إلي والدي بابا .. بابا .. أوااااه إنه لا يسمعني !!

أحلام مصرية

عفوا عزيزي القارئ، إنها ذكري ميلاده و كنت أتعمد الهروب منها منذ رحيله بينما أراه اليوم يحاصرني .. يعنفني أحيانا .. ينهرني خوفاً من الانزلاق .. فقط ينظر لي ولا يتركني إلا هادئة النفس مطمئنة مبتعدة تماماً عما يخشاه .. جلست بالطبع أتذكره ولحظات حديث طويلة كلما أرادني هاتفني أتيته مسرعة
واليوم له في نفسي حديث ربما فيه مايطمئنه رغماً عن كونه لا يسمعني !!بابا .. أعدك أولاً أني لن أفعل ما يغضبك .. وعد .. أقرأ لك القرآن و أسمع أقبل الليل لسيدة الغناء العربي أم كلثوم ، كل شئ هنا في عالمنا كما تركته تماماً " بحطة إيدك يا باشا " هكذا كنت أداعبك .. لم تتغير المواقف و لم تتغير الأسماء .. لم يأتي الزمان بجديد سوي أشياء طفيفة لا تستحق أن تعكر بها صفو إقامتك في الجنة ، بينما من قبيل إخبارك الشوارع إزدادت بشر ، كل الناس تخرج في لحظة و تعود في لحظة و مصر هي هي بحطة إيدك يا باشا ، الطرق في غاية التكسير و الدشدشة و الناس معها لحظة تحت و أخري فووووق حتي خروجهم عن وعيهم لدرجة الخناق والتهوُّر و دايماً رافعين جانبا واحدا من شفاههم لبعض ، بيستهبلوا .. طب يعملوا إيه بهوات الحكومة ؟ يمهدوا الشوارع ؟! إيه يعني لما الأسعار بقت ناااااار و رواتب الناس ملاليم ؟! ، كل حاجة يلموا بعض ويحتجوا ؟! الناس برة حتسمع بينا ، ولا تقلق مصر هي هي بحطة إيدك يا باشا ، كنت عاوزة أخبي عليك بس مش باعرف : إنتخابات السنة دي ناااار زي الأسعار وقت الاستعمار و أكتر ، شراء العضوية بيقولوا وصل لثلاثين مليون جنيه يدفعها العضو و يردهم من الناس بطريقته ، و عضوة تانية ظبطوا إخواتها في عملية تهريب مخدرات قبل مجمع العضوات للكوتة بشهرين لكن الحق يقال الكتكوتة بتتحوّل أسد ووافقوا عليها ! بابا .. مالك يا حبيبي ؟! إطمن .. مصر هي هي بحطة إيدك يا باشا .. أما الأرامل والمطلقات في مصر حدث ولا حرج يا باشا ، رجالة مصر رجالة رجالة مش أي كلام يعني لا طمع و لا ضغوط و لا مساومات ، والحكومة يا حراااام بتتفرج لا حول لها و لا قوة و أزمة الإسكان بحطة إيدك برضو ، يبدو إني ظلمت دكتور يوسف بطرس غالي ، بصراحة نزلت صديقتي تشوف شقة .. الشقق و الفلل أكوام أكوام لكن مغلقة و المفتوح فيها ناااااار و ما فيش رواتب أصلاً .. بتضحك؟! الدنيا عندك طراوة أنا عارفة ! المشكلة في سوء التوزيع أكيد ، أما القضاء فالحمد لله وبعد طول انتظار، صبرك كان بفايدة .. قضايا تعويض أسرتك بعد التأميم وصلت مكتب الخبير من 7سنين و هانت يا حبيبي .. لأ بعدين أحكيلك .. يبدو عليك مش مبسوط ! مش عارفة ليه مع إن مصر هي هي بحطة إيدك يا باشا . مالك يا حبيبي ؟! مش عندك سيد مكاوي و عادل أدهم والسادات و استيفان روستي وزينات صدقي و الريحاني انبسط يا حبيبي مصر هي هي بحطة إيدك يا باشا . بابا .. بابا.. الله يسامحني لو كنت ضايقتك..
حنان خواسك