face 2 face

شريف ومحمود كل واحد فيهم قائد فى مجاله بيخطط وبيدير فريق عمل طموح وحاسس بالمسئولية، بيتفقوا فى الهدف لكن كل واحد فيهم له اتجاه فكرى وسياسى مختلف هيبان فى المواجهة دى.
شريف: مفيش ديمقراطية فى مصر.. والستات لازم تشتغل ..والتعليم الإجبارى واجب
■ عرفنا بنفسك؟
اسمى شريف فاروق، عندى 26 سنة، وصاحب مؤسسة للتسويق الإلكترونى وفنفس الوقت مستشار فى التحكيم الدولى.
■ تعرف إيه عن الديمقراطية؟
حكم الشعب بنفسه لنفسه، المفروض الشعب بيختار نوابه اللى يسنوا القوانين وينظموا أحوال البلد بشكل يحقق العدل لكل فرد فى المجتمع، لكن اللى بيحصل دلوقت بعيد تماماً عن مفهوم الديموقراطية لأن ماينفعش بعدما اختار اللى يمثلنى فى وضع القوانين أقوم أعترض عليه وبالتالى مش هوصل للنتيجة اللى انا اختارته علشانها.
■ أنت شايف إن المرأة فى مجتمعنا واخدة حقها؟
لا، لأن فى مفاهيم غلط بتضيع الحق ده، زى جواز البنت بدرى اللى مابيدهاش الفرصة انها تختار شريك حياتها وتكون مسئولة عن اختيارها، أنا ضد الزواج المبكر للفتيات، واللى المسئول الاول عنه الاهل، اضافى انى مع فكرة تطبيق الكوتة للمرأة مش بس فى المجالس النيابية فى المصالح الحكومية والوظائف بحيث يكون لها حد أدنى ومالهاش حد أقصى يعنى مايتمش تقنينها بمقاعد معينة زى ما كان فى مجلس الشعب قبل الثورة لأن المرأة لازم تكون ممثلة فى كل مكان.
■ إيه هى أهم مواد دستور مصر القادم من وجهة نظرك؟
التعليم الإلزامى المفروض يكون أهم مواد الدستور لأن الحسبة بسيطة.. شعب جاهل هيحدد مصيره إزاي؟، هينهض ببلده إزاي؟، هيخطط وينفذ ويوصل لهدفه إزاي؟، فى عصر كل حسابات وأرقام، وبالتالى لازم كل المصريين يتعلموه خصوصا الاطفال اللى من المفروض يتطبق عليهم عقوبة مشددة وعلى اللى يمنع أطفاله من التعليم.
محمود: ضد تمييز المرأة.. ومش قلقان من الدستور لكنى قلقان من اللى هيطبقوه
■ عرفنا بنفسك؟
محمود الضبع، مدير تحرير موقع إخبارى
■ تعرف إيه عن الديمقراطية ؟
هى حرية التعبير عن الرأى واحترام رأى الأغلبية وده أول مبادئ الديموقراطية، خصوصا لو كانت الأغلبية دى جاية بالممارسة الديمقراطية وهى الانتخابات، اللى جابت القيادات لمواقعهم بوضوح وشفافية.
■ أنت شايف إن المرأة فى مجتمعنا واخدة حقها ؟
يعنى إيه حقوق المرأة؟، هى مواطن زى باقى أفراد الشعب الكلام الكتير عن حقوق المرأة وحقوق الصعايدة وحقوق المعاقين باعتبره تمييز عنصرى يقسم المجتمع لفئات بعضه له حقوق بتيجى على حساب البعض الآخر، والمفروض مواد الدستور توزع الحقوق بين الناس بشكل يتماشى مع التطورات العالمية فالمرأة فى باقى دول العالم مواطن عادى فى الدولة له نفس حقوق وواجبات اى رجل، وحكاية تمييز المراة شىء مرفوض زى مثلا عمل كوتة لها فى مجلس الشعب.. المفروض تدخل الانتخابات وتنافس باقى المرشحين زيها زيى اى حد.
محمود الضبع
■ إيه هى أهم مواد دستور مصر القادم من وجهة نظرك؟
الدستور مبيمثلنيش أنا كفرد، لكنه بيمثل الدولة بكل أفرادها وقطاعاتها وأجهزتها، بيسخر كل ده لخدمتها ونهضتها علشان كده انا مش قلقان من مواد الدستور قد قلقى من اللى هيطبقوه، أنا بحلم بدستور يحقق لي ولأولادى وأهلى والمجتمع اللى عايش فيه العدل وده مش هيحصل لو سيطر فصيل معين على مواده لأنه ممكن يسخرها لمصلحته، ويفصل القوانين على مقاس الحكام، سعيد بفكرة الجدل والخلاف على مواد الدستور لأن دى ظاهرة صحية تضمن أن مفيش حد يقدر يتحكم فى المواد دى تبع مصلحته.