فضائية ctv تذبح الإعلاميين بسيف الحياء و باسم الرب أيضا !

أسوأ ما في الدنيا أن تتم سرقتك ، بل سرقة جهدك بسيف الحياء !
هذا ماحدث معي و ربما حدث مع كثيرين منكم مثيله ،سواء كنتم اعلاميين او غير ذلك من المهن
اتصلت بى المعدة و قالت:
- اسمى امل فؤاد
اهلا استاذة امل
- انا من قناة سي تي في ، حضرتك فلان
نعم يا افندم انا
- عايزينك معانا فى برنامج صباح النور
بس انا مش من اللى بيصحوا بدري
- معلهش ما دى قناتك برضه و لازم نخدمها
و ماله ياستى نخدمها
- ها يبقى ميعادنا الساعة 10 هنا فى القناة يعنى العربية هاتيجى تاخدك الساعة 8 و نص او 9 صباحا
قولى يا مسهل بس اصحى بدري
- انشاء الله هاتصحى بدري علشان سي تي في
بس قناتكم بخيلة و لا تقدّر !
- لا طبعا احنا بنقدر الناس
انا باتكلم على جهد الناس انا صنعتى صحفى و انت تاخذين من وقتى اقوم بدري ، و اقدم للقناة خدمة اعلامية فلا يصح ان يكون هذا طوال الوقت بلا مقابل ؟!
- يا استاذ ده كلام برضه ؟! هما اولاد ربنا بيدوروا على مقابل ؟!
و كيف يعيش المذيعون و المعدون فى هذه القناة ؟ هل يكتفون بكونهم ابناء ربنا ؟!
- قول بس و حياتك ها تقف معانا ولا لأ ؟!!
طالما الامر كده ماشي يا استاذة ها اقف معاكم
ها تيجى بقى ؟! ها ؟!
ها آجى يا استاذة امل حاضر
مشكورة القناة ترسل لك سيارة الى بيتك ، ياخذك السائق ، و تعانى الامرين فى شوارع القاهرة الغنية عن الوصف ، لتصل بعد ساعة و نصف او ساعتين حسب الظروف ، على باب القناة يلقيك السائق الى الاسانسير و يقول لك فى غضب غير ظاهر فوق الدور الخامس .. يعنى اتفضل اتنيل ع الخامس !
تطلع سعادتك و تصل الى الخامس و تقف حائرا فين يا تري فين ..تنادى عليك احداهن باعتبارك الغريب الموجود في المبنى كما يبدو من مظهرك و حالة التوهان اللى انت فيها ، تعال اتفضل انا اوديت صاحبة الاستاذة امل اللى اتصلت بك
اهلا بك يا استاذة ..اتفضل يا استاذ
تجلس حتى يحين موعد فقرتك التى جئت من اجلها ..تقوم اوديت بواجب الضيافة تشرب قهوة ولا شاى ولا نسكافيه ؟، تطلب مشروبك و بعدها تدخل الى الاستديو ، تبدا فقرتك مع الست المذيعة ، الست المذيعة لا تركز الا فى لحظات القاء السؤال و بعدها تنصرف عنك لتشير لمن فى البلاتوه فهى تنظر فى اتجاه اخر ، ربما تستمع الى تعليمات المخرج فى الايربيس" ، لكن ليس طوال الوقت ، تكاد تخرج عن شعورك و تنهرها : فيه ايه فيه حاجة و لا ايه ؟ ..ترتبك لا لا ابدا ، تستمر انت فى كلامك الذى تظنه مهما ليجد من يهتم به ، لكن للاسف كان من يستضيفك لاهيا عنك و لكل ظروفه، فعلى اى مستوى فى حوار بين اى اثنين يكون هناك من ينصت او يبدى الاهتمام بما يقوله ضيفه حتى لو بمجرد النظر او الايماء ..لا تنتظر هذا و اعتمد على الله و خلّى حوارك مع الكاميرا .. و احمد الله انها عدت على خير..
لكن لتضع نصب عينيك دائما و لتتذكر هذه العبارة" لن يبتزنى احد بسيف الحياء مرة اخري " حتى لو كانت قناة " سى تى في " .. و معك كل الحق فلست فى حاجة لشهرة او تلميع او حين ستظهر على الشاشة سيزداد عدد رواد عيادتك او متجرك ، انت لست من هؤلاء ابدا كل ما تملك هو مهنتك الاعلامية فلا تبتذلها لا بالمجان او بإلقاء الدرر امام الخنازير ..هكذا قال السيد المسيح ..