مفاجأة .. منى ومنة وحماقى مدمنون !

هم النجوم دول مش بشر .. يعني ممكن قوي ينزلقوا لبئر الإدمان؟ ! أيوه فيها إيه .. في التحقيق التالي سألنا مجموعة من النجوم عن الشيء الذي أدمنوه، و طلبنا منهم توصيفا دقيقا ً لحالتهم .
في البداية تقول مني زكي عن توصيف حالتها : أنا مدمنة لعب مع أبنتي " لي لي " أكثر وقت أستمتع به في حياتي هو الوقت الذي أقضيه في اللعب معها و ياسلام لو كان أحمد معانا حتي في أيام إجازتي بألعب معاها طول النهارمن غير ما أشعر بملل أو تعب !!
وتقول منة شلبي عن إدمانها : مقدرش أمشي من غيره .. الكمبيوتر طبعا !! دايما شايلاه في كل مكان وأنتهز أي 10 دقائق فاضيين علشان أدخل علي الإنترنت لأتابع آخر الأخبار فأنا بصراحة مش غاوية قراءة جرائد ولكني أتابع كل ما هو جديد في الفن خاصة والعالم عموما من خلال بعض المواقع التي أدخلها بشكل لا شعوري بمجرد إن الكمبيوتر بتاعي " يشم رائحة الا نترنت" في أي مكان !!
ومن أكبر مدمني البلاي ستيشن النجم محمد حماقى .. ويقول : من الآخر محدش يقدر يغلبني فيه !! أنا مدمنه بشكل غريب .. ممكن لو في وقت أفضل ألعب مع أصحابي مثلا خمس ساعات متواصلة !! أما لو عندي وقت أكبر فاضي فبكل بساطة بكلم أصحابي ونروح النادي أو الصالة المغطاة في استاد القاهرة وبدل ما كنا بنلعب فيفا في البلاي ستيشن نلعب كورة بحق وحقيق !!
أما نيكول سابا فتصف حالتها قائلة : أنا أحب القراءة جدا ولكن لانشغالي الدائم بالعمل لا أستطيع أن أقرأ كثيرا ولذلك فأنا أنتهز أي إجازة لأغوص في أحد الكتب .. عموما أنا أحب القراءة في كل المجالات ولكن أكثر مجال مهووسة بالقراءة فيه هو علم النفس فأنا أشعر أنه يستطيع التغيير من شخصيتي كما يمكنني من خلاله التعرف علي عيوبي وكيفية تحويلها إلي إيجابيات ..
والطريف أن إدمان أشرف عبد الباقي كان للعبة زوما .. ويقول : لما أكون فاضي ممكن أفضل 7 ساعات متواصلة ألعب علي الكمبيوتر زوما والتي أحرص أن أحمل كل تحديث جديد لها من علي الإنترنت .. مش عارف إزاي بتاخدني ومقدرش اقوم من علي الجهاز بسببها .. نفسي أفهم ليه !! طالما عندي وقت لازم أفضل لغاية يا إما أخلصها يا إما أنام .. وأكيد النوم بييجي أسرع !! حاجة تانية أنا مدمنها ولكن بدرجة أقل وهي البحث عن الأغاني وبرامج ومسلسلات الإذاعة القديمة علي الإنترنت وتحميلها فمثلا عندي كل أغاني عبد الوهاب القديمة وأغاني فيروز ومسلسل علي بابا وغيرها من الروائع القديمة جدا .
أما شريف رمزي فهو مدمن رسم ونحت ويقول " لأنني خريج فنون جميلة فأنا أعشق الرسم والنحت حتي إني خصصت في شقتي مكانا أمارس فيه علشان أرسم وأنحت فيه من غير إزعاج !! وبحاول دايما أنتهز أي فرصة علشان آخد إجازة أنعزل فيها عن الدنيا ولا أخرج من مرسمي .. وعلي فكرة أنا أول معرض عملته كنت في ثانوي وقدرت أبيع كل لوحاتي فيه .. والفترة الجاية ناوي أكمل مجموعة من اللوحات شغال عليها علشان أقدر أعمل معرض جديد قريبا إن شاء الله " .
" أنا مجنونة محمد منير وتقريبا كل أشرطته عندي .. " ده كلام الممثلة السورية جومانا مراد والتي تضيف : أشعر براحة غريبة وسكينة لما أسمع اغانيه لدرجة اني لو كنت متعصبة جدا وحد شغل اغنية لمنير اهدي علي طول .. كمان هو من الطقوس اليومية عندي فأنا متعودة إني أول ما أصحي أشرب فنجان قهوة وأنا أسمع أغنية لمنير واسرح معاهاعلشان مزاجي يكون رايق طول النهار حتي رنة موبايلي عاملاها أغنية الياسمينا .. غير منير أنا مدمنة قهوة فأنا في اليوم ممكن أشرب 20 فنجان !! ورغم انها اثرت علي صحتي وضرتني لكن مش قادرة ابطلها .
أما الممثلة بسمة فتقول : انا مدمنة حاجات كتير منها اني بحب الالعاب الذهنية علي الكمبيوتر فممكن ألعب وقتا طويلا دون ان اشعر بالوقت او احس بملل وكمان بأعشق مقابلة اصدقائي فلو ماعنديش شغل ممكن اقابلهم كل يوم ونخرج نتفسح ونتغدي برة وكمان انا مدمنة طاولة ولو اني دايما بخسر فيها وكل اللي بيلعبني بيكسبني ولكن بحبها .
ورغم أنها ممثلة .. لكن لقاء الخميسي أيضاً مدمنة غناء وتقول : أنا هموت وأغني ولو ماغنتش ممكن يحصلي حاجة والفترة اللي فاتت كنت بفكر جديا اني اختار اغاني علشان اعمل ألبوما ولكن انشغلت في اكثر من عمل فقررت اني هاعمل فيديو كليب واعرضه الاول اذا عجب الجمهور سأستمر واعمل البوما كاملا ولكن لو لم يعجب الجمهور مش هايأس وهاغني في الأفلام اللي هشارك فيها .. علي فكرة كل اللي بيسمع صوتي بيقولي انه حلو قوي .