مازلنا نندهش كلما رأينا موهبة صغيرة في عالم التمثيل..ونندهش أكثر عندما تختفي هذه الموهبة بعد سطوعها بأعوام قليلة!! يأتي ذلك في نفس الوقت الذي تهتم فيه السينما العالمية بهذه المواهب الصغيرة ورصد ملايين الدولارات لإنتاج أفلام لهم وتبنيهم حتي يصيروا نجوما كبارا... السينما المصرية أيضا في عصرها الذهبي قدمت أفلاما كبيرة لنجوم صغار مثل فيروز.. أما الأن فهي تكتفي بإشراك هؤلاء النجوم الصغار في عدة مشاهد بالفيلم سعيا لجذب جمهور كبير من الأطفال وأسرهم إلي قاعات العرض! أخر هؤلاء النجمات الصاعدات هي ليلي زاهر التي تألقت مؤخرا في فيلم محترم إلا ربعإلتقيناها ودار معها هذا الحوار *مبروك ياليلي.. الفيلم نجح قوي..هل شعرت بإنك أصبحت مشهورة؟ ** أنا حسيت إن الناس بتعرفني بعد فيلم كابتن هيما وعمر وسلمي مع تامر حسني..ساعتها ذهبت الي المدرسة ووجدت زميلاتي وزملائي كلهم بيسألوني: إنت اللي كنت بتمثلي في الفيلم؟ أقول لهم أيوه ويطلبون يتصوروا معايا.. لكن طبعا دلوقتي الناس بقت بتعرفني أكثر * مين اللي اختارك في فيلم محترم إلا ربع؟ ** محمد رجب هو اللي اختارني..عشان شافني مع تامرحسني وبعد كده شافني مع بابا أحمد زاهر وقعدنا نتكلم ونهزر فقال لبابا أنا عاوز ليلي تمثل معايا في فيلمي الجديد..وبعد كده اتعرفنا علي بعض أكثر لغاية ما أخدنا علي بعض وبدأنا الفيلم * في الفيلم بتغني وترقصي وتمثلي..من علمك كل ده؟ ** أنا علمت نفسي..باقعد اتفرج علي التليفزيون وأشوفهم بيعملوا إيه واعمل زيهم!! يعني مثلا شفت نانسي عجرم بتغني شخبط شخابيط اتعلمت منها الغنا *طيب والتمثيل ؟ نفس الحكاية..باشوف اللي حولي بيمثلوا إزاي واتعلم منهم..بس بابا أحمد زاهر بيقعد معايا في البيت يذاكر لي النص ويعلمني *اشتغلتي مع ناس كتير..اتعلمت منهم إيه؟ اتعلمت من تامر حسني إزاي يبقي دمي خفيف وإزاي أقول الكلام بالراحة مش بسرعة..واتعلمت من شريف منير إني أبص في عين الممثل إللي قدامي, وما انظر للكاميرا واتعلمت من محمد رجب اتكلم بصوت عال واتعلمت من نسرين الإمام إزاي أعيط!! * ليه؟! إنت بتعيطي بجد في التمثيل واللا دي بتبقي قطرة؟ ** لأ طبعا باعيط بجد! مامي قالت لي لما تعوزي تعيطي تخيلي إن حد بياخدك مني بالعافية وإنت هاتعيطي..وأنا كان عندي مشهد عياط في برة الدنيا ونسرين إمام كان عندها مشهد عياط قعدت اتفرج عليها وركزت معاها وشفتها بتعيط ازاي وبعدين عملت زيها * إيه بقي أصعب مشهد مثلتيه في حياتك؟ ** مشهدان..كانا في مسلسل برة الدنيا الأول في مشهد الحادثة لمارفعوني بسلاسل حديد وزقوني ورموني..والمشهد الثاني لما حاولوا يخطفوني وقعدت اصرخ جامد لغاية ماصوتي راح واوقفوا التصوير وشربت حاجات سخنة لغاية صوتي مارجع تاني *وماهو المشهد إلي خفت تصوريه؟ ولامشهد..أنا أصلا مش بخاف أبدا..بابا وماما دايما يقولا لي لازم تبقي شجاعة وقوية..حتي لما النور ينقطع مش بخاف..الحاجة الوحيدة اللي بخاف منها أني أتخطف!! عشان كده مش بانزل الشارع لوحدي أبدا *إنت مثلت لوحدك..وكمان مثلت مع أختك ملك...إيه الأحلي؟ طبعا لما أمثل مع ملك أختي عشان هي بتساعدني وكمان هي أختي فالتمثيل معاها بيبقي أسهل بكتير عشان أنا عرفاها كويس.. وكمان نفسي أمثل مع أحمد زاهر عشان الحاجات اللي مثلناها سوا مكانش فيه مشاهد بتجمعنا مع بعض * مين تاني من الممثلين نفسك تمثلي معاه؟ ** نفسي أمثل مع أحمد مكي عشان بيضحكني قوي..ونفسي أمثل مع مني زكي عشان باحبها قوي * إنت مثلت أفلاما ومسلسلات..حبيتي أيه أكثر؟ ** أكثر حاجة حبتها مسلسل برة الدنيا عشان مثلت فيه كثير قوي وهو اللي عودني علي الكاميرا واتعلمت فيه حاجات كتير * إزاي بتوفقي بين التمثيل ودراستك؟ أنا في سنة تانية ابتدائي وشاطرة في المدرسة عشان باصحي الساعة خمسة الصبح وأفضل أذاكر لغاية معاد المدرسة..ولما أرجع من المدرسة أنام شوية وأروح التصوير * أكيد بتتعبي في التصوير؟ ** مفيش مشكلة عشان لما باتعب باقول للمخرج إني تعبت فيقول فركش عشان ليلي تعبت!! المخرجون كلهم بيحبوني وبيخلوا بالهم مني والممثلون بيحبوا يمثلوا معايا عشان بيروحوا بدري عشان خاطري!! *إيه الجديد دلوقتي عندك؟ ** دلوقتي باصور فيلم اسمه يانا..ياهو بطولة نضال الشافعي وهنا شيحة واخراج تامر بسيوني..وعاملة فيه سبع شخصيات مختلفة..واحدة منهم غجرية * نفسك تبقي زي مين لما تكبري؟ ميريام فارس!
