الأعمال المتاحة توقف نمو المواهب

غالبية الشباب الآن الاستسلام لشروط الوظائف الجديدة ومسيرة مشوارهم التعليمى الذى لا ينتمى الى مواهبهم وإنما الهدف هو الحصول على شهادة تنفعه بعد ذلك بغض النظر عن الموهبة التى يتحلى بها ولكن ينقصها من يدعمها حتى ينميها بشكلها المطلوب والتى قد تخدم نفسه، فهناك الكثير من الشباب الذين تخلوا عن مواهبهم الفنية من أجل شهادة المستقبل وتكوين نفسه وبناء اسرة وتكوين عائلة والتى يتطلبها المجال الوظيفى بغض النظر عن الموهبة التى يمتلكها، كما انه على مدار الحياة ستجد كثيرا من الشباب الذين يشعرون بالندم على اهدار مواهبهم التى لم يجدوا من ينميها لهم حتى يستفيدوا وكذلك المجتمع يستفيد من هؤلاء الشباب الموهوبين الذين تخفوا خلف الوظائف أو تكملة مشوارهم التعليمي.
تحكى «منة الله عصام» 20 سنة حقوق عين شمس: انا بحب الرسم من صغرى بس لما كبرت ودخلت الجامعة اتجهت خصوصا لل «fashion design» انا كمان باتفرج على افكار واخر اعمال وشغل المصممين الكبار فى مجال الفاشون وبحاول أنمى مهاراتى دى وكمان اتعلم بنفسى خصوصا ان مفيش ايد هتتمدلك وتساعدك وبالرغم من كده قدمت فى مسابقات تبع المدرسة ودخلت معرض المدرسة ولما قبلت فى حقوق قدمت فى قسم اللجنة الفنية للفنون التشكيلية وكنت اصغر واحدة فى الفريق بحاول حاليا ادور على شغل فى هذا المجال برغم الصعوبات اللى يواجهها عشان اوصل للموهبة اللى بحلم بيها بجانب الدراسة طبعا. يمكن أنا احسن من غيرى فى حاجة بسيطة وهى ان فى الجامعة عندى «حقوق» مراعيين الموهبة بتاعتى وبيساعدونى لكن فى كليات تانية مفش اهتمام من اى نوع، وكمان فى الكلية بيوفرو لنا الادوات وبيساعدونا فى تنفيذ الأفكار اللى بنكون عايزين نرسمها وبنشارك بيهم فى معرض على مستوى جامعة عين شمس وبيكون فى مراكز وشهادات ومكافآت مالية، كمان نفسى أحول الموهبة اللى عندى لشغل تنفيذى عشان احس انى بقدم حاجة للمجتمع انا بتمنى ان كليه زى فنون جميلة وتربية فنية يكون دخولها ميحكموش المجموع لان ناس كتير مش ليها فى الفن وبتحاول تدخلها.
أحمد عباس إعلام القاهرة: موهبتى الاساسية هى الإلقاء الإذاعى والتقديم سواء تليفزيونى او إذاعي وبرده عندى مهارة الاعداد عن طريق القراءة والبحث والاطلاع وبحب ابحث عن اى موضوع عشان اكون وجهة نظر صحيحة ورؤية جيدة، نفسى لما اتخرج اشتغل فى مجال التقديم سواء الاذاعى او التليفزيونى بس للأسف ماجتليش الفرصة انى اشتغل بمواهبى، وأغلب الشغل فى القنوات الاعلامية هو استغلال واستنفاد للطاقة بس اعتقد ان فى فرص وأنا عليا ابحث اكتر والدولة المفروض توفرلى كطالب اعلام تدريبًا وتعليمًا أفضل من كده وكمان ليه ميكونش لينا تكليف كطلبة طب؟
«ازاى هنتقدم واحنا بنقتل كل يوم موهبة»
«أحمد محمد» تجارة عين شمس: انا بعشق حاجة اسمها الرسم، والسبب الاساسى من عدم دخولى كلية فنون جميلة هو ان راحت عليا نومة ومالحقتش ميعاد الاختبار لكن ماستسلمتش لكده بالعكس دخلت كلية انا بحبها برضه وقررت اخلى الرسم جنب الدراسة كموهبة وكنت فاكر لما قررت اخد الرسم هواية هلقى حد جنبى يساعدنى لكن محصلش حاجة فتحسين الموهبة بيكون من جواك غير كده هتنعدم وماستسلمتش وقررت اتعلم بنفسى واشوف فيديوهات على يوتيوب وبصراحة مش عارف ازاى هنتقدم واحنا بنقتل كل يوم موهبة سواء فى الرسم او الغناء او الشعر لازم نهتم ونراعى الشباب دول، لأ والمضحك انى حتى لما خلصت كلية تجارة و4 سنين معاناة كنت فاكر انى هشتغل والدنيا هتتعدل شوية بس كلها احلام مش اكتر.
محمد صلاح فنون تطبيقية، أنا بدأت من اولى ثانوى بالشعر كان عامى بقصيدة اسمها «اضحك» وكنت ساعتها حابب ابعد عن السوشيال ميديا عموما لأن طبعا السوشيال ميديا سواء فيس بوك تويتر او اى وسيلة من وسائل الاعلام بتاخد جزء كبير من حياتنا وبدأت ارجع موهبة الرسم والفن اللى اتدفنت عندى و فى نفس الوقت بدأت اقرأ واخد طريقى ف «الكتابة» بدأت بالشعر وكنت عندى 16 سنة اتجهت لطريق مختلف ومدخلتش فى سكة الكتابة والفنون كالرسم وفى اوقات فراغى فى الثانوية العامة كنت بدل ما اقعد ع اللاب او التليفزيون او «انزل نزولة قهوة مع صحابى كنت ممكن اقعد اكتب او ارسم خصوصا الكتابة بس بدأت اكتب خواطر. «بجنيه امل وحياتك» ، «شىء من العزلة» وحاجات تانية كتير عدت مرحلة الثانوى وجت الكلية ودخلت فنون تطبيقية بسبب حبى للرسم والفن مع انه كانت جاتلى أداب لغة عربية فى التنسيق كنت حاببها جدا عشان بحب العربى عموما وبحب الكتابة جدا لدرجة انى جيت فى فترة اقعدت الف على مجلات للشباب وصحف اكتب فيها.
نرفانا هايمن تربية عين شمس: أول حاجة انا وارثة موهبة الرسم دى من والدتى وانا صغيرة كان طموحى انى انمى الموهبة دى واكون فنانة مشهورة ولكن حصلت عواقب كتير اولها احساسى بأنه ملوش لازمة خصوصا ان احنا واحنا صغيرين بنهمل حصة الرسم زائد ان المدرسة ونظام التعليم فى مصر مش بيهتم اصلا بالمجلات سواء الفن او غيره، تانى مشكلة مجموع الثانوية العامة واللى وجهنى طبعا لكلية تربية وكمان مجتمعنا من وجهة نظر والدى ان انسب شغلانة للبنت هى التدريس وأنا عشان عارفة ان مفيش احترام لا من الطلبة ولا الإدارة ولا المنظومة عموما لمدرسى الرسم لكن انا بطور الرسم من مواقع على الانترنت سواء صور رسومات من جوجل او تعليم الرسم من على يوتيوب وبعض الكتب القديمة لولدتى المهم كل قرايبى واصحابى بيقولولى؟
إن رسمى مميز لكن مش مقتنعة لأن لازم رسمى يتعرض على فنانين بجد علشان يقدروا موهبتى.