جمال هليل للزمالكوية: الأشكيف جالكم.. خبوا فرقكم!!

سألني صديقي عن جوزيه, مثلما يسأل الجميع: هل فعلا سيتقاضى جوزيه هذا المبلغ الكبير الذي يصل إلى ثمانين ألف يورو؟ (جملة اعتراضية.. هذا المبلغ يوازي بالمصري 750 ألف جنيه بعد إضافة تكاليف الإقامة والسيارة!!)• قلت لصديقي: "ليه الحقد ده؟!! الرجل تعود على إسعاد المصريين وإدخال الفرحة على الأهلاوية, والبسمة لها ثمن في هذا الزمن". رد صديقي بحدة شديدة وقال: "يا راجل قول الحق.. وجدو جوزيه محتاج لسيارة على الزيرو, وإقامة في جناح بالفندق هو وزوجته, وتذاكر طيران ووجوده مع اللاعبين محتاج لمترجم يرافقه ليل نهار, والتدريب في الملعب محتاج حسب طلبه شخصيا لثلاثة خواجات من بلدياته.. وده معناه إن صفقة جوزيه ستصل إلى 130 ألف يورو في الشهر!!"
قلت لصديقي: "ياه.. إيه الحقد ده يا أخي, ولاّ علشان إنت زملكاوي وخايف من جوزيه البعبع المرعب للزملكاوية؟!!.. وإيه يعني لما الأهلي يصرف20 مليون جنيه في السنة ويحقق البطولة والناس تفرح؟"
قال صديقي الزملكاوي: "يا سيدي كنتم تاخدوا حسام حسن يجيب لكم الدوري زي ما هيجيبه للزمالك".. قلت له: "إنتم خلاص ضمنتم الدوري لأن الفارق ست نقاط؟! قبل كده كان الفارق 12 نقطة للزمالك في الدور الأول، فاز الأهلي باللقب في الدور الثاني!! وبعدين.. ليه إنت مستعجل, الدور الأول لم ينته.. وخدوا بالكم.. الأشكيف جالكم"!!
قال: "تقصد إيه بالأشكيف"؟ قلت: "جوزيه.. البعبع الأحمر أبو دماغ دهب اللي حقق للأهلي كل البطولات في ست سنين"! قال: "يا عم إنتم واخدين مقلب في جوزيه, والله الراجل ده هيفضل ورا الأهلي لغاية ما يجيبه الأرض.. تقدر تقول لي الأهلي هيجيب الفلوس دي منين بعد ياسين منصور ما قفل الحنفية؟"

قلت: "يا حبيبي ماتسمعش كلام الجرايد.. ياسين موجود.. وإن غاب.. فيه ناس كتير زيه بتحب الأهلي وبتدفع لله وللوطن دون حملات الشحاتة.. طيب تقدر تقول لي ليه الزملكاوية مابيدفعوش للزمالك؟ قال: "يا عم دي قضية ثانية في ميت عقبة.. خلينا في الجزيرة واللي هنشمت فيها السنة دي لما ناخد الدوري, ونسقط جوزيه ونموت الأشكيف بتاعكم اللي فشل في السعودية وطردوه"!!

قلت: "يا ابني بلاش كلام الجرايد ده!! جوزيه استقال من السعودية بعد ظهور عرض الأهلي الجديد".. قال: "تقصد إن عقد الأهلي أكبر من عرض اتحاد جدة"؟ قلت: "وليه لأ, المهم الجو اللي المدرب بيعمل فيه, وهو تعود على الحياة في مصر وفاهم اللعيبة, والإدارة فاهماه, علشان كده كان بيحقق البطولات"!!
قال صديقي الزملكاوي: "وهو من العدل إن جوزيه يشترط على الأهلي شراء وليد سليمان, وحسني عبد ربه.. ومدافعين.. طيب.. لو الأهلي اشترى هؤلاء للبدري لحقق البطولات, وكان استمر بنجاح هو أو زيزو, فماذا سيقدم جوزيه لو حققنا له ما يريد واشترى الأهلي كل المنتخب؟!"
قلت: "يا صديقي الحقود على الأهلي.. كل مدرب يريد أن يضع أحسن فريق والأهلي فريق بطولات فقط, ولا وقت للانتظار ولصناعة لاعبين, لأن إفريقيا على الأبواب.. المهم واضح إن كلكم يا زملكاوية مرعوبين من جوزيه.. (البعبع ((الأشكيف) اللي بيخطف الدوري وبيسرق إفريقيا.. إنتم خايفين ليه؟.. قوموا روحوا قبل الأشكيف ما يكلكم.. هم.. هم.. هم"..