أنا ماشي ما انيش غالب.. ولا مغلوب أنا غلبان بلسان عربي البيان ومن لسان العرب عجبَ أنا غلبان من غُلب ولا من غلبَ بلاش غلبة أنا مش هاثير في صمتكم جلبة يا بلاد كما الحلبة و أنا محلوب لو حدفوك يا وطن بالطوب فالوضع مش مقلوب ما تندهونيش.. اندهوا الناس العزاز اللي بيوتهم من إزاز واللي بيوتهم طين أما أنا هتندهوني منين لا أنا طالب ولا مطلوب ولا ليا فيها حتي قالب طوب فطوبي للوطن ما هوش سليم الفطن واللي يعيش في العطن معطوب اوعاك تقولي هروب أنا مغصوب ما انيش غالب.. ولا مغلوب ولو كنتم تجهلوا بيا فلتعلموني الآن أنا.. أنا أفصح ما فيكوا بيان و البعض منكم لم يجهلوني وإن كان الأولي بهم كتمان فلا تكتموا السر عني فإني ما انيش غضبان ولا قلقان أنا بايع ما عدتش يا وطن تنعاش فيك الفتي إن عاش كأنه ما عاش وبكره في الخصخصة هيطلعوكي معاش وأنا أجمل ما فيكي فكرك لما تبعيني هاشتريكي ما اشتريش اللي يبعني لو أشتريه بلاش فما بالك باللي يبعني بلاش فبلاش نتحاجي بالفكرة ملكيش عندي جمال ذكر ولا ذكري ولو فاكرة ملكيش عندي ولا حاجة .. وأنا فاكر أنا ماشي صفر المشاعر واليدين ماشي ومش مهم لفين بس المهم أرحل يا بلاد توصي الأم فيكي الولد أرحل وما تعدشي امشي وأنا ماشي ما انيش غالب ولا مغلوب أنا غلبان **** هاسيبك بلدي ومغادر هاسيب الفقر وأغادر ولو في موج غشيم هادر موج البحر يصير آمن آمن من وطن غادر من وطن مسلوب مسلوب ومتحدد بعرض الجرح يتمدد إيه اللي يفرق حد فيك عن حد قولوا لي فأحدد أو أخرج بره هذا الحد ما انيش فتي جامح ولا فيما تكنزون طامح بس الجواب بيبان من أول العنوان والبلاد.. ألوان أحمر.. حمار فاضح أبيض.. بياض كالح أسود.. سواد طافح و أنا طافح من كيعاني المر فمش طبيعي إني آجي وأمر مرور الكرام وما نتوش كرام لو كان فيكوا حد كريم ما كان رضي بالضر و إوعاك تقولي حر انت مش حر ولا دي بلاد حر ذكرك يا وطن عورة لا تشد عود الواد ولا صنت عرض لبنت هونَ عليك وانت علينا هنت وإن كنت عمري ما خنت و أبويا اللي حارب في سينا مرجعش لينا إلا بحفنة تراب كالدم عايزني ليه أهتم معرفش أبويا من يوميها يعود بس اليهود رايحين.. جايين ع الحدود و أبويا باللي لم ينجزه راضي وكأنه شيء عادي فإن يدعو داعي الحرب عذرًا ما انيش فاضي - اللي يملك من الأرض شبر يروح يحارب عليه أما اللي زيي يحارب ليه ما عدت أملك هذه الحفنة عايزني أحارب في وطن مهوش وطنا احنا ولأجل أن تكنزوا أرضه أفني فلتفنوا جميعا قبل أن أفني م الجوع.. أو بذل ماء الوجه ولأجل وجه الحق إن شب فيك الوادع الطوق بيطق فألف مرة لأ شوكة يا وطن بالحلق دي بلاد كدابة مش صادقة بادور فيها مش بالقي يا تعيش علي ضهرها محروم يا تندفن صدقة فطبيعي تبقي مش فارقة أي ضفة من ضفتين النهر و7000 سنة من قهر تجدد مع كل أول شهر ف والنبي ياما تخديش علي خاطرك وشدي الحزام علي خصرك زي جارية ترقص لكل علية قوم وإن شاء الله يجيلك يوم ولا القيامة تقوم يا حيَ يا قيوم مدد إن شاء الله يجيلك هدد و أنا ليا فيكي بيت ولا ليا فيكي حيطان ملعون أبو الأركان الأربعة يا مفجعة يا فاجعة يا هاجعة في كل أسرة اللئام عارفين هيستفيدوا إيه عارفين هيستفيدوا كام ممكن أسأل هيدفعولي كام مش مهم بس تسبوني أنام لو حتي أنام في الطل أصل الهلال لو هل باختل كام وكيف وهل وانت يا وطن بتعل معتل آه يا بلد مختل ما تشوفوا ليكم حل وسبوني أنام وكلامي أهو كله برضه كلام سبوني أنام ولما اصحي هنتفاهم جايز ساعتها أكون فاهم بس أمانة لو ما كنتش راح تتحل بلاش برضه تتفاقم ما عدش ليك يا وطن زهوة فمر عليا في القهوة هنشرب شاي ما تقولش مش لازمك برغم الفقر أنا عازمك ونسمع «متقولش هيه اديتنا إيه قول هنديها إحنا إيه» وهي اديتنا يوم حاجة ولا هي محتاجة كمان حاجة «و100 حاجة ونص محدش فاهم أيها حاجة فيعملوا من كده حاجة يعني ما تفرقش كمان حاجة» حاجة.. دي ولا حاجة بلاش باللفظ نتحاجي فاحاجيكم ولو مش هتجوني راح اجيكم علي القهوة ونطلب بن آه يا وطن كالخن آه يا وطن خوان صاحب ما يتصاحب لأنه جبان وهذا قولي الآن أما بعد آه يا وطن معيوب ومش عاجب وأنا ماشي لا أنا غالب ولا مغلوب أنا غلبان *** ملعون جمعكم جمعا فلا طاعة ولا سمعا ويعني كنتوا سامعني ما تسمعونيش وأنا ليا حاجة.. مليش فبلاش يا وطن تهويش وصوت عالي ما انتش يا وطن غالي أنت وطن وخلاص ما تسألنيش عن الإخلاص هسأل يكون ليا خلاص خلاص ما عدتش أنا مرغوب وأنا تاني لو تجهلوا بيا فلتعلموني الآن أنا أفصح ما فيكوا بيان و كل مسيره يبان وإن كنت في الحسبان فحسبوني .. وأحاسبكم وليه مسيري ماشي وحاسيبكم أنا ماشي لا أنا غالب.. ولا مغلوب أنا غلبان *** إيه الوطن يسوي لو يكسبك قسوة.. وطبع غليظ يا بلاد بلا ميزة وبلا تميز و إيه يميز حق عن باطل في زمرة الأباطيل يا واخدة ع التضليل والرك ع التطبيل فقوم يا وطن وارقص لا تزيد ولا تنقص أنا مش هاصير أرخص لو تشتهي التبديل وما بالقي إليكي سبيل لا سبيل الذل يبقي اللسان لو ذل الأمر مش تهويل ولا فرصة للتأويل الخطب خطب خطير لا باشهر في وجهكم سيفي ولا خفت من سيفكم أنا مدركا زيفي كما مدركا زيفكم كدابين زفة وبيدعوا العفة وإيه اللي يفرق كفة عن كفة قد نلت ما كفي من فضلكم وفاض ففاض بيا إيه خطبكم بيا وإن تجهولوا بيا فلتعلموني الآن الآن وأنا ماشي أنا الفقير ابن الفقير ولحد كام جد غلبت اعد وانتي كمان ما بتسمعيش حد ولكن يحكيلي ابويا إن جدي كان يدوب قادر يعيش بس أنا لأ وانتي فيكي ناس تعيش.. تعيش وناس لأ فلا تتصنعي الرقة ولا يصدمك قولي وهذا منتهي قولي ما انفعش اكون درويش أغنيلك وإن كان علي نيلك ملعون أبو نيلك ما بيرونيش وأنا ماشي لا أنا غالب ولا مغلوب أنا غلبان
