"الفلس والطين" قصيدة عامية ل"محمد زقزوق

راح احكى معاكوا اليوم عن شو حال الزلمة الصنم
هذا الزلماتى مفترش الحصير ... صديق الغنم
والحكيوة على لسانة السم فى القصيدة الغم
الفلس والطين .... واسمى فى القصيدة امين
الفلس فى الناس ..
لا حبايب ولا خلان
قاعد محتاس ..
مستنى كلام اعلان
عن تجديد فى مداس ...
ينداس يطلع فرمان
تلقانى من قومتى خلاص
واقف محنىّ الراس
اضحكهم لجل يسيبونى
ويدونى لقعدتى احسان
ويسألونى ..
اسمك ايه ؟
ارد بسرعة .. اسمى امين
ويقولوا لاااا ...
انت مداس ينداس بيه فى الطين
ياحثالة الناس عمرك ماهتبقى امين
أطاطى الراس واردد .. آمين
*******************
الفلس صاب كمان اليد
فى عمرها حين تتمد
ابويا مات ... وأمنىّ
اموت وتبقى الحصيرة
امى دايما تأمنى
هى السند والسيرة
لو مت ياولدى
لفنى جته ف حصيرة
وعشت العمر وحدى
مقاطع الناس والجيرة
ويوم مقربوا منى
حبيت اصون السيرة
رفعت يدى اباعدهم
لقيت اليد قصيرة
*********
الفلس موش فى الفلوس
ولاحتى كمان فى الرؤوس
الفلس لما صاب .. هد النفوس
خلى المداس ع الرقاب ...يدوس
وف قعدتى على الحصيرة
اركع على القدم لجل ابوس
ادوق الذل واللسان حاله
يهون الذل واوحاله
مادام اتكتب ع الحر فحلاله .. متحرم
وعلى ناسه مايصون
وكِيف يصون الناس متجرم
وكِيف تتطلبوا منى اكون
حر متحرر فى احوالى متكلم
دا الحر فى عرف المداس مجنون
فأنا بالذل والمهانة
حر متحرر .. امين مأمون
بس اوعاكوا حد يتكلم ويقول للمداس
على الحصيرة هنا ... مجنون
****
الفلس صاب كمان الروح
معايا فى اى مكان بيروح
مخنوق الصوت بقى مبحوح
وتنفك الدموع ع اللسان ... مجروح
طب ايدى واقطعها بالسكين
وروحى .. ايه يخلعها م الطين
ويسألونى
اسمك ايه ؟؟
ارد .. اسمى امين
بستنجد برب الحسن والحسين
وربك يابطل فى حطين
ياواحد يااحد ..
ماتخدنى هناك عندك
ياتبدلنى انا عبدك
بالفلس ... طين
***
الطين طينك ياسيدى
والارض دى ارضك
حَرتُه انا بأيدى
لجل يصون عرضك
وعرضى انا مطلوق
واقف ورجلى لفوق
امتى م اللى فيا.. تدوق
واهو كله من ارضك
***
النهش عدى السكات
والقسوة ربت وحوش
وابويا اللى مات
نفضنى فى الجيوش
علم اخويا البعيد
اصرخ .. اخ .. يسندنى
تصحى صلاة العيد
والفاس يساندنى
حدوتك يا امى شرف
شايله وتاعبنى
خوفك اكلنى وغرف
ليه يورثه ابنى
وجبت صلاة الحق ... والموت
ع كل هم وحيرة
فرعون ياصاحب الجبروت
ولّعنا فى الحصيرة
وخليها تضوى يازمن
مصرى انا من زمن
بس المحن جابت محن
عدت ... وفضها سيرة
حكم الخسيس وكفى
أمين .. قام واكتفى
وحياة مقامك ياكفن
طينى ليرجع فى الدفا
***
وتوت توت
قطري ماهو واقف
توت توت
ماشى موش خايف
توت توت
حلمك يا أمين
توت توت
منحوت ف الطين
توت توت
والحق مصير
توت توت
هنا م التحرير
توت توت
ياميدان جبار
توت توت
قمت باعصار
توت توت
هنصلى العيد
توت توت
عيدك ياشهيد .... عيدك ياشهيد