بطولة أم فى 57357 أصيب أبناؤها الأربعة بالسرطان وتبرعت بالنخاع لإنقاذ أحدهم ولم تيأس وواصلت كفاحها

معهم بأمل حتى تحسنت حالتهم
أم لأربعة أبطال من57357 هم شريف وشيرين ونور وملك
أم الأطفال الأربعة: مش عارفة لو ماكانش فيه 57357 كنت هاعمل إيه بولادى.. وباقول لكل واحد اتبرع للمستشفى شكرا ليك إنك حاسس بينا وبسببك ولادى بيتعالجوا وهايخفوا إن شاء الله
لرفع نسب الشفاء وتطويرأساليب العلاج وعلاج أكبر عدد من أطفالنا المرضى, مستشفى 57357 يقدم رعاية متكاملة علىأعلى مستوى وبالمجان لأطفالنا مرضى السرطان بمساواة ومتابعة مستمرة لحالة المرضى، بالاعتماد على البحث العلمى، لتطوير أساليب العلاج والوقوف على أسباب المرض، لرفع نسب الشفاء من النسب الحالية 72% للنسب العالمية بإذن الله, بالإضافة لسعيه للتوسع لزيادة القدرة الاستيعابية للمستشفى.
من كفر الشهداء منوفية.. سيدة عمرها لا يتعدى ال 30 عاما، ولكنها مثال للأم التى تبذل كل جهدها بفطرتها لرعاية أبنائها الأربعة الذين أصيبوا بالسرطان، هى لا تعمل وزوجها قبل وفاته كان يعمل مزارعا باليومية, ورغم كل شىء إلا أنها تتبع كل تعليمات العلاج من المستشفى فى اصرار أن تنقذ أطفالها وتحافظ على حياتهم،هى أم شريف وشيرين وملك ونور، ولم يؤخرها وفاة زوجها التى حدثت فى وقت قريب عن مشوار كفاحها فى علاج أولادها.
شيرين 10 سنوات (مصابة بورم فى جزع المخ):
كان لقائى معها أثناء تواجدها بالمستشفى أثناء تلقى ابنها شريف للعلاج، ولاحظت أنها أم تصطحب 4 أطفال كلهم مرضى، وعندما سألتها قالت لى: "أيوه كلهم ولادى.. أنا ولادى الأربعة عندهم سرطان. وتحكى أم شيرين: أنا لما جيت المستشفى من سنة ونص.. شيرين ما كانتش بتقدر تقف على رجلها.. لفينا بيها كتير ماكانتش بتتحسن، وفيه دكتور قال لنا نجيبها 57357 جينا بيها على أمل ننقذها ودخلنا بيها على طول وعملوا لها الأشعات والتحاليل، وطلع عندها ورم فى جزع المخ، والدكتور أحمد ربنا يستره، قال مش هانقدر نعملها العملية علشان مكان الورم حساس قوى، وأخدت 8 جرعات كيماوى و30 جلسة اشعاعى، والحمد لله اتحسنت قوى قوى وبقت بتمشى كويس وحالتها كويسة، والدكاترة طمنونى عليها, ولما فى المستشفى عرفوا أن ظروفنا على قد حالنا، عملوا لشيرين شهرية تساعدنا بيها ربنا يسترهم ويبارك فى اللى بيتبرعوا علشان ولادى تتعالج وتعيش, المستشفى ادتنى الأمل أن ولادى هايعيشوا.. حاسة هنا إنى فى وسط أهلى, الاهتمام والمتابعة ودائما يتصلوا بينا يتابعوا حالة الولاد ولو فيه مشكلة بيحلوها ومعاملتهم بتنسى الواحد همومه.
شريف 12 سنة (مصاب بسرطان فى النخاع) :
وتستكمل أم الأبطال حكاية إصابة شريف: " شريف تعب من 6 شهور كشفوا عليه هنا فى المستشفى لقوا عنده فى النخاع وكان لازم له زرع.. إخواته مش متوافقين معاه، ولكن ربنا كرمنى وطلعت أنا اللى متوافقة معاه واتبرعت له وعمل الزرع وحالته اتحسنت ومستقرة الحمد لله.. دا ما كانشى بيقدر يمشى ودلوقتى بيمشى وبقى كويس.
ملك أصيبت (بسرطان الغدد الليمفاوية):
ملك 4 سنوات.. تحكى والدتها: ملك.. فى المستشفى عملوا لها مسح ذرى خلال المتابعة التى تتم للأبناء فى حالة إصابة أكثر من طفل من نفس الأسرة، فاكتشفوا إصابة ملك بسرطان الغدد الليمفاوية، ود. سونيا الطبيب المعالج أقرت لها 30 جلسة علاج إشعاعى ثلاثى الأبعاد، وملك الآن بتتلقى علاجها وحالتها فى تحسن والحمدلله, وتضيف أم ملك: " أنا مش عاوزة حاجة من الدنيا غير إنى أشوفهم كويسين ويرجعوا طبيعيين زى كل العيال.. أنا مواظبة على كل مواعيد الجرعات والمتابعات وباتابع مع كل الدكاترة بتوعهم".
نور 6 سنوات ( ورم فى جزع المخ):
أحدث إصابة فى أولادها.. نور التى أصيبت عقب وفاة والدها فى حادث وبالرغم من ذلك لم يهدأ إصرار الأم على أن تكون دعما وسندا قويا لأولادها فى رحلة علاجهم من السرطان، حيث اكتشفوا إصابتها بورم فى جزع المخ من شهرين، ولكن بعد الاشعات والتحاليل، اكتشفوا أن الورم حجمه صغير، وقد تم اكتشافه فى مراحله الأولى، وقرر لها الأطباء 4 جرعات كيماوى و30 جلسة علاج إشعاعى ونورالآن تتلقى العلاج وحالتها فى تحسن الحمد لله.
وفى نهاية لقائى بأم أبطالنا الأربعة.. سألتها أنت محتاجة أى حاجة نقدر نعملها لك قالت: "أنا عاوزاكوا تدعو لولادى ربنا يشفيهم ويكمل علاجهم على خير, باقول يا ترى ياولادى رمضان الجاى هاتكونوا معايا والا لأ؟ أنا ماليش حد بعد ربنا غيرهم.. وربنا يكرم كل اللى فى المستشفى هنا لأنى أنا مهما وصفت مش هاقدر أوصف راحة قلبى وولادى بيتعالجوا هنا فى 57357 وكل حاجة متوافرة لهم والناس بتعاملنا أحسن معاملة زى العيلة بالظبط .
كل قصة من الأطفال الأربعة فى الظروف الطبيعية كفيلة بإحداث ارتباك فى حياة أى أسرة، ولكن شاء الله أن يمتحن هذه الأم بأربعة أبطال بيحاربوا السرطان وهى خير سند لهم , تبرعك مش بس وفر لهم الأمان فى وجود علاج ورعاية دا وفر راحة القلب لأم شاء الله أن تعيش فى ظروف غاية فى الصعوبة وتفقد زوجها فى حادث ولكن بفضل ربنا وتبرعاتكم قدرت تناضل مع أطفالها ويكون تحسن حالتهم وقرب تحقيقهم لحلم الشفاء قريب بإذن الله.
اقرأ قصة أم الأبطال الأربعة من داخل 57357.. واعرف أن كل جنيه بتتبرع بيه سواء من خلال رسالة موبايل أو تبرع بأى من طرق التبرع المتاحة.. ساهم فى مشوار علاج أطفال كتير بكرامة.. وبرعاية على أعلى مستوى وبالمجان وقربهم من تحقيق الحلم بالشفاء من السرطان بإذن الله.
مستشفى 57357.. رحلة علم هدفها الحياة