- الهجوم اللي حصل النهاردة على فندق الأهرامات الثلاثة وأتوبيس سياحي يقل 40 سائحا من عرب إسرائيل.. لسة متحددش أنه إرهابي أو مش إرهابي.. أيون.. الللي هاجموا حوالي 15 وكانوا في "مسيرة ".. ورخموا ع الشرطة.. والشرطة رخمت.. وحصل ضرب نار وخرطوش وشماريخ.. وآخر اليوم المجموعة دي هتتمسك... بس هقولك حاجة.
- لو الموضوع إرهابي ..إرهابي.. كنت هتشوف آداء تاني خاااااالص.. أي والله.. كنت هتلاقي 2 بس يهاجموا.. واحد راكب موتوسيكل والتاني معاه راكب وراه.. وقتل واحد واتنين و5 من الشرطة والسياح وجريوا.. بس كده .
- وبمناسبة الإرهاب.. وقبل ما تظهر "لا تنسى" دي.. قلنا يوم مقتل 8 سياح مكسيكيين في الصحراء الغربية نصا أن الحادث بالصدفة.. وإن التشابه بين عربية السياح وعربية الإرهابين هو اللي خلى استهداف السياح سهل و"طبيعي".. وعادي كمان.. رغم إن اللي حصل غير مقبول ومعقول.. وساعتها اللي حصل ده أثر ع السياحة وحتى الآن.. ليه بنقول كده .
- أقولك أنا.. لأن الخارجية المكسيكية أخطرت وزارة السياحة المصرية.. إن ما قالته مصر بخصوص مقتل السياح صحيح.. وأن المسؤول عن مقتلهم هو شركة السياحة لأنهم دخلوا مكان محظور.. ومصر لا تتحمل مقتلهم.. طب وهل الكلام ده مهم!! ظني إن التبرئة مهمة.. بس السياحة أضربت واللي كان كان .
- وبمناسبة "هل الكلام ده مهم".. أهو كلام زي الكلام اللي قاله حمدين صباحي في لقائه مع وائل الإبراشي.. الدم في "رابعة حرام" وكل الدم المصري حرام.. والبرادعي عنده ضمير.. وفيه اختفاء قسري على عضلات أمنية على ضمور سياسي على قانون تظاهر على شوية عيش وحرية وعدالة واجتماعية.. قالهم الراجل ب"ثبات" ولغة رصينة وثبات وكده.. طب وده جديد.. وليه طلع وليه دلوقتي !
- أقسم بالله ما اعرف هو طلع ليه ولا عايز ايه.. زي بالضبط محدش عرف ليه اتقطعت الكهرباء في "محيط الإستوديو" ببداية اللقاء.. والانقطاع كان في منطقة دريم بس.. ودريم بعيدة عن مدينة الإنتاج "المكتظة" بقنواتها.. والمعلومة دي للي بيسأل ليه قطع هنا ومقطعش في قنوات تانية وكده .
- وعشان جبنا سيرة قنوات تانية.. فعرض فيديو قيل أنه بيسجل آخر لحظات للنجم الكبير ممدوح عبد العليم بصالة الجيم في نادي الجزيرة يعد جريمة مكتملة الأركان ان كان حقيقي.. لكن خليني أقولك حاجتين مهمين.. اه والله
- الأولى أن الفيديو غير صحيح.. وأن الفيديو ده في صالة جيم هندية حسب ما نشر اليوم السابع من شوية.. والتانية أن غالبيتنا ك"شعب" لا يحترم حرمة الموتى.. سواء فنان أو مواطن عادي.. يعني نشرنا صورة اللي اتحرقوا في قطر الصعيد.. واللي غرقوا في عبارة السلام 98.. والضباط اللي اتقتلوا في كرداسة.. وعرضنا فيديوهات "داعشية".. ونشرنا فيديو وصور للفران الغلبان اللي "اتفرم" يوم تفجير مديرية أمن القاهرة.. يعني لا عندنا "معايير" ولا "قيم" ولا يحزنون.. بس متزعلوش.. وكلنا "مجرمون".. مش اللي سرب ونشر بس .
- طب أفكركم بحاجة.. فاكرين الهجوم على صحيفة "شارلي إبدو"..أيوه اللي كان من سنة..اللي شفناه صور الجثامين في أكياس وهي في طريقها للإسعاف.. والسلام عليكم.. وكمان يا سيدي يوم المجزرة اللي حصلت في فرنسا من شهرين.. واللي نتج عنها مقتل قرابة 130.. حقيقي مشفناش حاجة.. صح مشفناش.. ليه بأه..لأن "النظرة " مختلفة.. والمضير مختلف.. والفكر مختلف .
- وبمناسبة الفكر المختلف.. أنا بحب أي فكرة جديدة.. وأخرها اللي قال النائب أحمد مرتضى منصور في اليوم السابع النهاردة: "احنا نتصالح مع الإخوان.. ونتصالح مع أعضاء الحزب الوطني وأنا هطالب ب ده في البرلمان".. وأنا عندي فكرة أحلى..اننا نصالح السيد "مرتضى" على الناس اللي "بيفرم" فيهم ليل نهار.. وبيقول كلمة جزمة في حوار تلفزيوني أكتر من سلام عليكم.. الأفكار تقبل أو ترفض يا أحمد.. صباحك فل !
- وبمناسبة "الصباح والاصطباحة".. يبدو كده إن الجماعة الموظفين في الحكومة.. واللي بعضهم بياخد "ترامادول وحشيش وبانجو".. أيوه.. مالهم دول.. واضح إن مصيرهم هيكون هو الفصل النهائي من العمل وحرمان من المعاش بسبب قانون الخدمة المدنية اللي "نوه" لده.. طب وده كويس.. أبدًا.. مش كويس.. كده مش هنلاقي موظفين في البلد يا بيه.. أيوه مش هنلاقي .
- والحقيقة عارف إن "البوست" رخم.. ودمه تقيل وعشان كله ميبقاش ضرب.. ضرب.. ضرب.. ممكن نقول: "نشكي ولا ننسى ونبتدي من غير عتاب.. نبكى يبقى لسه في القلوب باقي العذاب.. يلا ننسى ننسى حبنا أكبر وأكبر من اللي كان.. يلا ننسى ننسى حبنا مقدرشي يطويه الزمان.. حبيبى بحبك اه نور عينى بحبك روح قلبى بحبك.. وكفااااااااااااااااااااايه اللي جرى.