وائل غنيم ل"وائل عباس" : "البلتاجي لازم يتهزأ.. وأمن الدولة لازم يتحل"

عرض برنامج "الصندوق الأسود" الذي يقدمه الكاتب الصحفي عبدالرحيم علي رئيس تحرير موقع "البوابة نيوز" المذاع عبر فضائية "القاهرة والناس" تسريبًا جديدًا يجمع بين فتى جوجل الأول وائل غنيم، ووائل عباس الذي يحرض دائمًا على الجيش والشرطة والدولة المصرية من الخارج، بغرض تنفيذ مخططات خارجية بتقسيم الشرق الأوسط لدويلات وأولها مصر.
جاء في التسريب الآتي:
وائل عباس: إيه يا زعيم بقولك إيه
وائل غنيم: قول
وائل عباس: والنبى عشان أنا بس مؤدب.. ومش عايز أطلع فى تويتر أعمل حاجة.. ومحتاجك أنت تعملها والنبى
وائل غنيم: إيه خير؟
وائل عباس: عايز بس الراجل اللي بيخطف الميكروفون.. شفت انت كلمة البلتاجى الرخم ده اللي كل شويه يخطف الميكروفون من عصام شرف ويقعد يقول حاجات
وائل غنيم: محمد البلتاجى بتاع الإخوان؟
وائل عباس: آه انت مشفتش الفيديو بتاع عصام شرف؟
وائل غنيم: لا والله أنا أصلاً كنت راجع من بيروت إمبارح وتعبان فمشفتش أى حاجة النهارده، أنا لسه فايق من شويه كده
وائل عباس: كلمة جامدة كلمة جامدة (فشخ) بصراحة جامد قوي، كلمة يعنى قذرة كل ما يتكلم دقيقة يقوم خاطف منه الميكروفون (يسقط يسقط أمن الدولة) عايزين نعمل عليه كامبين الراجل اللي بيخطف الميكروفون"
وائل غنيم: آه آه.. يعنى أنا شايف البلتاجى لازم يتهزأ شويه.
وائل عباس: البلتاجى راجل محترم سيبك منه الراجل ده كويس جدًا غير بقية بتوع الإخوان وبعدين يا سيدى م احنا عايزين نِحِل أمن الدولة برضو
وائل غنيم: طيب ما أيوه بس كل شويه يخطف الميكروفون
وائل عباس: معلش معلش خليها عندى أنا ديه
وائل غنيم: انت بقيت مؤدب وله إيه؟ هههههههههه
وائل عباس: البلتاجى تبعى وعلاقتى بيه كويسة وهو راجل محترم يعنى
وائل غنيم: هههههههههههه
وائل عباس: لو كان القرضاوى كنت سبيت له الدين.. القرضاوى أنت عارف لكن البلتاجى راجل محترم يعنى
وائل غنيم: يا عم البلتاجى ده اللي منعنى من الطلوع على المنصة يا عم بس قشطة
وائل عباس: معلش ما همَّ ليهم ناسهم برضو يعنى معلش
وائل غنيم: ام.. ماشى يا خوى يلا يلا
وائل عباس: إيه يا ابنى انت رحت للدكتور وله مروحتش؟
وائل غنيم: رحت رحت.. آه بس هى هتقعد معايا أسبوع كده أو 10 أيام كمان
وائل عباس: آه قالك إيه طيب تشخيص الحالة إيه؟
وائل غنيم: دا مشكلة فى الصدر اسمهااااااااا......
وائل عباس: دا إيه دا عدوى يعنى؟
وائل غنيم: حاجة كده زى الرطوبة فى الصدر خدتها فى أمن الدولة.. أنا رحت على فكرة عملت بلاغ للنائب العام
وائل عباس: ما انت المفروض كنت عملت كده من زمان بدل اللي انت قلته على التليفزيون ومتعذبتش ومتبهدلتش والكلام اللي انت قلته ده
وائل غنيم: مش مشكلة مش مشكلة
وائل عباس: عايزين نركز على مطلب حل أمن الدولة
وائل غنيم: لا أمن الدولة ده لازم (نفشخهم)
وائل عباس: آه لازم نفشخهم
وائل غنيم: ااااه ااااه مهو عشان كده لازم الموضوع يتحل لازم أمن الدولة ده يتحل نهائى وفكك بقى من الناس اللي بتقولك لأ إحنا محتاجينه والإرهاب ومش عارف إيه والكلام الفاضى ده.. لأ لازم يتحل ودي حاجة الناس كلها متفقة عليها.. وهما سامعين دلوقتى
وائل عباس: أكيد.. لأن هما أكيد بيتجسسوا علينا
وائل غنيم: عايزين نراقب برضو الوزير دا رئيس الوزرا الجديد دا هيجيب مين وزرا ما يتسبش لوحده برضك
وائل عباس: لا واضح إن العيال بتوع الائتلاف هما اللي اخترعوا اسمه أصلا الجيش.. ما هما العيال بتوع الائتلاف دول مش نازلنى من زور أصلاً
وائل غنيم: دُول ولاد وسخة.. جنبى واحد منهم آهو
وائل عباس: طيب يعنى أنا مش نازلنى من زور قولهم وائل عباس بيقولكوا بطلوا تعريص بقى وانتو مش فاهمين حاجة خلو الكبار هى اللي تختار
وائل غنيم: لا لا لا لا لا مش هما انتو اختارتوا جبريل قال وزير أوقاف أنا هشخر ليكو لو عملتو كده "محمد جبريل"!.. فى حد مسمى نفسه ائتلاف إسكندرية بيقولك جبريل وزير أوقاف، وكان فى حاجة تانية برضو اختيار ظريف
وائل عباس: لا رئيس وزراء كان اختيار ظريف بصراحة
وائل غنيم: مش أنا راجل معرفوش لسه فمقدرش أحكم عليه لسه لسه بدرى إن أنا أحكم عليه أنا معرفش عنه حاجة بس هو عمومًا كان حزب وطنى يعنى ودي حاجة مش لطيفة قوى يعنى
وائل عباس: ال إيه؟
وائل غنيم: هو كان حزب وطنى
وائل عباس: لا لا لا لا لا مهو أحمد درويش كان حزب وطنى هى الفكرة إن أنت لازم
وائل غنيم: أنا حطيت لك حاجات عن فاروق العقدة عشان انت كنت بتقولى فاروق العقدة طلع نضيف، والكلام ده حطيت لك حاجات على تويتر أبقى خش بص عليها
وائل عباس: هبص عليها دلوقتى يلا.. وخلى الناس تبقى..
وائل غنيم: والعيال بتاعة الائتلاف دي إحنا عايزين نشتغل عليهم شوية عشان ابتدوا هما اللي يقترحوا رئيس الوزرا من غير ما يقولوا لحد
وائل عباس: مهو دا استهبال يعنى
وائل غنيم: عاملين همَّا دلوقتى الثورة بروح أمهم
وائل عباس: أكتب انت كمان اتبرأ منهم وقول الائتلاف بيتصرف من دماغه وده بيضر
وائل غنيم: لا لا بص لمَّا يعملوا غلطة.. همَّا لحد دلوقتى معملوش غلطة بس لو عملوا غلطة هعمل كده
وائل عباس: طبعًا الاقترحات الاستئثار يا ابنى باتخاذ القرار والاستئثار بالقاعدة مع الجيش والاستئثار بالمقترحات ده غلط طبعًا يا وائل.. هو لسه هيغلطوا.. هما قعدوا أصلاً مع عصام شرف بتاع 3 ساعات تقريبًا.. وقعدوا مع عبدالله جول
وائل عباس: اه يعنى....
وائل غنيم: بس عبدالله جول منّا جتلى دعوة للقاعدة معاه وأنا رفضت طيب مبدئيًا يعنى الاستئثار حاجة مش لطيفة خالص يعنى
وائل عباس: اه يا كبير.. بتمثيل الثورة هما دلوقتى اللي بيمثلوا الثورة مفيش حد غيرهم ولمَّا هتيجى تكلم الجيش لو همَّا اقترحوا حاجة غلط على الجيش وتيجى تكلم الجيش، الجيش هيقولك منتوا اللي اقترحتوا هيحصل هيحصل فلازم الموضوع ده يتوقف عند حده
وائل غنيم: ماشى حاضر همَّا هيغلطوا غلطة وهنديهم على دماغهم
وائل عباس: مش عايزين بس تبقى غلطة كبيرة تبقى غلطة بفورة يعنى
وائل غنيم: لا مفيش غلطات بفورة خلاص
وائل عباس: بيتهيألى يعنى....
وائل غنيم: ربنا يستر
وائل عباس: ماشى يا باشا يلا مع السلامة
وائل غنيم: سلام.