الرسم ب«القهوة» آخر تقاليع الفنانين

اعتدنا أن نرى الرسم على جميع المواد والأسطح بكل الأشكال المختلفة، لكن فى الفترة الأخيرة انتشرت موجة استغلال المواد الغذائية فى الرسم، حيث قام عدد من الشباب الموهوبين فى تسخير مواهبهم من خلال استخدام مواد بسيطة متوافرة فى كل البيوت ولا تحتاج إلى تكلفة عالية.
وتقول «آية خضر» 19 سنة، كلية الفنون التطبيقية قسم ديكور من دمياط: الرسم من أكثر الفنون التى يمكن التعبير بها عن الواقع الذى نعيشه فهو يمكنه أن يرصد جميع المشكلات الحياتية ويقدم حلولا لها من خلال الرسومات المختلفة، وعن بدايتها مع الرسم تقول: بدأت أدخل مسابقات رسم وأنا فى ابتدائى، ولا أعرف متى اكتشفت موهبتى، لكن حسيت أنى بحب أرسم وكنت بوقف شاشة التليفزيون على الكارتون وأرسم الشخصيات التى أمامى، وكمان كنت برسم أصدقائى رغم أن رسمى وقتها كان بسيطا ولم يكن بالمستوى الذى وصلت له هذه الأيام بعد التمرس والدراسة التى ساعدتنى فى تنمية موهبتى.. أسرتى وأصدقائى هم من دعمونى لتنمية موهبتى وشجعونى أنى أدخل فنون تطبيقية وأنمى الموهبة بالدراسة.
وعن استغلال فنها تقول: أنا كل حاجة بعملها لازم أدخل فيها الرسم وأغلب الحاجات اللى أنا عملاها بتعكس رأيى ونظرتى للحاجة اللى برسمها، يعنى لما قررت أرسم بالقهوة ونسمع فيروز فالإحساس بيهما بقى واحد.. أما فى رسمة أم كلثوم لما رسمت دماغها زى الفضاء أو زى ما بنقول الملكوت كنت قاصدة فكرة إن الدماغ بتبقى فى ملكوت تانى لما بنسمعها.. الخامات اللى برسم بيها الرصاص والألوان بأنواعها خشب وجواش وأكوريل وألوان زجاج ورسمت بألوان قماش وبالغيرا والريليف وميك اب وقهوة واسبراى وسليكون ولسه ناوية أجرب خامات كتير أنا لسه فى أول الطريق وناوية أعمل وأجرب حاجات كتير.
وبحكم دراستى فى الكلية قررت أن أعرف الرسم، فكنت أجلس مع أصحابى أعلم وأتعلم وأنا وأصحابى على طول بنرسم ونرفع شغلنا عالنت وده خلق تنافس بينا وطورنا ونطلع أفكار مبتكرة.
وذكرت خضر: شاركت فى مسابقات ومعارض وأنا صغيرة وغالبا معظمه كان فى قصر الثقافة وخدت مراكز على المحافظة وعلى المدرسة وحاليا أشارك فى ايفنتات فنية وعروض للمواهب.