بابا.....ماما بتقولك ..أعمل لها...أد!

من فترة ليست بالبعيدة كانت كل الخناقات و المشاكل بينى و بين الأسرة الكريمة سببها انى مش باسيب الموبايل و على حد تعبيرهم طول النهار قعدة "باتكتك" عليه و مبردش عليهم و لا بتكلم معاهم و أصبحت شخصية منعزلة .. مبتسمة مع نفسها فقط..و لما حد يمر من جنبى بينظر لى نظرة حزينة معلقا "لا حول ولا قوة الا بالله" ومواقف تانيه كتييرة...وبصراحه كان معاهم حق .
وهاأنا اليوم كلى فرحه وسعادة...ليه ؟ لأن الأسرة الكريمه بأكملها..وعقبال عندكم سيطر عليها وتمكن منها..فيروس الموبايل الرهيب وتوابعه من فيسبوك, واتس أب, فيبر, كاندى كرش....وخلافه وأقسم لكم أننا نجلس معا فى نفس الغرفه والتليفزيون مفتوح وجميعنا مستغرق تماما فى موبايله والغريب انه لو غير أحدنا القناة صرخ فيه الجميع وتنهال عليه اللعنات وكأننا متابعين..وننتبه اننا معا فيبدأ حوار عجيب من عينه كلمتك عالفيبر مرتين ومارديتش..خليك عالواتس اب أحسن ...أفصل الكهربا عن الروتر ورجعها تانى ..أصحابى بيقولوا بباكى عالفيسبوك طول النهار , شفت الفيديو دا جامد جدا, بابا! ماما بتقولك أعملها أد !!!!
نجلس جميعا مندمجين جدا ومش سامعيين ولا شايفين حاجه غير شاشه الموبايل عايشين بمبدأ "اللى بيته من زجاج مايحدفش الناس بالطوب" ونقاوم العطش والجوع الى أقصى درجه ليه؟ لأن اللى هايغلط ويقوم ستنهال عليه الطلبات أعملنا شاى أو هاتلى ميه معاك والنبى, أطفى نور الصاله وأنت راجع أو خد الكبايات وانت قايم.
وعلى الرغم من فرحتى بأنهم أصبحوا مثلى..وأنى بتتريق عليهم..وعلى عزلتهم..وبقول لهم "لا حول ولا قوة الا بالله"
الا انى فعلا حزينه على ما وصلنا اليه..ومش عارفه أمتى هانتخلص من سيطرة الموبايل علينا..أمتى هانرجع نتلم تانى مع بعض..ونبتسم ونضحك لبعض مش للموبايل ونحكى بصوتنا مش بأصابعنا ونسمع بعض نسمع مش نقرأ أخبارنا عالبوست ولا نستنا الفيسبوك يعرفنا بأحوالنا!! يارب نفسى نرجع عيله طبيعية تانى مش خمس موبايلات عايشين مع بعض..!!!!!!!.
ميرنا محسن شلبى
الفرقة الثالثة .. كلية إعلام جامعة القاهرة
..