فوتوجرافر لكل مصرى

انتشرت فى الآونة الأخيرة ظاهرة عمل الشباب بمهنة التصوير وأصبح كل من لا يجد عملا يقوم بشراء كاميرا ويتجه للتصوير سواء لديه الموهبة أم لا
وتعد هذه المهنة مثل باقى المهن الأخرى الاستمرارية فيها للأفضل ومن يبتكر بها ينجح في تحقيق ذاته.. وغيرت كثيرًا من شكل التصوير التقليدى وصارت الصور من مجرد شىء روتينى إلى شىء مهم يحمل أفكارا جديدة ولقطات مميزة.
قالت إيمان حسين مصورة شابة أنا بحب الرسم والتصوير من صغرى وكان نفسى أدخل كلية فنون جميلة أو فنون تطبيقية بس للأسف منفعش فكملت إرضاء لرغبة أهلى أنى أدخل كلية يكون ليها مجال شغل كويس بعد التخرج ودخلت تجارة بس بردو حبى للرسم والتصوير مفرقنيش لحد مابقيت بصور بموبيلى أى حاجة بتلفت نظرى فى الشارع ومن تلات سنين قررت إنى أشتغل الحاجة اللى بحبها وفعلا حوشت وجبت كاميرا ديجيتال وبعد كدا حوشت تانى وجبت كاميرا بروفيشنال وبقيت أصور الناس فى الشارع ناس تستحق المساعدة وأحاول أوصل حالتهم بالصور ولقيت الموضوع بدء ينجح وطبعا دا كان من غير أى مقابل.
واستكملت إيمان قائلة فكرت أنى أكبر الفكرة وبدأت فكرة صورنى شكرا أنا وناس صحابى وهى إننا نصور أى حد مع صحابه ببلاش وفى أماكن مختلفة والفكرة نجحت الحمد لله.
وقالت إيمان اتجهت لتصوير الأفراح بحيث إنى أبدأ أحترف ويبقى فيه عائد مادى يقدر يغطى احتياجاتى عشان أستمر فى المهنة اللى بحبها.
أشارت إيمان إلى أن انتشار ظاهرة الفوتوجرافرز شىء إيجابى لأن التصوير فى حد ذاته شىء جميل لأننا بنسجل لحظات مهمة سواء حلوة أو وحشة وبعد كده بتبقى ذكريات وتاريخ بس طبعًا ده بيبقى على حسب أهداف المصورين نفسهم فى حد بيبقى هدفه إنه يساعد على نشر الفرحة وحد تانى بيستغلها فى تنشيط السياحة الداخلية بإنه يصور الناس فى أماكن سياحية مختلفة وفيه ناس بتستغلها غلط بأنها تركز على الظواهر السلبية اللى فى البلد وتنسى الجوانب التانية بس اللى أهم من كل ده هو الاستمرارية ومين هيقدر يكمل.
ومن ناحية أخرى قال أحمد شبل مصور شاب من صغرى بحب التصوير بس بعد التخرج مكنتش لاقى حاجة أعملها وكنت دايمًا بتابع صفحات أشهر المصورين الأجانب لحد ما بقى عندى خلفية كويسة عن التصوير فقررت أنى أبتدى أشتغل و بدأت أصور صحابى وبعد كده اتجهت أصور «موديلز» بس فكرة الموديلز عندنا مش مفهومة أوى وملهاش أساس واضح فاتجهت لتصوير «الكابلز»، وعملت جلسات تصوير مجانا فى البداية وبعد كده بقى فيه مقابل مادى.
واستكمل أحمد قائلًا: أنا عندى شغل تانى بجانب التصوير بس التصوير مربح وفلوسه كويسة وخصوصا للشباب اللى لسه بادئ حياته لأن ممكن أشتغل يومين فى الشهر وأجيب مقابل مادى ممكن ماجبوش لو اشتغلت فأى مهنة تانية وغير كده التصوير مهنة حرة مش فيها أى قيود ودى حاجة الشباب بيفضلها.
وأشار شبل بالنسبة لأفكار صورى فبتبقى يا إما من دماغى يا إما من الناس اللى بصورهم وفيه ناس بتبقى معاها صور لمصورين آخرين وعايزنى أصورههم بس طبعا برفض لأنى مبحبش أخد تعب حد غيرى أنا بحاول دايمًا أتابع كل جديد عشان أطور من نفسى.
أوضح شبل الفيس بوك هو اللى ساعدنا فى الانتشار وساهم فى شهرة ناس كتير فأنا مثلًا معنديش ولا استديو ولا مكتب معنديش غير صفحتى اللى عالفيس لكن بردو فى سلبيات للفيس بوك انه مفيش أى وسيلة نقدر نحمى بيها الصور وده طبعا بيعرضنا لمشاكل كتير غير إن فى ناس كتير بقوا واخدين الموضوع شغلانة مش أكتر بس دى حرية شخصية لأن فى الآخر كل واحد ليه أفكاره والكويس هو اللى بيظهر فى الآخر.
قالت رشا سلامة مصورة: أنا فى الأساس خريجة فنون تطبيقية يعنى التصوير ليه علاقة بدراستى وكانت بدايتى أنى اشتريت كاميرا غير احترافية ومع الشغل اشتريت كاميرا احترافية وعدسات ومعدات إضاءة أشارت رشا: إحنا كبنات وسيدات بنواجه مشاكل كتيرة لأن المجتمع من الصعب يقبل فكرة المصورة وخصوصا لو بتصور فرح أو تصوير صحفى مثلًا وإحنا بندعو الناس إنها تصور وتستمتع بالتصوير ونفس الوقت يدرسوا ويتعمقوا فى الدراسة لأن دايما المشكلة بتبقى فى المصورين غير الدارسين لقواعد الفن والتصوير عمومًا لأن الفن ده من زمان وليه تاريخ حتى التقاليع والمستجدات الجديدة ليها أصل فى التاريخ زى السيلفى مثلا فهو أساسه فن تشكيلى لأن معطظم الفنانين رسموا لنفسهم صورا شخصية.
واستكملت رشا قائلة: بالنسبة للجانب المادى فالتصوير مجٌدى لكن إذا طورنا من نفسنا وتابعنا كل جديد فى عالم التصوير.
قال أحمد ثابت مصور هاوى: أنا فى الأساس دكتور بشرى بس عاشق للتصوير من صغرى وأول مبلغ حوشته فحياتى كلها كان جنيه واشتريت كاميرا عادية، وكنت فرحان بيها أوى ودا لأنى بعتبر نفسى مهوس بالتصوير لدرجة أى منظر يلفت نظرى لازم أصورة حتى لو بالموبايل واللى حببنى فى التصوير هو جدى كان عنده عدد كبير من الكاميرات بأنواع مختلفة. واستكمل ثابت الموضوع بدأ معايا من لما كنت بصور أفراح أقاربى كانت الصور بتعجبهم جدًا وبدأت أحس أنى مميز من هنا بدأ مشوارى مع التصوير وعلى الرغم من أنى دكتور وصاحب مكتب سياحة فنفس الوقت إلا أنى ما اتخلتش بردوه عن التصوير لأنه حياة تانية بالنسبة ليا.
وأشار ثابت بالنسبة لظاهرة الفتوجرافرز إنها بقت غريبة لأنها تقتل الموهبة والناس بقى هدفها الأول العائد المادى وظهرت ناس كتير بتصور وخلاص مش شرط الموهبة ولا الدراسة والفيس بوك عمومًا بيعمل انتشار لأى حاجة مهما كان حجمها وأهميتها وبالنسبة للمصورين بيساعدهم فالشهرة والانتشار بس بشرط أن المصور يكون موهوبا ومدركا لأساسيات التصوير.
وعلى الجانب الآخر كان هناك من يؤيد الفكرة ومن يعرضها ومن يرى إنها ظاهرة ومع الوقت ستختفى وأن لها أبعادا اجتماعية.
قالت هدى عبدالقادر سنة طالبة فكرة انتشار الفوتوجرافز حلوة جدا وأنا بفضلها فأى مناسبة ليا لأنها مختلفة وأفضل من الصور العادية التقليدية ودلوقتى كمان بقى أسهل أن الصور تبقى على الكمبيوتر أو الموبايل أحسن متبقى مطبوعة.
كما قال إبراهيم عبيد محاسب أنا بحب التصوير جدا بس مفكرتش إنى اتجه للتصوير كمهنة بس ملاحظ انتشار الموضوع دا مش على الفيس بس لا فالشوارع كمان ناس كتير بيبقى معاها كاميرات وبتصور فى الناس أو فى الشارع عمومًا بس هى حاجة حلوة ومبهجة.
وقال محمود رضا سنة دكتور بشرى التصوير فن ومينفعش أى حد يشتغل فيه كمهنة وشغلانة من غير ما يكون فاهم ودارس قواعده فلازم يكون فيه قواعد بتقنن دا مش أى حد يقدر يجيب كاميرا ويصور وخلاص.
قال أحمد مصطفى سنة مهندس كمبيوتر السبب فانتشار المصورين إنها مهنة سهلة و«الفيس بوك» بيخلى أى حد يعمل دعاية لنفسه بمنتهى السهولة بس برده مش كلهم مشهورين فيه ناس فعلا ناجحة و ناس مش بتستمر و ده بيرجع إن الموهوبين فعلا هما اللى بيستمروا عشان عندهم أفكار جديدة واللى وخدنها شغلانة وخلاص مبيكملوش.
وقالت رانيا يونس ترجمة الصور فى حد ذاتها شيء جميل وبيخلى الواحد يحتفظ بذكريات حلوة وأنا بأيد انتشار الفوتوجرافرز جدا لأن الوقت الحالى كل حاجة دلوقتى بقيت بسرعة وبتطور كل لحظة وأكيد الصور اللى على الكاميرات أو الموبايلات أفضل وبنقدر نحافظ عليها على عكس الصور المطبوعة بتتعرض للتلف بعد فترة معينة.
كما قالت نهى محمد طالبة أنا بحب أتصور جدا ودايما بشارك فى جلسات التصوير اللى بيعملوها المصورون بس فالأول بتبقى مجانًا وبعد كده بيبقى بمقابل مادى مع الوقت المقابل المادى ده بيزيد ففى ناس بيقولوا نجيب كاميرا ونتصور أحنا أحسن ومع الوقت يبدو هما كمان يخدوها مهنة.
قال صلاح أحمد مهندس مدنى أحنا بطبعنا أننا لما بنلاقى حاجة تنجح كلنا بنتجه ليها حتى لو معندناش خبرة فيها ودا ساعد فى انتشار الظاهرة دى واللى ساعد أكتر هو الفيس بوك ومواقع التواصل الاجتماعى إنها بقت وسيلة لنشر الصور وبالتالى أول ما بدأ الظاهرة ونجحت كل الناس عملوا صفحات وبقوا مصورين.
قال مصطفى عبدالقادر موظف أنا ملاحظ الموضوع ده وابنى نفسه بيشتغل مصور بس الشباب هيعملوا إيه مبيصدقوا يلاقوا حاجة سهلة وتجبلهم فلوس ودخل يساعدهم عشان يبدأوا حياتهم ويعيشوا عيشة كريمة.
قالت شيرين صلاح الدين موظفة طبعا الظاهرة دى موجودة بس أنا شايفة إنها ظاهرة إيجابية وبتسعد الناس لأن الصور وسيلة بتخلى الناس تفتكر لحظات حلوة فى حياتهم أنا نفسى فى فرحى استعنت بمصور شاب مشهور وصور لى فرحى وكان عنده أفكار جديدة ومختلفة.