دقائق مكالمة مع تيتة بيشكي لها إن بابا مش راضي يخليه يلعب بلاي ستيشن، وتيتة بتقول له معلش بس بتطلب منه يقولها إيه البلاي ستيشن ده؟. - 10 دقايق باصص في الكتاب وفجأة اكتشف إنه مش لاقي الأستيكة وعايزها ضروري. - 10 دقايق بيضرب في أخته علشان فاكر إنها أكلت الأستيكة. - 10 دقايق خالد اتصل بيه يسأله هو الزمالك لو اتهزم من المنصورة هيبقي التاني ولا التالت؟ وعبدالله بيأكد له إن الفرق كبير بينه وبين بتروجيت وحتي لو اتغلب هيبقي التاني وهيلعب في دوري أبطال أفريقيا وبيتروجيت هيلعب في الكونفدرالية. - 10 دقايق عبدالله واقف في المطبخ مع ماما وهيه بتعمل الكيكة وبيشرح لها الفرق بين دوري أبطال أفريقيا والكونفدرالية. - 10دقايق عبدالله بيكتب سطر في الهوم وورك. - 10 دقايق في الحمام. - 5 دقايق عبدالله بيصلي العشا وبيشكر ربنا علي نعمة الكيك اللي ريحته مالية البيت. - 20دقيقة عبدالله وأخته بياكلوا في الكيكة مع الشاي باللبن قدام قناة السعودية الرياضية. - 10 دقايق عبدالله بيستقبل بابا اللي لسه راجع من الشغل وبيشكي له من المدرس ومن تيتة اللي مش عارفة البلاي ستيشن ومن ماما اللي مش عارفة إيه الكونفدرالية. - 5 دقايق ماما بتزعق لأن ميعاد نوم عبدالله جه وهو لسه ماخلصش الهوم وورك. - 15 دقيقة عبدالله بيخلص الهوم وورك بمساعدة ماما وبابا.
تخيل نفسك نملة
الطبيعي أن أشكر الله في كل ثانية، لكنني في هذة الثانية بالتحديد عايز أشكره لأنه خلقني في صورة إنسان، كل يوم يمر أتعرف فيه علي مخلوقات جديدة فأكتشف إن أحسن حاجة حصلت لي إني ظهرت في الحياة بشكل بني آدم... أصل تخيل معايا لو إنت مخلوق تاني ممكن تتعرض لإيه؟...

تخيل نفسك نحلة: مشكلة النحل إنك هتلاقي نفسك مشترك مع 8000 نحلة زيك في أم واحدة بس، والنحلة الأم (الملكة) عندها حاجة غريبة قوي (بعد ما تتجوز علي طول بتقتل جوزها)، يعني هتبقي مشارك العدد ده كله في أم واحدة وماعندكش أب.

تخيل نفسك نملة: هتلاقي السنة عندك مقسومة نصين (نص سجن ونص شغل)، الأولاني 6 شهور بتوع الشتا والتاني 6 شهور بتوع الصيف، في النص الأولاني هتفضل محبوس في بيت ضيق جدًا مع 12000 نملة علشان البرد، وفي النص التاني مش هتعمل حاجة غير إنك تشتغل وتفضل تلم كميات من الأكل علشان تخزنها وتعيش عليها إنت وأهلك في الفترة اللي انتوا محبوسين فيها في الشتا.

تخيل نفسك فراشة:
وإنت صغير مش هيكون فيه مشكلة، بس بعد شوية هتبتدي تلاقي جسمك مليان ألوان غريبة، صحيح هيه ألوان شكلها حلو..بس هل هتقدر تعيش حياتك ماشي وسط الناس وإنت شخص أصفر أو بنفسجي أو أحمر منقط بخطوط سوداء؟

تخيل نفسك دبانة:
مستحيل هتلاقي حد يحبك، أنت في نظر الجميع شخص سخيف، والناس كلها بتفكر طول الوقت إزاي تقضي عليك.

تخيل نفسك خفاش:
طيب قول لي إزاي هتقدر تستحمل إنك تقضي حياتك وإنت بتنام رجليك لفوق وراسك لتحت؟، سيبك من إن الناس هتعتبرك شخص مخيف.. إنت كمان مش هتقدر تعيش في النور لازم تفضل في الضلمة طول الوقت.. أنا شخصيا باخاف من الضلمة.

تخيل نفسك زرافة:
ممكن تكون لعيب كرة سلة هايل (بتقدر تحط الكرة في الباسكت ببقك)، لكن رقبتك الطويلة هتخلي قفاك مغري جدا وممكن تضرب عليه بسهولة في أي وقت، ولو فكرت تسوق عربية في أي يوم من الأيام لازم تسوق وإنت مطلع راسك من الشباك.

تخيل نفسك قطة:
بغض النظر عن إنك ممكن تقضي عمرك كله في الشارع بين صناديق القمامة، وبغض النظر عن إن 90% من الققط بتموت في حوادث عربيات، وبغض النظر عن إنك مطالب دايما من الناس إنك تاكل الفئران المقرفة... الأصعب إنك مش هتستحمل حد يسميك اسم سخيف يفضل لازق فيك طول حياتك زي (بكلاويظ) مثلاً؟

تخيل نفسك بغبغان:
هل هتقبل علي نفسك إنك تكون بني آدم ماعندوش أي شخصية وبيكرر الكلام اللي الناس بتقوله وعمره ما فكر يعتمد علي نفسه ويقول كلام جديد؟

تخيل نفسك سمكة:
طبعا حياة البحر جميلة، بس إيه اللي يضمن لي إني أول ما أكبر شوية ما الأقيش حد طلعني من البحر وحطني علي الشواية؟

تخيل نفسك فيل:
عمر ما حد هيسألك: نفسك تشتغل إيه لما تكبر؟ لأن قدامك 3 اختيارات مالهمش رابع، يا تشتغل موديل في جنينية الحيوانات يا تشتغل في السيرك، يا إما تبقي وسيلة مواصلات في الهند.

تخيل نفسك حصان:
حياتك كلها هتكون متوقفة علي العيلة بتاعتك، يعني لو إنت من عيلة مشهورة وأصيلة هتتدلع آخر دلع، لكن لو عيلتك أي كلام هتفضل طول عمرك تجر حناطير وعربيات كارو، الموضوع فيه مخاطرة لأن مافيش حد فينا بيختار عيلته.
تخيل نفسك ناموسة:
الناس دايما تتهم الناموس إنه بينقل الأمراض علشان بيمص دم الإنسان لما بيقرصه، ماحدش فكر إن الإنسان هو اللي خطر علي الناموس لأن معظم الناس بقي دمهم ملوث، هتعمل إيه لو إن الدم الملوث هو الأكل الوحيد المتاح قدامك؟

تخيل نفسك بقرة:
طبيعي جدا إن الأم ترضع البيبي الصغير كام شهر وخلاص علي كده، مشكلة البقرة إنها مطلوب منها ترضع الكبار طول عمرها، ماحدش بيقتل الأم أول ما تبطل رضاعة، لكن البقرة بتدبح أول ما يشطب من عندها اللبن... البقرة أكتر كائن عارف إن الدنيا مالهاش أمان.

تخيل نفسك عنكبوت:
طيب إزاي هتقدر تواجه المجتمع وإنت شخص ب 8 رجلين؟، صحيح أن ال 8 رجلين دي هتنفعك لو إنت لعيب كورة (هتقدر تشوط الكورة وتحط جون من أي زاوية)..بس هيبقي شكلك إيه مثلا وإنت داخل تشتري جزمة؟.

تخيل نفسك ديناصور:
إبقي قابلني لو لقيت حد يلعب معاك.

أنا سعيد جدًا لأني إنسان طبيعي، بعد ما فكرت في كل الكائنات الموجودة في الكوكب واكتشفت إني ماقدرش أكون غير بني آدم، الكائن الوحيد اللي ماتخيلتش نفسي فيه هو العفريت لأني ما اعرفش شكله، بس أصلاً أصلاً أنا فاكر إني سمعتهم بيقولوا مرة إنه ما عفريت إلا بني آدم.
10جمل مستحيل تسمعهم من الماما
1- لو سمعت الكلام وبقيت كويس لحد عيد ميلادك هاشتريلك موتوسيكل.
2- ماتقوم يا حبيبي تتفرج علي «مساء الأنوار».. مش عايز تعرف كابتن مدحت شنبي هيقول إيه النهاردة؟.
3- قاعد بعيد ليه كده عن التليفزيون؟.. قرب منه علشان تشوف كويس.
4- ضوافرك شكلها حلو وهيه طويلة.. بلاش نقصها الأسبوع ده.
5- ماتوضبش أوضتك.. أنا بحبها متلخبطة ومقلوبة علي بعضها.
6- بابا عمره ما طلع الأول في المدرسة وكان بيزوغ من المدرسة وهو قدك.
7- ممكن لو سمحت تعلي صوت المزيكا علي الآخر؟.. أصلها عاجباني قوي.
8- هتنام بدري ليه؟ خليك سهران معانا شوية.
9- لازم تروح تتفرج علي ماتش المنتخب اللي جاي في الاستاد.
10- ممكن تعمل لي آد علي البروفايل بتاعك في الفيس بوك؟
عادل إمام
«كنت بالعب استغماية في الفسحة، دورت علي مكان أستخبي فيه، فدخلت قاعة كانت ساكتة خالص وفاضية، بس في آخر ركن فيها كان فيه طلبة قاعدة في اجتماع، سألتهم فقالوا لي ده اجتماع فريق التمثيل، سألوني: إنت هنا ليه؟، اتكسفت أقول لهم باستخبي من أصحابي، قلت لهم: أنا هنا علشان أشترك في الفريق، كان عندي وقتها 11 سنة، ومن ساعتها وأنا في فريق التمثيل لحد النهاردة»