- الحقيقة أنت لو قاعد في بيتكم أو مع صحابك على القهوة وقلت أو قلتي: "بشوف أفلام سكس".. يعني "جنسية" هاقولك ماشي.. أنت حر.. أو أنتِ حرة.. لكن تطلعي على التليفزيون وفي برنامج عشان "تتشافي" وتقولي ده.. ممكن يتقال في سيما.. أهو ناس بتروح ل"السيما".. أو في مسرح.. محدش بيجبرك تحش مسرح.. لكن التليفزيون لازم يكون فيه "احترام".. الكلام طبعًا على الممثلة "انتصار".. وليه النهارده؟.. أقولك أنا
- لأن من شوية المحكمة رفضت الدعوى اللي أقامها محامٍ يتهم "انتصار" بالتحريض على الفسق والفجور.. وبررت ده لانتفاء الضرر الشخصي والجنائي على المحامي.. وانتصار قالت إيه ساعة البلاغ ما تقدم.. قالت: "ده قمع حريات وجهل".. يا ستي إحنا عارفين إنه قمع.. بس اتكلمي عن "الجنس" في بيتكم.. مع أصدقائك.. مش في تليفزيون بيروح لملايين.. الحرية مسؤولية.. "مرمطة" أحيانًا!
- وبمناسبة الإعلام والتليفزيون والبرامج.. عجبني إمبارح مداخلة عملها رئيس مباحث الهرم المصاب في التفجير الأخير مع "المتميز" وائل الإبراشي.. كان المقدم محمد أمين واضحًا وصريحًا وجريئًا، وحكى عن تفجير الهرم وهاجم الإعلام.. وقال حقيقة اللي حصل إنهم دخلوا وسيطروا ومسكوا 4 متهمين.. وبعدين الكلب "ريكي" كشف عن عبوة جاهزة للانفجار وبعدها الانفجار حصل.. و"أمين" صحح بعض "اللغط" اللي كان حاصل في اليومين اللي فاتوا.. طب وبعدين.
- الحقيقة كانت الحلقة مميزة ووائل عمل شغل محترم.. ولكن الصبح فوجئت بأن زميلتي وصديقتي الكاتبة الصحفية دعاء سلطان رصدت "تفصيلة" أخرى في الحلقة.. كتبت أن زوجة شهيد في التفجير نفسه دخلت "تليفونيًا" وعرفت نفسها.. ووائل سألها: "وهل جثة زوجك تحولت لأشلاء و تمزقت وتشوهت" أي والله.. والسيدة حاولت أن تتغاضى عن السؤال وقالت ل"وائل": "الصوت وحش ومسمعتش".. وعاود الرجل سؤاله: "وهل تحولت جثة زوجك إلى أشلاء".. طب ليه كده!!.
- وبعيدًا عن ده.. اتكلمنا إمبارح عن "دقن" الملك توت عنخ أمون.. اللي 8 من مسؤولي المتحف المصري لعبوا فيها "البخت".. وكلنا فرحنا إن النيابة الإدارية حولتهم للمحاكمة.. لكن حابب أقول مع احترامي ل"النيابة الإدارية".. إن الإحالة هنا للمحكمة "التأديبية".. يعني أخرتها يطلعوا من القضية ب"لوم" أو خصم كام يوم.. لكن مفيش حبس ولا غرامة ولا يحزنون.. كان لازم يتحاكموا جنائيًا.. عشان "توت" ده ابن مصر وعيب.
- وجبنا سيرة مصر.. نروح على "عيد الشرطة وثورة يناير".. اللي عايز يحتفل بالعيد يحتفل.. واللي عايز يحتفل بالثورة يحتفل.. لكن نائبة في البرلمان من دمياط اسمها غادة.. ومش فاكر باقي اسمها قال: "الدكر ينزل".. طب ليه وأنت مال "...." سيادتك.. أصلًا.. ليه يا غادة كده.. خليكي في دايرتك.. العملية مش هيصة!!
- وعشان الثورة.. اتنشر من شوية إن الشرطة مسكت أمريكي في الجيزة بيحرض المواطنيين على التظاهر في يناير.. والحقيقة ده محصلش.. الأمريكي اسمه "ديفيد".. وجاي تعلم اللغة العربية في معهد بالزمالك.. وراح منطقة شعبية عشان "ينمي" لغته هناك وسألهم عن الأهلي والزمالك.. قوم إيه.. مواطن شريف بلغ الشرطة.. وقالهم بيحرض على "يناير".. والمواطن ده واضح إنه بيشجع "بترول أسيوط".
- وعشان الأهلي والزمالك.. هندخل النهاردة في دوامة "متصدر لا تكلمني".. لكن ده يفكرك باللي قاله لاعب الزمالك أيمن عبدالعزيز، واللي جاب عرض احتراف ل"مصطفى فتحي" في تركيا.. وقال إن رئيس النادي قال: "والله ما يحترف في تركيا إلا بعد اعتذار أردوغان".. يا خبر أسود.. طب وأردوغان ماله.. هو "مصطفى" هيلعب قدام بيت "أوردغان".. ده هيلعب في "جالطة سراي".. ميصحش كده على فكرة.. ميصحش كده.. سيبوا "العيال" دي تحترف.
- وعشان كله ميبقاش ضرب.. ضرب.. ضرب.. قول ورا عمنا "نجم":"مصر يا امّة يا سفينة مهما كان البحر عاتي
فلاحينيك ملاحينيك يزعقوا للريح يواتي
اللي ع الدفة صنايعي واللي ع المجداف زناتي
واللي فوق الصاري كاتب كل ماضي وكل آتي
عقدتين والتالتة تابتة تركبي الموجة العفية
توصلي بر السلامة معجبانية وصبية.. يا بهية
ويعود كلامنا في سلامنا يطوف ع الصحبة حلواني عصفور محني يغني
على الأفراح ومن تاني يرمي الغناوي تقاوي
تبوس الأرض تتحنى تفرح وتطرح وتسرح
وترجع تاني تتغنى اللي بنى مصر كان في الأصل حلواني"