زواج الحب الذي لا يخاصم العقل

أنا كنت بحب واحد من حوالي أربع سنين واتخطبنا بقالنا سنة وأربع شهور والمفروض إننا هنتجوز بعد ستة أشهر بس للأسف الإنسان اللي أنا حبيته اتغير وبقى واحد تاني خالص بعد الخطوبة أو يمكن العيوب دي كانت موجودة فيه بس أنا كنت باحاول أغمض عيوني عنها وأقول لما هنبقى لبعض هيتغير.
بس للأسف كل يوم كان من السيئ للأسوأ، المعاملة بقت آخر قلة احترام بدأت بأنه بيشتمني بأهلي وبعدين ممكن يشتمني في الشارع، وبعدين بقى يمد إيده في الشارع ويزعق لي قدام الناس، كنت باخاف أقول لأهلي علشان أول حاجة هيقولوها لي هو ده اختيارك اللي وقفتي قدامنا علشانه اتحملي بقى، وفعلا بقيت باتحمل وباجي على نفسي كتير علشانه، وباساعده ماديا ومعنويا وماكانش ليّ أي طلبات زي بقية البنات المخطوبة، وهو من يوم ما خطبني ماجابليش أي هدية في أي مناسبة وباقول مش مهم علشان أنا عارفة ظروفه. بس أنا خلاص تعبت مافيش أي تحسن مادي ولا أخلاقي بيحصل في شخصيته.
هو بيتهمني إني باهمله وإني بعمل راسي براسه، بس ده مش صحيح، أنا باحاول أفكر معاه في المشاكل المادية اللي بتقابلنا لأنه مش بيعرف يتصرف ودايما يقول لي هي الظروف كده يعني أعمل لك إيه؟ أنا مش باطلب منه كتير أنا كل اللي باطلبه إنه يكون عنده طموح؛ لأن في الزمن ده اللي مش بيتحرك بيفضل واقف محلك سر.
أرجوكم ردوا عليّ بسرعة؛ لأني خلاص تعبت وخايفة من المستقبل اللي هيبقى معاه بالوضع ده، ناس بتقول لي استحملي معاه وخلاص، وناس بتقول لي الحياة بعد الجواز حاجة تانية غير الخطوبة، ولما تبقى مخطوبة وسبتي أحسن ما تكوني مطلقة وناس تانية بتقول لي طيب وفلوسك اللي دفعتيها معاه هتسيبي واحدة تانية تتمتع بكل اللي إنتي بنيتيه من شقاكي.. محتارة ومش عارفة أعمل إيه، بالله عليكم أفيدوني بسرعة قبل ما آخد أي قرار من دماغي أندم عليه ويدمّر حياتي بعد كده وجزاكم الله كل خير.
B