إيمان أيوب.. وربطات كاجوال للوش الصغير

أهلاً بكل بنات "قمر 14" النهارده هاكون معاكم..
وهيتجدد لقاؤنا مرة تانية مع "مروة البغدادي"..
واللي هتعمل لنا ربطات حجاب كاجوال مناسبة للوش الصغير، وتنفع للكلية أو لو عندك خروجة بعد الظهر أو وإنتِ رايحة النادي..
يلّا نشوف مع بعض..
طرحة بنَقشِة التايجر
هنبتدي بأوّل ربطة واللي هنشوفها في الفيديو، وهي طرحة فيها نقشة التايجر، ودايماً أنا بانصح البنات اللي بيكون وشهم صغير إنهم يلبسوا الطرح اللي فيها كرمشة؛ لأنها بتديهم امتلاء في الوش.
والتصميم ده ممكن يتلبس من أدام على طول، وبعد كده بتلفي الطرحة حوالين الرأس مرة واحدة، وبكده الطرحة تكون اتلفت من غير مجهود ،وممكن إننا نربط الطرحة على ورا، ونلف الذيل على أعلى الرأس، وبعد كده نلفها على الشعر من ورا.. واللفة دي بانصح بها البنات اللي وشها صغير؛ لأنه بيدي كثافة للوش.
طرحة بالشكل البدوي
دلوقتي هنعمل ربطة بطرحة لونها زهري، وطبعاً كلنا ملاحظين إن اللون الزهري طالع موضة من فترة ولسه مستمر معانا، وميزة اللون ده إنه بيليق على البشرة السمرة أو الفاتحة.
وزي ما هنشوف في الفيديو إن الطرحة دي مطعّمة بالمعدن، وبالتالي ممكن نلفها على الرقبة بحيث يدينا شكل كإننا لابسين إكسسوار على الرقبة، وخصوصاً إن البنات المحجبات ما بيقدروش يلبسوا إكسسوار على الرقبة لأنه مش بيبان.

إضغط لمشاهدة الفيديو:
طرحة أورانج × زيتي
الطرحة دي دخلنا فيها لونين مع بعض، وهما الأورانج مع الزيتي، والطرحة دي ممكن نعمل بها أشكال كتيرة في الربطات.
طرحة بيج مع جلد النمر
الموديل ده حلو أوي وكمان بيليق مع كل الأعمار، وخصوصاً إن اللون البيج موضته مش بتروح أبداً ومحايد جداً، وبيمشي مع معظم الألوان، واللون ده من الألوان الثابتة زي الأسود والبني والأبيض؛ يعني لازم يكونوا موجودين في دولابك، وممكن ندخل معاهم ألوان تانية.
والطرحة اللي معانا دي ممكن نربطها بأكثر من طريقة:
- ممكن نلبسها من أدام وبعدين نلفها على شكل كروس؛ علشان الشغل اللي في الجنب ده يبان، وبعد كده نلف ذيل الطرحة على الشعر من ورا، ودي هتبقى مناسبة جدًّا للوش الصغير اللي أنا عايزة أعمله امتلاء أو أتخنه شوية.
- وممكن إننا نجيب الذيل على ورا ونلفه حوالين الرقبة، وده هيدينا شكل جديد خالص.
طرحة بيضاء بالشكل الفرعوني
موديل الطرحة دي جديد جدًّا وهي "الكراش" أو اللي بتكون خامتها مكرمشة شوية ولها طابع فرعوني، وعلى الرغم من إن الطرحة لونها أبيض فإنها لايقة على البشرة الخمرية؛ وده بسبب إننا مدخلين معاها إكسسوارات معدنية ملونة.
والطرحة دي كمان ممكن نلفها بأكثر من طريقة:
- ممكن إننا نربطها عادي ونربط الشريط الساتان اللي فيها على شكل فيونكة من أدام.
- وفيه طريقة تانية ممكن نعملها بنفس الطرحة، وهي إننا نلفها من ورا بطريقة الإسبانش، ونربط الشريط الساتان على الجنب وندّخل باقي الطرحة تحت الشعر بحيث تدينا شكل البونيه والطريقة دي سهلة أوي.
- ممكن إننا نربط الطرحة على ورا وبعدين نجيب الشريطة ونربطها فيونكة على الشعر.
وبكده نبقى عملنا أكثر من لفة بنفس الطرحة بطريقة عملية وسريعة جداً، وخصوصاً للبنات اللي بيتحجبوا جديد ومش بيعرفوا يجددوا في شكل الربطات بتاعتهم..
ولازم كل البنات تعرف إن أهم حاجة بتظهر أناقة البنت المحجبة هي اختيارها للطرحة والحذاء والشنطة، وطبعاً الطرحة أكثر حاجة بتبرز جمالها؛ لأنها بتقدر تغيّر فيها زي ما هي عايزة.

إضغط لمشاهدة الفيديو:
طرحة فوشيا مطعمة بالجينز
موديل الطرحة دي بيبقى لطيف أوي بالذات في الجامعة مع البنطلونات الجينز وعلى فكرة الفوشيا موضة أوي في الصيف، وممكن إننا نلبسه في الشتاء علشان نكسر به الألوان المقفولة اللي بتبقى موجودة في الشتاء.
طرحة باللون الجعراني
اللون الجعراني ده هو اللون اللي بين درجة التركواز والأخضر، واللون ده موضة أوي في الشتاء والطرحة دي خامتها قطن 100% ما فيهاش أي بوليستر علشان يبقى لها درجة ثبات، وأنا بانصح كل اللي راسهم صغيرة إنهم يلبسوا الخامة دي لأنها بتديها امتلاء، وكمان القطن مش بيضر البشرة ولا الشعر زي باقي الخامات الصناعية اللي بيصنع منها الطرح الأيام دي.
طرحة سوداء مطعّمة بالمعدن
الطرحة دي تفصيلتها مختلفة وبتتلبس بسهولة جداً، وكمان تقدري تغيّري في طريقة ربطتها على ذوقك، والموديل ده ممكن يناسب أكثر خروجات بعد الظهر، وبنلفها إسبانش عن طريق إننا نلفها على ورا ونمسك الطرف اللي فيه التطريز ونحطه على الكتف، وباقي الطرحة نلمها في الطرحة من ورا، وممكن نلفها كمان بطرق تانية زي ما هنشوف في الفيديو.

إضغط لمشاهدة الفيديو:

ولغاية هنا تكون خلصت حلقتنا النهارده..
ونتمنى إنها تكون عجبتكم وتكونوا استفدتم منها..
واستنونا في حلقات تانية كتيييير.. ومفاجآت أكتر..
إلى اللقاء،،،،