بعد ما كلم مامتي ورفضنا عرسان عشانه.. سمع كلام باباه وباعني

السلام عليكم.. أنا بنت عندي 19 سنة، ومن زمان وأنا مقررة إني مش هاحب غير لما يكون فيه ارتباط رسمي، ولما كنت في أولى كلية أعجبت بواحد وهو حبني جدًّا وأصحابي أقنعوني بيه، وفعلا ارتبطنا ببعض ولكن في حدود الكلية ومش بنخرج، ودايمًا بنفكر في ربنا وماكناش بنعمل أي حاجة غلط، وكلم ماما، وماما قالت له: هترفض أي حد يتقدم لي لحد سنة 3 وهو وافق.
عيلتي عرفت بالارتباط ده ورفضوه جدا، وماما وقفت معانا برضه؛ حتى إنها رفضت واحد كان متقدم لي من غير ما تشوفه؛ بس لما لقت ناس كتير غلّطوها قالت لي: لازم تتأكدي منه هيجي يتقدم إمتى، كمان هو ممكن يتقدم من دلوقتي؛ لأن شغله مضمون مع باباه وظروفه المادية كويسة جدا، ولما ماما طلبت منه يشوف رأي أهله -مع العلم إن مامته عرفاني كويس وبتحبني- باباه رفض أي ارتباط وهو في الكلية؛ مع إنه كان مفهمني في الأول إن مافيش اعتراض عنده في البيت.. ومن هنا ماما اعترضت، وطلبت إني أنهي الموضوع، ووصلْت معاها إني أقلل بس الكلام، ونتطمن على بعض بالرسائل وكده، وأي عريس هيجي هاضطر أشوفه عشان ماما.. ومن هنا بدأ عدم الاهتمام، وبيقول لي إني كده خليته استبن!!
هو اعتبر اللي ماما كانت هتعمله عشانه بإنها ترفض أي عريس ده حق مكتسب له، وإن ده هو اللي مفروض يحصل.
وكمان هو سلبي أوي؛ يعني بمجرد إن باباه قال: لا ماينفعش.. سكت وقال لي: معلش أنا اقتنعت بكلام بابا.
وقررنا نرجع أصحاب؛ لأنه كان من أقرب أصحابي؛ بس هو بقى بيبعد وبيعاملني وحش وبيتجاهلني.. وأنا حاولت أبقى على الصداقة اللي كانت بينّا؛ بس برضه هو بيبعد.. وأنا ماينفعش ماتعاملش معاه لأن أصحابنا هيحسّوا بتغيّر، ومعظمهم مايعرفش الموضوع خالص.
إزاي نسيني بالسرعة دي؛ مع إنه محترم وماكانش بيتسلى؟ أنا بحبه أوي، ومش قادرة أنساه، وخايفة أنساه يرجع لي تاني.. أنا مش عارفة أعمل إيه؟؟

m.m


لو عايز تفضفض لنا دوس هنا