القارئة أماني ناجي تكتب: لايك للمجلس العسكرى

قبل التأكيد على طلب الصداقة الذى ورد إلىّ فى الفيس بوك، قمت كالعادة بتصفح بروفايل صاحبه فوجدتها سيدة يتضح من صورتها تجاوزها السبعين، أما المشاركات المكتوبة فى الصفحة فلم أفهم ولا كلمة منها فاللغة المكتوب بها لم أرها من قبل فكانت بالنسبة لى شوية حروف لاتينية بلا معنى.
وقبل التأكيد على طلب الصداقة وبعد ما غلبت بحث عن ماهية هذه اللغة، اتضح أن اللغة هى البولندية التى لم أتعرف عليها من قبل (ولا أعتقد أنى سأفعل) ثم فكرت فى رفض طلب الصداقة ليس لشىء سوى لاعتقادى بعدم جدوى هذه الصداقة (ما هو مفيش لغة نتكلم بيها مع بعضينا .. يبقى ايه لازمتها الصداقة .زحمة فى البروفايل عالفاضى؟)
ثم قررت إضافتها واهو منها اكسب ثواب دى قد جدتى برضه وربما نتفق على التحدث باللغة الانجليزية، فأكدت الطلب ولكن الست طلعت مبتعرفش انجليزى كمان يا جدعان يعنى لا انجليزى ولا عربى ولا حتى صعيدى (ههههه خفة)، بس كان فى حاجة لاحظتها انها بتحط صور كتير لمناظر طبيعية وأشجار وكدا.
فكنت كل ما أفتح الصفحة ألاقيها حاطه صور لأشجار وفواكه (مش عارفه اشمعنى يعنى) ومكتوب فوق الصورة كلام وتحتها تعليقات (آه بالبولندى يا خفيف يللى بتسأل) وطبعا أمة الله (كاتبة هذه السطور) مش فاهمة اى حاجة وعشان مقطعش التواصل بيننا أقوم بعمل لايك ع الصورة (شكلها حلو اه بس مش فاهمة الكلام اللى عليها).
وفوجئت يا بونى آدميين أن الست بتعمل نفس الحاجة يعنى أحط صورة تعمل عليها لايك (كنت حاطه مرة صورة لسلطان باشا الأطرش وعملت عليها لايك مش عارفه عرفته منين دى) وعرفت انها برضه بتعمل لايك على الشكل مش ع الكلام فابتديت أحط صور أهرامات وأبو الهول وشوية جمال أهو إنعاش لحال السياحة الواقف ومنه برضه مد جسر تواصل شعبى بيننا وبين بولندا الشقيقة.
هكذا هى العلاقة بيننا وبين المجلس العسكرى فى قرارات كثيرة يتخذها المجلس، فمثلا يتم حبس جمال وعلاء فالشعب كله يعمل (لايك) ولكن من غير المفهوم أن يفضل جيمى وعيلاء على اتصال بالعالم الخارجى ومحدش بيعبر الشعب و يقوله حالهم ازاى فى السجن يعنى زيهم زى باقية المساجين ولا فى قرع جوا البورتو؟
ويتم حبس الرئيس المخلوع فالشعب كله يعمل (لايك) ولكن من غير المفهوم أن تكون الزنزانة فى فندق خمس نجوم اسمه مستشفى شرم، والحجة خايبة اوى فلو كانت طرة غير جاهزة فمن حق بقى مرضى طرة انهم ينتقلوا شرم (يعنى يا يتبنو لهم بيوت يا توفرو لهم ال..المستشفى.. يا إما بقى تعملو للشعب ساندوتشات حلاوة بالقشطة..يالهوى عالدم الخفيف).
ويصدر قرار بحبس السيدة المخلوعة الأولى فنقول قشطة ونعمل (لايك) فطبعا لازم يجي لها ذبحة صدرية أو انهيار عصبى عشان توضع فى العناية المركزة اللى طبعا لازم تكون جنب العناية المركزة بتاعت مبارك (خايفة جيمى يجيلو برد وعيلاء يجيلو جيوب أنفية فيتطلب ذلك نقلهم للسعودية أو الإمارات للعلاج .. وابقى قابلنى يا شعب).
ويقرر المجلس استئناف الدورى فالشعب كله يعمل (لايك) ويقول العجلة هتمشى والمركب الواقفة هتسير ولكن من غير المفهوم أن يتم تأمين مباريات كرة القدم بكل هذه الاعداد من جنود الشرطة والجيش ولا يتم تأمين قاعات المحاكم وأقسام الشرطة والمستشفيات.
ويقوم المجلس العسكرى بزق عجلة الفلسطينيين اللى واقفه ويرعى المصالحة ويخلص الليلة اللى كان موقف حالها أنكل ابو الغيط وأنكل عمر سليمان, فالفلسطينين والعرب والمصريين كلهم يعملوا (لايك) ولكن لم يكن من المفهوم أن يصر المجلس على ترشيح الدكتور مصطفى الفقى لأمانة الجامعة العربية (ايوه يا عم عارفه انه مشى خلاص وجه بداله دكتور العربى .. بطل تقاطعنى لو سمحت) وهو يعلم أنه مرفوض ليس فقط عربيا ولكن مصريا أيضا (واليوتيوب ما بيكذبش).
هذا هو الحال مع المجلس العسكرى الذى يقدم صور رائعة الجمال فنعمل (لايك) ولكن ما كتب فوقها وتحتها من تعليقات غير مفهوم بالمرة.
ملحوظة: بالنسبة للست البولندية دى انا لازم أضع حد معاها، فإما أن تتعلم هى العربية أو أتعلم أنا البولندية أو نتفق احنا الاتنين على تعلم لغة واحدة للتواصل عشان مش هفضل أعمل (لايك) كدا على طول. انا خلقى ضيق وبزهق بسرعة، ولو زهقت سأضطر آسفة لحذفها من قائمة الأصدقاء، وانا (والله العظيم) ما عايزة اعمل كدا.