حكايتى مع الغذاء والماء والهواء فى مصر المحروسة من العين

ديه حكاياتى البسيطة المعقدة فى بلدنا اللى تحولت من ام الدنيا للعجوزه ام منقار على ايد النظام اللى شبه الساحرة الشريرة ام مقشه
الحكايه الاولى مع كوباية ميه من الحنفيه
فتحت الحنفية ومليت الكوباية وفضلت امللى عينيا برؤياها لقيتها فيها فوران مديلها لون ابيض مع فقاقيع صغيره قلت مش مهم ده كلور اهو تعقيم شميت الميه لقيت ماشاء الله الله واكبر الميه عندنا طلعلها رائحة وبدأت اشرب حسيت بطعم دواء قلت حكومتنا خايفة علينا وحطتلنا تطعيم فى الميه خايفين على صحتنا يشكروا المهم مليت كوباية تانيه بالفلتر الكربونى الهمام لقيت اللون راح والرائحة خفت شوية لكن ماشاء الله طعم الدواء فضل ثابت شكله مستورد وبعد ماشربت بالسم الهارى اللى فيه قلت يااه عمار يا مصر الميه فى الدنيا كلها والكتاب المدرسى من غير لون ولا طعم ولا رائحة لكن حكومتنا الله يكرمها بجهنم طورت من خصائصها كتير وبقت بدل
H2O بقت TSC
وده اختصار ل لكلمات
taste
smile
color
الحكاية التانيه مع عود البقدونس
طلعت من التلاجة بقدونس وفضلت ابصله ابصله ومعجبه اوى بيه اصلى لقيت عود البقدونس بفضل سياسات الحكومة الرشيده قرب لطول عود القصب وافتكرت بقدونس زمان اللى كان شكله عود بقدونس طبيعى على اده فسل فى الحجم و فكرت فى طوله الفارع لقيت ان مية المجارى
بترعرع الزرع اوى و زعلت اننا مش فاهمين مصلحتنا وان مياه
نهر النيل مش اد كده فى الزراعة والحكومة لما توصلت للنتيجة ديه لقت ان
موضوع النيل مش لازم ياخد اكتر من حجم عود بقدونس زمان الفسل
الحكاية التالته انا والهواء والناموس
بما ان طبقة الاوزون اتخرمت والجو بقى غريب الاطوار فأى حد ما بيصدق يلاقى شوية هواء يشجعوه يشمهم فى بلكونه فى غيط ذرة فى شارع فى حته صحراء ان كانت او بستان
انا بقى خرجت اشم الهواء المحمل باول اكسيد الكربون فى بلكونة بيتنا وبما انى اتعودت على التلوث فمركزتش كتير واستمتعت وتناسيت فكرة التلوث لكن فى مصر لازم حاجة تنكد علينا حتى لو ملناش مزاج عندى انا كانت الناموس لقيت جحافل ناموس متوحش عماله تقرص فيا كرهتنى فى الهواء وحببتنى فى الحيطان قلت عيب كده الناموس ينتصر عليا ابدا انا ايجابيه اما اكلم الحى وقد كان كلمت الحى لقيت واحد قبل ما اقول الو بيقولى يا فتاح يا عليم هو اصله يوم باين من اوله قلتله دا انا لسه منطقتش هو حضرتك بتكلمنى قالى ايوه اصل الناس مزهقانا المهم قلتله مشكلتى قالى ديه مش تبعنا كلمى وزارة الصحة كلمت وزارة الصحة قعدوا لطعنى كتير على التليفون وبعدين واحده كلمتنى بمنتهى السخافة وقلتلى نعملك ايه يعنى قلتلها ده شغلكوا قامت محولانى على رقم تانى كلمتهم رد على دكتور قالى كلمى مكتب الصحة كلمته تخيلو لما اتكلمت الموظف ولا الدكتور المحترم قالى ايه قالى احنا بنرش الناموس يا انسه بس انتى اللى يا نايمه يا خارجه قلتله نعم قالى ايوه احنا بنرش 6 صباحا بتبقى نايمه و8 مساءا بتبقى خارجه ابقى ركزى قلتله محصلش انا قعده فى البلكونه زى ما اسد قصر النيل قاعد جنب الكوبرى قالى طيب هنبقى نرش شفتوا الهنا الاحنا فيه نبقى ايجابين يوزعونا سلبين يشتكوا مننا لنا الله
الحكايه الرابعه ووزارة البيئه والاكاديميه العربية للنقل البحرى والتكنولوجيا بالقاهرة الساحرة
انا ساكنه فى شارع الاكاديميه البحريه قدامى المهم الشارع اترصف الاكاديميه دمرته وبنت اعلى من المسموح ولا حد كلمها ما علينا الشارع مشوه والاهالى بيحاولوا يحسنوا شكله وبيزرعوا اشجار على حسابهم بدلا من الحى النشيط والاكاديميه سايبه الرصيف من غير شجر متصحر ونشاز فى الشارع كلمتهم قالولى ما احنا زارعين و بعدين احنا مالنا ما الحى يزرع قلتلهم كم العربيات اللى كل يوم بيجى الاكاديميه ملوث المنطقة ازرعوا شجرتين علشان تخففوا التلوث مش كفايه زاحمين الدنيا ومعندكوش باركنج والناس قرفانا وبتركن مكان السكان قالولى حاضر واتوزعت كالعاده قمت بقى متصله بوزارة البيئه ما انا فاضية ردوا عليا قلتلهم الشارع صغير والعربيات ولا الملاهى لازم تشوفوا حل تزرعوا شجر تلزموا الاكاديميه بده اتصرفوا قالولى ملناش دعوه احنا بنتحرك بس لما تحصل كارثة بيئيه تخيلوا بيستنوا الكارثة تحصل وبعدين يتحركوا قلت عمار يا مصر يا ام العجايب قلتلهم ما احنا اتخنقنا من السحابة السوده ما تحركتوش طبعا الراجل قالى بنعمل اللى علينا وقفل
والنهاردة فكرت فى كل ده لقيت ان المواطن المصرى ابسط حقوفه فى الحصول على كوب ميه ميجبش فشل كلوى وعود بقدونس ميجبش الكبد وهواء ميجبش سرطان مش من حقه ماء وغذاء وهواء حق الانسان واللى ربنا سبحانه وتعالى وفره فى الدنيا بأفضل شكل وتكوين فى مصر افسدناه ودمرنا معاه صحة المواطن ونفسيته وكرامته ولا حد سامع ولا حد سائل خلاص احنا بشر منزوعة الحقوق وعلشان الحق يرجع لازم احنا كمان نرجع من حالة التغييب المنظمة اللى اتعملتلنا من سنين طويلة ومنسكتش سكتنا لحد ما بقت المصايب بالكوم على دماغنا ويا نصحى يا بالسلامه والقلب استحاله يدعيلنا و يبقى علينا وعلى مصر السلام