"ما أقدرش أسكت".. السيسي يتحدث عن الفئات الأكثر احتياجًا

قال الرئيس عبدالفتاح السيسي، إن تكلفة بناء وتأهيل 277 قرية ببعض محافظات الجمهورية بلغت 13 مليار جنيه.
وأضاف السيسي خلال فعاليات المؤتمر الأول لمبادرة "حياة كريمة"، باليوم الثاني والأخير للمؤتمر الوطني السابع للشباب، بالعاصمة الإدارية: "اتكلمنا على إننا مش هنسيب القرية بعد ما نرفع كفاءتها، ونوفر فرص تشغيل طبقا لطبيعة كل قرية بقول للناس في مصر 4500 قرية، ليها أكثر من 28 ألف تابع بيت، ودا وضع مصر وطول ما إحنا مش هنقدر نسبق الناس، لازم ننهي المشاكل دي مع بعضنا، الدولة لوحدها ما تقدرش، لازم منظمات المجتمع المدني وتحيا مصر".
وتابع السيسي: "بقول لمنظمات المجتمع المدني، الحجم المطلوب ضخم جدا، ما نقدرش نشوف الناس دي بالحياة اللي هما فيها ونسكت، هل ينفع أعمل مدرسة لعدد سكان أقل من 10 آلاف نسمة، ينفع أعمل دا ولا محتاجين نحل المسألة بشكل تاني؟، مضيفا بالمناسبة: "لو كل الأمور هتتحل إننا نعمل مدرشة علشان نوفر مطالب الناس، وهو مشروع، ولكن علينا أن نفكر بشكل مختلف يتعامل مع المطلوب على وجه الأرض".
وقال السيسي: "وزير التربية والتعليم عنده خريطة للحجم المدارس المطلوب يتعمل في مصر بالكامل، وإحنا مش هنهرب من مواجهة تحدياتنا، علشان نحقق كثافة معينة محتاجين 250 ألف فصل، بتكلفة 125 مليار جنيه للإنشاء فقط، طب التشغيل بكام؟، أطقم التشغيل بكام؟ أنا قولت من خمس سنين عاوز صندوق تحيا مصر يبقى فيه رقم كبير بعيدا عن موازنة الدولة، أقدر استفيد منه، علشان نقدر نحل المسائل دي، وقولت بتمنى يبقى 100 مليار أو 200 مليار جنيه، علشان نحل مسائل مالهاش الأموال اللازمة لتغطيتها.
ووجه الرئيس السيسي حديثه لفريق تقييم القرى: "أما نزلتوا القرى هل من ضمن أعمال التقييم، إن عدد الأبناء يكون فوق طاقة الأب وهو وأسرته في ظروف صعبة، وطالما فوق طاقته، يبقى فوق طاقة الدولة، ويرجع البعض يقول اعملوا إجراءات حازمة فيما يخص النمو السكاني".