أحمد عفيفي يكتب: واحدة واحدة .. كله راجع تاني !!

محدش يستغرب ولا يندهش إذا فوجىء بأسامة سرايا رجع تاني وبقى رئيس تحرير الأهرام .. ورجع تاني للقرف اللي كان كان بيكتبه واللي كان يخلي الواحد عايز " يطرش " ويجيب اللي في بطنه من سنة فاتت ، وهو بيسأل نفسه : معقولة فيه كده .. وترد على رأى أشرف عبد الباقي في مسرحية مش فاكر اسمها ، أيوه فيه كده وكده وكده .. وممكن جدا كمان عن طريق الفوتو شوب العبقرية ، اختراع أسامة افندي سرايا ، نلاقي وائل غنيم مثلا هو قنّاص العيون الشهير رغم إن مفيش أى شبه بينهم ، والواد الملازم أبو نظارة ريبان يطلع ثورجي ومسبش ميدان التحرير من ساعة الثورة ما قامت لحد دلوقتي .. وبرضه جايز ومحتمل نلاقي ست البنات اللي اتعرت طلعت راجل متنكر في صورة ست وفي الحالة دي يبقى مفيش مشكلة .. إيه يعني جروا راجل وقلّعوه هدومه الفوقانية .. كله ده جايز ومتوقع وعن قريب جدا ، والبركة في الفوتو شوب.

وجايز جدا ومحتمل نلاقي ممتاز القط رجع تاني أخبار اليوم ومعاه مخرطة ملوخية محترمة وقاعد يطبخ ويجهز نفسه للطشة اللي محصلتش .. ويرجع تاني محمد على ابراهيم للجمهورية وعبد الله كمال لروزاليوسف واقوى من الأول ... مادام قناة المحور ضمت مؤخرا لفريق العمل تامر افندي أمين عشان يعمل لنا برنامج " تحيا مصر" وهى تعلم علم اليقين انه " قفا " وكان من ضمن المذيعين اللي كانوا " مع .. الرصين " على اعتبار أن مبارك كان الرئيس الرصين والحكيم.. راجع البيه تاني بعين قوية - وعنده حق - يقولك " تحيا مصر" .. لأ .. واللي يغيظك ويفقع مرارتك عمرو الليثي اللي هو المفروض انه ثورجي ، واللي ماكنش عاجبه النظام القديم بكل الاضيشه الوسخين .. وعارف ده مين .. وده مين .. لأ .. سي عمرو الليثي بيقدم تامر أمين ، كما لو أنه بيقدم مثلا حمدي قنديل العائد بعد غيبة ، واللي كان ممنوع من الظهور، وبعد الثورة ما قامت رجع تاني كدليل ناصع على نجاحها وعودة الحق لأصحابه .. يقول عمرو الليثي : عاد تامر أمين الى شاشة التليفزيون مرة أخرى بعد أن كان ممنوعا ومغضوبا عليه بسبب لسانه الفالت ، واللي كان يقول للأعور انت أعور في عينيه ، واللي كان على جثته إن جمال مبارك يبقى رئيس للجمهورية .. وانه قال الكلام ده في عز جبروت النظام .. لاهمه مبارك ولا نظيف ولا العادلي ولا أمن الدولة .. عاد بعد غياب طويل إلينا واليكم تامر أمين ، الإعلامي الكبير المحترم اللي كانت كلمة الحق عنده سيف يقولها ولو كان تمنها رقبته .. عاد إلينا واليكم تامر أمين .. " واحد من الناس " المخلصين الحلوين الطعمين اللي زي العسل ، واللي كان منوّر " البيت بيتك " .. و" مصر النهارده " وبكره وبعده .. لقد تشرفت قناة المحور بضم قامة كبيرة بقدر وقيمة تامر آمين الذي سيكون إضافة كبيرة ومميزة لكل العاملين في القناة .. حيوا معي تامر آمين ابن الثورة المصرية الذي لتوه عائد من المعتقل ، بعد أن دفع ثمن شجاعته وجرأته شهورا ليست أبدا بالقليلة في السجن.

طبعا كل اللي انا قلته ده لم يقله الليثي .. لكن تقديمه لتامر أمين وتحفيزنا لمتابعة برنامجه الجديد على المحور ، لا يمكن أن يقال إلا عن ثورجي نازل من بطن امه رافع علم مصر .. إنما تامر أمين اللي كان واحد من أكبر الزمّارين في التليفزيون المصري .. واللي كان له طلة تخليك تمسك مراتك وتضربها علقة محترمة من غير ماتكون عملت لك اى حاجة .. وتسألك هو فيه إيه .. فترد : انت مش شايفة مين اللي على الشاشة .. انا لما بشوف الافندي ده بيركبني ميت عفريت... بقى تمورة الأمورة جي دلوقتي يقول " تحيا مصر" .. يا أخي اختشي على دمك .. صحيح ان لم تستح فافعل ماشئت .. نعم .. بتقول إيه.. اشمعنى انت؟ .. صحيح عندك حق .. اشمعنى انت صحيح .. ماصاحبك خيري افندي رمضان في السي بي سي وبياخد أد كده ، ولا من شاف ولا من دري .. وكان فعل ماضي ، واحنا ولاد النهارده .. حتفضلوا - والكلام لعم خيري - ماسكين عليا حكاية خالد سعيد وانه كان صايع ورجال الشرطة الشرفاء قبضوا عليه فبلع لفافة البانجو .. انسوا بقى ما انا دلوقتي حلوة وزي القشطة ومؤدبة .. عندك حق يا تمورة .. اشمعنى انت صحيح .. ما الست هانم لميس الحديدي ولا كأنها عملت حاجة تنكسف منها .. بجاحة عجيبة تستحق عليها الأوسكار .. ماشية وزي الفل هى كمان وبتقبض بالدولار .. ولا عماد اديب ولا سيد على .. هما كل دول ولاد البطة البيضا وانا بس ابن البطة السودا .. طب إيه رأيكم بقى انا حاكلم حسن بيه راتب يرجع هناء السمري ويرد لها اعتبارها كمان ويعوضها عن السنة والخمسة اشهر اللي فاتوا اللي قعدت فيهم في بيتها .. الحق حق وميزعلش حد .. انا كنت فل من الفلول .. أوكيه .. لكن مش لوحدي .. اذا كان كل الفلول بقوا أحسن من الأول .. اللي كان بياخد 100 .. بقى ياخد مليون .. وكله بينسى ، الا ابن الكلب اللي اسمه احمد عفيفي اللي قاعد يكتب في المقال دلوقتي .. ياعم ارحمني واتوكل على الله وانا أكلم لك حسن بيه راتب يشوفك بحاجة كده ولا كده .. وسيبك م الثورة والكلام الفارغ ده .. انت لسه مصدق ان كان فيه ثورة .. كله دلوقتي يا حبيبي بيدّور على مصلحته .. واللي يتجوز أمي اقول له يا عمي .. وبحبك يا ستاموني مهما الناس لاموني.

ارحمني بقى يا عفيفي من رخامة أمك .. أنا واحد من ضمن كتير .. التطبيل عندنا مزاج .. زي لامؤاخذة " ... " يقدر يستغنى عن صاحبه ؟ .. استحالة.. متقليش ممكن لأنك مجربتش .. ده داء يا ابني .. ربنا يعفيك منه .. اسأل مجرب ولا تسأل طبيب ومتحرقش النار غير اللي كابشها .. المهم اطلع من نافوخي ، وانا عندي القدرة إني أشغلك في المحور وبراتب خيالي .. بلا كويت بلا ديالو .. يا راجل ارجع بقى .. ده هنا الرواتب بالهبل .. بس شرط تفتّح مخك وتنسى الثورة والكلام العبيط ده .. اعمل نفسك انك مع الثورة.. كده وكده يعني .. واذا حد قابلك في اى كافيه وانت " بتشيّش " قول " بقين " حلوين في حق مصر .. لو ربنا بيحبك يكون اللي بيسمعوك اغبياء مغيبين ، ولو غضبان عليك - وده الارجح - الكل " حيتف في وشك " ويسمّعوك من المنقي ياخيار .. اخوك جرب وواخد على كده .. بس صدقني كله بينسى والدنيا تلاهي ، والناس مش لاقية لقمة العيش ، واحنا قاعدين نقبض ونعبّي في زكايب .. قصاد حاجة واحدة بس .. انك تكون بتعرف تتلّون وتبقى مع الرايجة .. النهارده مع الإخوان وبكره مع العسكري .. بس اوعى تقل عقلك وتمشي ورا الثوار .. دي بالذات - واسمع من اخوك - مش مطلوبة دلوقتي خالص .. دمها تقيل على قلب ناس كتير .. فحاول تنسي وخد البنسة ، وشوف مصلحتك فين وامشي وراها.

خدها مني نصيحة .. انا اصغر منك أه .. بس مجرب .. وانت سكتك كده مش خضرا ، والإشارة عندك حمرا على طول .. زمن البطولات راح خلاص ودلوقتي زمن " أبجني .. تجدني " .. نصيحة مني لوجه الله .. لا ابراهيم عيسى حينفعك ولا ابراهيم منصور .. دول عايشين في وهم كبيييير .. وزي ما حصل في الدستور حيحصل في التحرير .. واحد برضه زي البدوي حيشتريها ويطيّرهم ومعاهم البت " اللمضة " نوارة نجم وابو لسان طويل اللي اسمه محمد فتحي .. اشتري دماغك يا ابن الحلال وشوف مصلحتك يا سيد .. وعقلك في راسك .. تعرف خلاصك!!