مجدي يعقوب: أجرينا عمليات قلب غير موجودة بالعالم.. وأدهشنا الأمريكان

قال الدكتور مجدي يعقوب، جراح القلب العالمي، إن مركز أسوان لعلاج القلب يتم به عمليات جديدة غير موجودة في العالم، "مش زي اللي كنا بنشوفها في أمريكا أو إنجلترا، بل عمليات أكثر ومختلفة شوية، بنعمل عمليات جديدة عشان تخدم الناس، عمليات إحنا ابتكرناها، سواء نبتكر حاجات جديدة أو فيه حاجة موجودة في أوروبا وبنطورها".
وأضاف "يعقوب"، خلال حواره في برنامج "معكم"، مع الإعلامية منى الشاذلي، على شاشة "cbc"، أن الأطباء في أمريكا ودول أوروبا عندما يأتون لزيارات لمركز جراحات القلب في أسوان ينبهرون من أداء الأطباء المصريين، "بيشوفوا حاجة مش معقولة"، مؤكدًا في الوقت ذاته أن التمريض في مصر كان مظلومًا للغاية في الفترة الماضية ولم يحصلوا على حقوقهم.
وتابع: "مش عاوز أقول إن الناس كانت تحتقر الممرضين والممرضات عشان الكلمة دي صعبة، بس مش عارفين أهميتهم زي الناس اللي في الدول الأخرى تعرف أهمية ذلك، وكمان الممرضين في مصر كانوا يلامون على أشياء لم يعملوها"، موضحًا أنه منذ اليوم الأول لبناء مركز أسوان لجراحات القلب كان الممرضات والممرضين يمرون مع الأطباء للكشف عن المرضى.
وواصل: "بنسأل الممرضين والممرضات إيه رأيهم ودي حاجة مهمة جدًا، لازم نديهم حقوقهم وبالفعل تجربة المركز بتاع أسوان في التعامل مع الممرضين كانت هائلة جدا، لو فيه حاجة عاوزين يشوفوها بره مصر نبعتهم أسبوع أو أسبوعين ويرجعوا تاني، وبنعتبر ده جائزة، بيرجعوا عندهم عزيمة وبيشتغلوا بكل جهد من أجل خدمة المرضى".
وأردف: "كنت بنام في المستشفى بسبب ضغط العمل، فبشوف الممرضات والممرضين بيعملوا شغل هائل جدا، كنت برتب مع الممرض إنه يصحيني كل ساعة عشان يقولي حالة المريض وصلت لفين، لأني مكنتش عارف أكون جنب المريض طول الوقت، والحالة بتاعة المرضى بتتغير من وقت لآخر، والممرض قام بالدور على أكمل وجه".