كتبت : نورا محمد ... يركب عربيته بتناكة وكأنه أهم رجل فى الدنيا، ويفضل يلف بيها على البنات ويتمنظر، يعمل نفسه عمو التقيل اللى محدش زيه، وبعدين يقعد على القهوة ويبص للبنت ويعمل نفسه مش واخد باله، وبعد كدة لما البنت من دول تتهبل فى عقلها وتكلمه ميردش، وإن رد يقولها انتى مين، وفكرينى بيكى وكده، وبعد كل ده المفاجأة بقى يطلع باير وكبير في السن ومستصغر نفسه ومضرب عن الجواز، بذمتكم مش حاجة تشل، لا وكمان لما يتقدم لواحدة يقعد يقولها على فكرة أنا رفضت بنات كتير جدا وكلهم كانوا بيتمسكوا بيا، وهيبوسوا التراب اللى بمشى عليه، لكن أنا اخترتك أنتى، وطبعا الإسطوانة المعتاده كلنا حفظينها .. أقولكم سر ده مش واحد أعرفه، ده حال العديد من الشباب اليومين دول، بجد هتلاقى النموذج ده متكرر بشكل كبير وبشكل يرفع الضغط، هما بيعملوا ليه كده فى نفسهم، هما فاكرين نفسهم معاهم بضاعة والبنات جواعة ولا إيه، لازم يفوقوا بقى من الوهم اللى ماسكهم ده، أنا نفسى بس يحسوا بمقامهم شوية، ياللا أهى حاجة من ضمن الحاجات اللي بترفع الضغط اليومين دول، وهم مفيدون جدا لأصحاب الضغط الواطى.