أحدث صيحات الموضة لشتاء وخريف 2010.. مع إيمان أيوب

أنا سعيدة جداً إني هاكون معاكم في موقع "بص وطل "وتحديداً في "قمر 14"، وأوعدكم إني في كل مرة حستضيف خبير أو خبيرة تجميل؛ علشان نتعرّف معاه ب"الصوت والصورة" على كل ما هو جديد في عالم الموضة والجمال.
والنهارده أنا معاكم في حلقة جديدة هنتعرّف فيها مع بعض على أحدث صيحات الموضة لشتاء وخريف 2010..


موضة الثمانينيات رجعت تاني
أكتر حاجة هنلاحظها في خطوط الموضة السنة دي إن موديلات فترة الثمانينيات رجعت تاني في أكثر من موديل؛ زي: التونيكات اللي لها وسط أو البنطلونات الواسعة، والسالوبت، وموديل البونشو أو الشال والموديل ده بيناسب جميع الأعمار، وكمان عملي جداً وممكن أي بنت تلبسه وهي رايحة الجامعة أو الشغل.

وزي ما كلنا ملاحظين إن موضة البنطلون الضيق "الليجينج" مع البوت منتشرة جداً السنة دي حتى بالنسبة لملابس المحجبات، وممكن يتلبس عليه تونيكات أو جواكت طويلة.

إضغط لمشاهدة الفيديو:

البساطة في أزياء السواريه
بالنسبة لأزياء السواريهات فهي تتميز بالبساطة والرقة مع التطعيم ببعض الإكسسوارات والإستراس، ولو عندك سهرة أو مناسبة فإنتِ مش لازم تكوني متكلفة أوي، وممكن تكتفي بإنك تلبسي بلوزة سواريه على بنطلون جينز أو على جوب، وطبعاً بتختاري اللي يناسب طولك وشكل جسمك.

إضغط لمشاهدة الفيديو:

الألوان الجريئة لشتاء 2010
بالنسبة لموضة الألوان السنة دي فهنلاقي إن أكتر حاجة مميزة هي الجرأة في الألوان والتنوّع، ومن أكثر الألوان الموضة: الرمادي والموف والأزرق الزهري والأخضر.. طبعاً بالإضافة للون الأسود وهو ملك الألوان دايماً واللي بيناسب كل الأجسام.

إضغط لمشاهدة الفيديو:

موضة الأحذية والشنط
السنة دي موضة الأحذية رجعت تاني فيها "مقدمة الحذاء" بالشكل الدائري مش الطويل أو المدبب، وكمان هنلاقي موديلات من الأحذية اللي بيكون مقدمتها فيها نسبة ارتفاع عن الأرض ودي بتدي شياكة وأناقة.
أما بالنسبة للأحذية اللي بتكون بأربطة على الرجل فدي موضتها مش بتروح وفيه بنات كتير بتحبها.. أما البوتات فهنلاقي إنها منتشرة بصورة كبيرة السنة دي وهنشوف موديلات كتير بتناسب فترة الصبح، وكمان فيه موديلات بتناسبك لو عندك سهرة أو مناسبة بالليل.
ولازم يكون عندنا الجرأة إننا نلبس ألوان مختلفة من الأحذية والشنط وما نتقيدش بلون معين زي الأسود أو البني.
والسنة دي هنلاقي إن اللون الرمادي موضة جداً، وكمان اللون المسطردة لون حلو جداً، وممكن يتناسب مع أي لبس عندنا.

إضغط لمشاهدة الفيديو:

وفي النهاية أحب أقول لكل البنات إن الرقة والبساطة هي أحسن حاجة...
وبلاش تحاولي تكوني متكلّفة في لبسك وماكياجك...
يعني حاولي تعملي ميك أب بسيط وتظهري عينيكِ بشكل حلو
وتختاري لبس رقيق يعبر عن شخصيتك...
ويا ريت تتابعينا في الحلقات الجاية...
علشان هنكمّل مع بعض كلامنا عن
موضة شتاء 2010...
إلى اللقاء،،،