حديث المدينة

مفيد فوزي: اثيوبيا 80 مليون نسمة ولا تشعر إطلاقا بكثافة سكانية في المتر المربع بل ال 80 مليون عل الأرض في كل مكان، هؤلاء ال 80 مليون يخدمهم حوالي 2000 طبيب، شوفوا النسبة اد ايه، منهم 1000 دكتور سابوا الحكومة كالعادة زي ما بيحصل في مصر علما بأن هؤلاء ال 1000 دول مؤثرين وعندهم كفاءة، من هنا ولسد هذا النقص جاءت قوافل الصحة المصرية، اقدر اقول انه قدر مصر أن الكفاءة المصرية تذهب لأي مكان، في العالم الأول هناك كفاءات، في ألمانيا مثلا الراجل اللي عملهم الأنفاق وعمل حاجات خطيرة جدا مهندس مصري لأنه وجد المناخ، المناخ مش معناه الجو انما المناخ العلمي اللي ساعده، القوافل الصحية المصرية ليست فقط لهذا البلد،مش لأثيوبيا بس ده لأفريقيا كلها، يمكن القول أن القوافل المصرية من الأطباء المصريين عملوا حوالي 515 عملية جراحية حتى الآن، على فكرة معظم الدكاترة اللي بيسافروا دول جراحين، أيضا في مشكلة في هذا البلد اللي هي مكافحة العدوى جه دكاترة مصريين هنا يحاضرون في ندوات وداخل مشتشفيات في مكافحة العدوى،هي برده مكافأة أنك تكافئ شعب أنك تعلمه ازاي يكافح العدوى، معرفش اذا كنت غلطان في كلمة" يعلمه" لكن هي حقيقة لن الطب مفهوش هزار الطب بيعلم، هذا المكان اللي هي القوافل دي لها مكانة في قلب الأثيوبيين وهذه هي الحكاية...
فاصل
مفيد فوزي: د. وائل الحلواني منين نبتدي الحكاية على حد قول الغنوة، من الفكرة
د.وائل: الفكرة جت في شهر أكتوبر 2009 ، وصل جواب للوزير الدكتور حاتم الجبلي من الوزيرة فايزة أبو النجا أن وزير الصحة في أثيوبيا يطلب القوافل الطبية المصرية
مفيد فوزي: فايزة ابو النجا اتصور ان لها مكان مهم اوي على الخريطة الأفريقية
د.وائل: جدا انا حضرت معاها هنا مرة لجنة ، لو تشوف مدى التعامل معاها كأنها واحدة أثيوبية مسمينها" أديس جيرل" التفاعل معاها قوي أوي واعتقد ده مش من فراغ من حبها لشغلها والثقة اللي هما مدينها لها
مفيد فوزي: بدأت الفكرة
د.وائل: بدأت الفكرة كنا عندنا مؤتمر في شرم الشيخ وصل الجواب للدكتور حاتم قبل المؤتمر ب 3 أيام ، جالي جواب لازم تروح خلال أسبوع، كان وقتها في المؤتمر وفي 3 أيام وبعدها العيد قالي تطلع من مطار شرم الشيخ
مفيد فوزي: خدت معاك كام واحد
د.وائل: لأ لوحدي
مفيد فوزي: انت رحت عشان تشوف الواقع عايز ايه ورجعت مصر
د.وائل: عملنا أول قافلة في 25 ديسمبر السنة اللي فاتت
مفيد فوزي: كم قافلة لحد الآن
د.وائل: 6
مفيد فوزي: هل بتروح أثيوبيا بس ولا دول أفريقيا
د.وائل: لأ احنا شغالين في دول أفريقيا، في أثيوبيا وفي السودان في الجنوب و"دارفور " وفي بوروندي وموريتانيا وفي كل الدول، في تحضيرات كاملة، أنا زرت جميع دول حوض النيل
مفيد فوزي: وفدك غالبا كام طبيب
د.وائل: حسب الاحتياج
مفيد فوزي: هنا مثلا في اديس ابابا انت معاك 11 طبيب و2 تخدير ومهندس
د.وائل: و2 مهندسين
مفيد فوزي: 2 مهندسين متخصصين في الهندسة الطبية
د.وائل: وعندي برده في نفس الوقت غير العدد الكبير ده 4 أطباء ، 3 جراحين وواحد تخدير و2 مهندسين
مفيد فوزي: سؤال هل تأتي بدواء
د.وائل: لا
مفيد فوزي: هل تأتي بأجهزة طبية
د.وائل: حصل اننا جبنا حضانتين هدية لمستشفي هنا في اديس ابابا هما موجودين في المخازن لأن هما بيجددوا في المبني وحيخلص انشاء الله بعد شهر ، يعني المرة الجاية هنشغله
مفيد فوزي: من الداعي لهؤلاء الأطباء
د.وائل: وزارة الصحة الأثيوبية
مفيد فوزي: يعني دول بيقيموا على نفقة وزارة الصحة الأثيوبية، كم يوم بتبقى البعثة
د.وائل: أسبوع
مفيد فوزي: ايه معايير اختيار الدكاترة
د.وائل: راجل بيحب بلده،جاي يضحي بوقته ويشتغل هنا وكفاءة طبية وعلمية
مفيد فوزي: بتختاره ازاي
د.وائل: توفيق من عند ربنا
مفيد فوزي: لكن ممكن دكاترة تانيين يقولوا اشمعنى
د.وائل: احنا بنشوف كفاءته وسمعته في مكان عمله ومؤهلاته السيرة الذاتية والمظهر برده
مفيد فوزي: استشاري التخدير د. ممدوح عبد العزيز، انا شايف المستشفى شديدة التواضع
د. ممدوح: دي خامس مرة نييجي هنا ، هو المستشفى طبعا امكانياته متواضعة إنما الحقيقة هما ناس منظمين وبيحاولوا يأقلموا نفسهم حسب الامكانيات اللي عندهم، احنا هنا بنعمل عمليات جراحية عامة معظمها حالات غدة درقية أو أورام ثدي أو قولون أو فتئ، هما هنا بيعملوا عمليات عظام وجراحة عامة
مفيد فوزي: يعني الوفد المصري ايه نوع العمليات اللي بيعملها
د. ممدوح: هي معظمها عمليات أورام أو غدة درقية أو مرارة و حالات شرجية هما هنا ميقدروش يعملوها
مفيد فوزي: هو هنا في اثيوبيا في كلية طب
د. ممدوح: في بس هما عددهم قليل
مفيد فوزي: انا عرفت ان هما 2000 طبيب بيخدموا 80 مليون
د. ممدوح: معظمهم بيشتغلوا في حتت معينة
مفيد فوزي: انا اعرف ان في 1000 طبيب اثيوبي بيشتغلوا في مستشفيات خاصة ودول الأكثر كفاءة
د. ممدوح: احنا معانا هنا في المستشفي 2 جراحين واحد أخصائي وواحد مقيم
مفيد فوزي: اللي هما أساسا من البلد
د. ممدوح: آه واحد جراح أخصائي وطبيب مقيم
مفيد فوزي: حضرتك سايب بيتك ، عندك ولاد
د. ممدوح: لي 3 أطفال وزوجتي
مفيد فوزي: سايب الدنيا دي كلها وجاي
د. ممدوح: والله احنا جايين نخدم الناس هنا، هما ناس طيبين جدا، هنا ممكن الانتظار بتاع العمليات ياخد شهور لأن زي ما قلت لحضرتك عدد الأطباء قليل جدا في كل مستشفى فاحنا بنييجي نساعدهم
مفيد فوزي: بتقعد اد ايه
د. ممدوح: 8 أيام بنعمل فيهم يعني عمليات كل يوم من 10 ل 15 حالة
مفيد فوزي: هل غرفة العمليات معدة؟ يعني تقدر تقول عليها معدة طبيا بشكل لائق
د. ممدوح: بالنسبة لنا مقبول فاحنا بنحاول نؤقلم نفسنا حسب الامكانيات الموجودة
مفيد فوزي: في مثل صيني يقول بدل أن تعطيني سمكة علمني الصيد، فأنت أدبيا مش حتفضل طول عمرك تعمل بعثات، فهل في خطة انك تنمى مهارة الطبيب الأثيوبي بحيث انه يقدر يشتغل جوه المستشفى الأثيوبي
د.وائل: طبعا دي أولويتنا وعشان كده من أول ما جينا عملنا تدريب قصير المدى لرئيس قسم الجراحة وجه مصر قعد أسبوعين يتدرب
مفيد فوزي: الأثيوبي
د.وائل: آه جه مصر تدرب على جراحة الجهاز الهضمي في دار الشفا ومدينة نصر ومستشفى الدمرداش وهو دلوقت من الناس اللي بيشتغلوا معانا
مفيد فوزي: هل رجع بلده وبيشتغل في الجهاز الهضمي
د.وائل: آه طبعا وما شاء الله كويس وده تدريب قصير، في عندنا تدريب طويل في فبراير
مفيد فوزي: فبراير 2011
د.وائل: في 4 جراحين هيتدربوا على جراحة القلب والصدر لمدة 4 سنين في برنامج الزمالة المصرية
مفيد فوزي: دول من هنا
د.وائل: من اديس ابابا هما مرشحاهم وزارة الصحة بس هما من جامعة اديس ابابا
مفيد فوزي: يعني وزارة الصحة الاثيوبية مرشحاهم انهم يقيموا في مصر اد ايه
د.وائل: 4 أو 5 سنوات
مفيد فوزي: يتعلموا أصول الجراحة
د.وائل: جراحة قلب وصدر
مفيد فوزي: ثم يعودوا
د.وائل: آه ييجوا هنا يعملوا السنتر بتاعهم
مفيد فوزي: السنتر اللي احنا فيه حاليا ده ايه
د.وائل: ده مستشفى " ألرت" ده الترينينج سنتر بناه السويديين أوائل القرن الماضي
مفيد فوزي: ليه بنوها ليه
د.وائل: تعاون
مفيد فوزي: دي صدر وجذام افتكر
د.وائل: صدر وجذام
مفيد فوزي: الجذام هنا منتشر
د.وائل: لا مش كتير لكن الصدر منتشر
مفيد فوزي: ليه
د.وائل: اعتقد ارتفاع اديس ابابا عن سطح البحر ونقص الأكسجين بيزود، بس أنا مش متخصص اني أقول ايه السبب الرئيسي
مفيد فوزي: انما انت بتقولي ادايه تسجيل الجراحة في المستشفي
د.وائل: بمعدل 2000 في كل مستشفى ،ممكن يقل شوية، انما هو قدر الانتظار كبير في الجراحة
مفيد فوزي: بتعملوا ايه
د.وائل: احنا بناخد الأقدم
مفيد فوزي: دكتور وائل هل القافلة دي فقط من مصر
د.وائل: لا احنا في مرة بنييجي نلاقي دكتور من هولندا
مفيد فوزي: لكن مش وفد مش زيك
د.وائل: لأ ما يجيش في اكتر من مستشفى ومش بالقوة دي وفعلا احنا مرة لقينا واحد أنف وأذن كان من ألمانيا وبيبعتلهم مساعدات يعني الراجل مهتم بالمستشفى انما مبيجيش حد فريق كامل
مفيد فوزي: لكن دولة لدولة ، مصر وييجي الفريق كامل ويقيم فترة يعمل عمليات، انا قلت المعلومة بسمعرفش صح ولا لأ، انه في 515 عملية عملتوها على مدى اد ايه
د.وائل: على مدى ال 5 قوافل السابقة لحد أكتوبر الماضي، المرة دي لحد امبارح 47
مفيد فوزي: د. علاء الدين أحمد حضرتك طبعا سايب بيتك في مصر
د. علاء: طبعا سايب بيتي وولادي وطبعا شغلنا اللي هناك
مفيد فوزي: حضرتك متخصص في ايه
د. علاء: استشاري جراحة عامة
مفيد فوزي: لو حبيت تقيم الأجهزة الموجودة في المستشفى هنا تقول ايه
د. علاء: هي الأجهزة الموجودة هنا معقولة بس مفيش مقارنة بينها وبين الموجودة في مصر، طبعا في حاجات كتير أوي مش موجودة هنا
مفيد فوزي: هل هنا في غرفة رعاية مركزة
د. علاء: والله احنا جينا هنا ملقيناش غرفة رعاية مركزة
مفيد فوزي: امال المريض بيستنى بعد العملية ازاي
د. علاء: في غرفة افاقة موجودة، بعد العمليات بنطمن على العيان ودكتور التخدير بيتطمن عليه وبعد كده يطلع العنبر بتاعه
مفيد فوزي: د. علاء انتوا هبة من السماء لهذا المجتمع
د. علاء: والله المكان ده عايز من زمان أوي ان احنا نساعدهم
مفيد فوزي: حضرتك عندك المام بالدول الأفريقية المحيطة بهذا البلد هل في أطباء بييجوا هنا
د. علاء: ما شفتش أطباء هنا غير المصريين الموجودين، القوافل الطبية دي من وقت طويل، انا أول مرة آجى القافلة الطبية بتاعة أثيوبيا
مفيد فوزي: ايه انطباعك
د. علاء: انطباعي ان الناس دي عايزة حاجات كتير أوي
مفيد فوزي: زي ايه
د. علاء: عايزة تدريب عالي ، آلات حديثة، مثلا في أنواع من الجراحات محتاجة مناظير مش موجودة هنا، مثلا في حالات أورام موجوة احنا مشفنهاش بس سمعنا عنها
مفيد فوزي: زي ايه
د. علاء: أورام الثدي والقولون
مفيد فوزي: معروفة دي في الدنيا
د. علاء: معروفة بس احنا حبينا نشوفها ونشتغلها
مفيد فوزي: في عدد كبير عندهم الأورام دي
د. علاء: أنا مشفتش، قالوا في مركز أورام بيتحولوا عليه، بس احنا قلنالهم احنا مستعدين نعمل الحاجات دي كلها
مفيد فوزي: انتوا بتعملوا في المستشفى ده بس
د. علاء: لأ في كذا مستشفى ، الدكتور وائل موزعنا عليهم
مفيد فوزي: حاسألك سؤال حوالين التمريض، التمريض ايه هنا في أثيوبيا
د. علاء: ممتاز
مفيد فوزي: غريبة ! ده رأيك، انت استشعرت ده في التعامل
د. علاء: طبعا، ممتاز يا ريت عندنا في مصر كد
مفيد فوزي: انا سعيد اني اسمع منك الكلام ده ، امتيازه في ايه
د. علاء: بيسمع مننا الأوردر بتاعنا ولو محتاجين حاجة ومطيعين وبعدين فاهمين شغلهم، في الجراحة بالذات العين بتبقى مهمة أوي مع النيرسنج بتاع العمليات، تمريض العمليات مختلف عن تمريض العنابر، تمريض العمليات الجراح بيبقى محتاج ايه إن الخطوة الجاية محتاجة ايه،
مفيد فوزي: فالعملية بالعين
د. علاء: تلاقيها هي مجهزة الآلات فانا أول ما أطلب حاجة ألاقيها على طول جاهزة، الجراحة لغة، مش لازم تكون تعرف لغة انجليزية
مفيد فوزي: ده اللي كنت عايز أوصل له أنه لغة العين في الجراحة مهمة جدا
د. علاء: مهمة جدا ، في بعض الجراحين ممكن يبقى في حد بيساعدني، مش هاتكلم هنا لأنه اتفاجئنا إن المساعدين هنا مش دكاترة
مفيد فوزي: في المستشفى هنا
د. علاء: لأ تقريبا في أثيوبيا معظم اللي بيساعدني التمريض
مفيد فوزي: لكن عموما لازم يبقى في مساعد طبيب
د. علاء: آه المفروض طبعا
مفيد فوزي: حضرتك أول مرة تيجي هنا، ايه الانطباع اللي واخده
د. علاء: من البلد كبلد
مفيد فوزي: آه
د. علاء: والله احنا أول ما جينا على نزلنا الشغل على طول، بس أنا لاحظت حاجة هنا غريبة جدا أنه مفيش دبان ، يعني في نضافة رغم أنهم فقرا ومفيش زبالة في الشوارع ، رغم أنهم فقرا فدي حاجة لاحظتها غريبة، رغم الفقر رغم العشش الصاج مفيش دبان!
مفيد فوزي: أود أن أسألك كممرضة أثيوبية بالنسبة للدعم المصري فيما يتعلق بالعمليات الطبية
ممرضة أثيوبية: إنهم رائعون للغاية قدموا لنا الكثير من المساعدة ونحن كان لدينا عدد كبير من المرضى ولكن الآن العدد زاد بسبب مساعدتهم لنا
مفيد فوزي: سألت الطبيب المصري وقال لي أن الممرضات هنا في إثيوبيا مستواهم عالي جدا
ممرضة أثيوبية: هذا شيء جيد
مفيد فوزي: هل تشعرين بذلك
ممرضة أثيوبية: نعم
مفيد فوزي: ماذا عن هذا الدعم الذي يقدم للأثيوبيين
ممرضة أثيوبية: رائع وأتمنى أن يستمر هذا، سيكون شيئا جيدا
مفيد فوزي: هل زرت القاهرة قبل ذلك
ممرضة أثيوبية: إذا كنت استطيع
مفيد فوزي: هل تودين ذلك أن تزوري مصر
ممرضة أثيوبية: نعم
فاصل
مفيد فوزي: أريد أن أسألك سؤالا واحدا كمواطنة أثيوبية، ماهو مفهومك عن مصر وانطباعك عن مصر
مواطنة أثيوبية: إنها دولة لها تاريخ كبير وهي مهد الحضارات وكذلك هي دولة جوار لنا، نحن نتشارك في كثير من الأمور
مفيد فوزي: مثل
مواطنة أثيوبية: النيل
مفيد فوزي: والكنيسة
مواطنة أثيوبية: نعم نحن أرثوذوكس
مفيد فوزي: هل ترغبين في الزواج من شاب مصري
مواطنة أثيوبية: لا أعتقد لأني بالفعل متزوجة
مفيد فوزي: تبدين صغيرة، هل لديك أطفال
مواطنة أثيوبية: نعم وأنا حامل
مفيد فوزي: هل هو طفل أم طفلة
مواطنة أثيوبية: طفلة
مفيد فوزي: تخصصك ايه يا دكتور وائل
د.وائل: نسا وولادة
مفيد فوزي: بيقولولي هنا إن الولادة سهلة، كلمني عن تخصصك بأه، وقيل لي إن الولادة سهلة بسبب أن الحوض للمرأة الأثيوبية بيساهم في ده، الكلام ده كلام علمي ولا كلام مصاطب
د.وائل: كلام علمي
مفيد فوزي: الحوض ده بيلعب دور مهم
د.وائل: هو عامة نسبة الولادة القيصرية في المستشفيات اللي احنا شغالين فيها مش عالية وده يقول لنا إن الولادة بتحصل أسهل
مفيد فوزي: امبارح كنت باكلم بنت وفي وسط الكلام قالت لي إنها أم وحامل، بطنها صغيرة يعني الحمل مش واضح أوي
د.وائل: المواليد عندهم هنا وزنهم مش كبير
مفيد فوزي: أد ايه تقريبا
د.وائل: من 2.5 ل 3
مفيد فوزي: وفي مصر اد ايه
د.وائل: لحد 3.5
مفيد فوزي: ليه هنا البيبي صغير
د.وائل: أجسام الأثيوبيين صغيرة والغذا مش عالي قوي ومش كل الحوامل حيتحصلوا على فيتامينات تساعدهم في الحمل غير انهم بيتجوزوا بدري ، ده كله يدينا وزن أقل
مفيد فوزي: وبالتالي ولادة أسهل
د.وائل: آه
مفيد فوزي: هل هنا الناس محتاجة دكاترة نسا
د.وائل: احنا جبنا في أول مرتين حسب طلبهم أطباء نسا وبعد كده قالك احنا عندنا الأولوية في الجراحة، قائمة الانتظار في النسا والولادة عندهم من 100 ل 150 حالة، في الجراحة 2000
مفيد فوزي: ازاي يعني
د.وائل: الانتظار في النسا الحالات المسجلة في المستشفيات 150 حالة
مفيد فوزي: ما هي حتولد حتولد
د.وائل: لأ احنا مبناخدش حالات الطوارئ، الولادة دي طوارئ، الحالات اللي بتسجل عمليات هي الحالات الباردة زي تضخم في الرحم ،زي ورم ليفي، زي سرطان
مفيد فوزي: يعني هي حالات جراحية في السيدات لكن الأولوية عندك في الجراحة
مفيد فوزي: طبعا سايب عيلتك وجاي، عيلتك عبارة عن ايه
د. طارق يوسف: مراتي وولد وبنت
مفيد فوزي: مراتك بتشتغل
د.طارق : مراتي مدرس في الجامعة
مفيد فوزي: زميلتك
د.طارق : آه زميلتي
مفيد فوزي: وعندك ولاد اد ايه
د.طارق : أحمد وجودي
مفيد فوزي: جودي عندها كام سنة
د.طارق : 3 سنين ونص
مفيد فوزي: اسم جودي ده اسم جميل، ليه اخترته، اصل انا ليا ناس اصحابي اختاروا الاسم ده واستغربت ايه الحكمة في جودي
د.طارق : هو اللي اختارته مراتي، على أساس اسم موجود في القرآن واسم دلع برده
مفيد فوزي: موجود في القرآن، ازاي
د.طارق : آه" واستوت على الجودي" ، اللي هي سفينة سيدنا نوح استوت على الجودي ده اسم جبل موجود في القرآن
مفيد فوزي: اقولك على حاجة انت عندك 3 سنين جودي ما تقعد في مصر، ايه اللي يجيبك هنا وتخضع ليه للدكتور وائل الحلواني
د.طارق : والله حضرتك انا بحب آجي هنا، دي رابع مرة، انا باستريح في الشغل والناس هنا طيبين جدا ويستحقوا ان الواحد يقدم لهم الخدمة دي،انا باحس اني باعمل عمل مهم لبلدي وللجانب الأثيوبي برده فعشان كده مبسوط وباحب آجي هنا
مفيد فوزي: اذن الطيبة بتاعة الشعب هي اللي شدتك
د.طارق : آه هو شعب طيب جدا
مفيد فوزي: ايه العمليات اللي انت عملتها
د.طارق : والله أغلب العمليات هما عندهم تضخم الغدة الرقية منتشر والتهاب المرارة
مفيد فوزي: بتعمل ايه في العملية دي
د.طارق : بنفتح في الرقبة
مفيد فوزي: اد ايه الفتحة
د.طارق : على حسب حجم الغدة بس بتبقى في حدود 6 الى 8 سم
مفيد فوزي: ودي بتكبر واللا ايه
د.طارق : الغدة الدرقية بتتضخم وهما عندهم ده منتشر لأن الملح ما بيضيفوش له يود
مفيد فوزي: أمال الغدة الدرقية في مصر سببها ايه
د.طارق : هي مش كتير أوي وبتبقى أورام أوتضخم عادي لخبطة في الهرمونات مش بسبب اليود
مفيد فوزي: مراتك دكتورة
د.طارق : آه
مفيد فوزي: قلي المهنة الواحدة فيها نجاح في الزواج
د.طارق : والله هي مراتي بتدرس في الجامعة لطلبة سنة أولى وتانية،
مفيد فوزي: بس في النهاية دكتورة
د.طارق : فمعندهاش عيانين ونبتشيات فبالتالي مقدرش أحكم في النقطة دي
مفيد فوزي: انت اللي مختار كده، لأنه لو عندها عيانين كانت تبقى مشكلة جامدة، والعيال يتوهوا
مفيد فوزي: شغلتك بالتحديد هي الهندسة الطبية
م. ياسين عبد الصمد: آه دي شغلتي ادارة الأجهزة الطبية
مفيد فوزي: ايه الفرق بين الهندسة الطبية وأي هندسة أخرى
م. ياسين: هي الهندسة عادة مقسمة الى عدة تخصصات
مفيد فوزي: انت متخصص هندسة طبية، طب فهمني من اين كانت لك هذه الهندسة الطبية
م. ياسين: الهندسة الطبية تتعامل بشكل مباشر مع الأجهزة اللي بتتعامل مع المرضى وتمس المرضى في لحظات حرجة جدا من حياتهم وبالتالي كان القسم ده المواد الدراسية اللي تدرس فيه لها زاويتين، زاوية هندسية وزاوية طبية فيما يتعلق بالفسيولوجي والاناتومي وغيره
مفيد فوزي: اذا بيبقى عندك أساسا المام ببعض العلوم الطبية
م. ياسين: طبعا عشان اقدر اتعامل مع الجهاز
مفيد فوزي: هي دي اجابة السؤال
م. ياسين: عشان اقدر اعرف اد ايه الخطورة اللي ممكن يتسبب فيها،انا مش مهمتي ان الجهاز يطلع خرج،لازم يكون خرج آمن بيتعامل مع واحد مريض وأحيانا بيساعد مريض بعض الوظائف الحيوية جوه جسمه مش شغالة فبالتالي لازم جزء الفسيولوجي يكون معروف
مفيد فوزي: ده جهاز ايه
م. ياسين: ده جهاز كي جراحي
مفيد فوزي: يعني ايه
م. ياسين: ده بيستخدمه الأطباء في قطع أو كي الشرايين أثناء العمليات يعني هو بيقطع به
مفيد فوزي: يقطع به ايه
م. ياسين: يقطع به جسم المريض
مفيد فوزي: ازاي
بيستخدم اليد دي ويفتح بها
مفيد فوزي: ده ايه مشرط
م. ياسين: آه زي المشرط والمفروض ان ده بيستخدم مرة واحدة ويترمي،
مفيد فوزي: ده بيخش جسم الانسان
م. ياسين: آه الجهاز ده فيه عطل فاحنا بنختبره
مفيد فوزي: انت سايبني ليه لوحدي مش اعرف منك ايه الحكاية انت لابس كده ليه
م. أيمن سلامة: الجهاز ده كان جوه في اودة العمليات فممكن يكون فيه عدوى
مفيد فوزي: ايه خطورة الجهاز، انا ماشي خايف من أي حاجة المسها، الجهاز ده بتاع ايه
م. أيمن: ده جهاز صدمات، بيلحقوا به المريض لو قلبه وقف بيحاول يخلي قلبه يشتغل
مفيد فوزي: الناس في الأحياء الشعبية بييجوا على ضهر المريض أو حد كده ويفضلوا يضربوه، ده ايه
م. أيمن: لأ هو في الاسعافات الأولية بيحاول يضغط على القلب، ينشط العضلة
مفيد فوزي: القلب من وشه
م. أيمن: آه ما القلب عضلة انا عاوزها تشتغل بادوس عليها، منفعتش باديها كهربا
مفيد فوزي: ده جهاز ايه ده، فهمني يا بشمهندس دي كلها ايه
م. أيمن: دي كلها بنط عشان التيار اللي حيخش جسم المريض تنشط القلب من غير ما تضره، لو واحد اتكهرب ممكن يموت، فانا عايز اديله الكهربا اللي تنشط القلب من غير ما تعمل له مشاكل، كهربا محسوبة
مفيد فوزي: ممكن الصدمة الكهربائية دي ممكن تموت
م. أيمن: من الجهاز ده لأ انما من بره ممكن، من فيشة ممكن حد يموت من كهربا عالية
مفيد فوزي: ايه الفرق بين كهربة الفيشة وكهربة الجهاز ده
م. أيمن: البنط دي كلها بتقل التيار اللي يخش الجسم بحيث انها متزيدش عن الحد الآمن
مفيد فوزي: غالبا بيبقى لاد ايه
م. أيمن: هو الفيد ميعديش فيه رقم معين
مفيد فوزي: انت بقى بتصلح ده من الانفلات
م. أيمن: هو ده بالنسبة لي واقف خالص في مشكلة،احنا بندور على العطل اللي عامل المشكلة
مفيد فوزي: طلع ايه العطل
م. أيمن: تقريبا المكثف الرئيسي بايظ
مفيد فوزي: الراجل المحترم ده وظيفته ايه
م. أيمن: ده مهندس تبع الدولة دي وهو بيساعدنا لومحتاجين حاجة، بيجيب لنا أجهزة منسق عام لنا
مفيد فوزي: هل ممكن أن أسألك سؤالا، ما هو انطباعك عن دعم مصر ليس فقط في النواحي الطبية لكن أيضا الخدمات الهندسية
واند فراش/ فني أثيوبي: هذا القسم نسيه الجميع وأهمله الجميع في الدولة هناك العديد من المشاكل تتعلق بالأجهزة الطبية، هناك عدد قليل من المتخصصين في الأجهزة الطبية يأتون من الخارج لذلك فهناك العديد من المشاكل في هذا القطاع والفريق المصري متعاون بشكل كبير وكذلك يساعدوننا بشكل كبير، هذه المستشفى كانت مليئة بالمعدات التي لا تعمل قبل أن يأتي الفريق المصري ولكن الآن العديد من الأدوات التي تعمل
مفيد فوزي: اعتقد انكم تستحقون هذا الدعم
واند: ليس هناك كلمات للتعبير عن الشكر للمصريين نحن مسرورون بهذا الدعم الذي تقدمه مصر في هذه الأقسام
مفيد فوزي: د. نادر زكي امتى اكتشفتوا أنه من المهم إضافة مهندس طبي لهذه القافلة
د. نادر: بيتم الأول قبل القوافل استكشاف بنشوف اللي احنا عايزينه عشان تبقى ناجحة
مفيد فوزي: مين بيسافر فيها
د. نادر: الدكتور وائل بيستكشف ايه اللي احنا عايزينه، فطبعا في اجهزة محتاجة تتصلح عشان نشغل اكبر عدد من غرف العمليات مفيد فوزي: دي اجهزة حيوية
د. نادر: آه طبعا
مفيد فوزي: زي ايه مثلا
د. نادر: اجهزة تخدير، اجهزة الكي اللي تستخدم في الجراحة ، مينفعش نشتغل الا لما تتصلح، كان في اجهزة كتير معطلة وده كان مخلي كفاءة أود العمليات أقل، بدل ما تبقى 4 كانت واحدة بتتغل أو 2، لما جه المهندسين المصريين اشتغلت بكامل طاقتها وده خلانا نعمل عمليات اكتر
مفيد فوزي: انت لما بتشتغل بالجهاز بتبقى مستريح، مدرك ان ده جهاز برفكت
د. نادر: في اجهزة لا يمكن نشتغل من غيرها، يعني جهاز التخدير الأودة بتتقفل
مفيد فوزي: اديني فكرة هل في عمليات بتتعمل لشباب يعني في مشاكل للشباب
د. نادر: هو من جميع الأعمار لكن الغالبية لكبار السن، في بقى عمليات شباب، هو الفكرة هنا ان قائمة الانتظار للعمليات طويلة والمريض مش زي عندنا في مصر عنده بدائل كتير لأ ، فممكن يضطر يقعد
مفيد فوزي: الناس هنا يا دكتور نادر غلابة، يعني ده التعبير اللي اقدر اقوله، انه يقعد لغاية حضرتك ماتيجي من مصر لغاية القافلة التانية ما تيجي
د. نادر: ايوه بيقعدوا شهور على قائمة الانتظار
مفيد فوزي: امال دكاترتهم بيشتغلوا في ايه
د. نادر: عدد الدكاترة قليل وتدريبهم اقل شوية
مفيد فوزي: فبالنسبة له مجيء الطبيب المصري الجراح ده حكاية
د. نادر: طبعا بالنسبة لمريض أساسا مستني وحاسس بأهمية الدكتور ومستنيه
مفيد فوزي: النهارده حضرتك عملت ايه عمليات
د. نادر: عملت استئصال مرارة ودوالي في الساق ولسه بقه حنشتغل تاني
مفيد فوزي: حاسس انه فيه فرق كبير وانت بتشتغل عملية هنا وفي مصر
د. نادر: اكيد طبعا فرق الامكانيات
مفيد فوزي: هو فرق حضاري واللا انا غلطان في التعبير
د. نادر: لأ مش غلطان، هو حضارة مختلفة
مفيد فوزي: حلو التعبير ده يرد على جملتي ، ولأ حضارة ايه موغلة في القدم
د. نادر: هو الحقيقة شعب طيب وودود، قدرنا نعمل عن طريق الشغل وعن طريق الاتصال الإنساني، الإنسان هو الإنسان يا استاذ مفيد
مفيد فوزي: حيثما كان صحرا كان أو بركان
د. نادر: يعني الكلمة الحلوة والمعاملة الطيبة والاحترام المتبادل هو ده سكة النجاح
فاصل
مفيد فوزي: انت منين جبت المعلومة انه 2000 طبيب بيخدموا ال 80 مليون اثيوبي
د.وائل: منهم هنا من وزارة الصحة وفي منهم ألف كمان بيتسرب
مفيد فوزي: هو مهنة الطبيب في أثيوبيا مش مرموقة اجتماعيا
اجتماعيا فقط إنما ماديا لا
مفيد فوزي: هل في اقبال من الطلبة على كليات الطب
د.وائل: اشك في الإقبال، مثلا كلية الطب في اديس ابابا بتخرج 150 طبيب
مفيد فوزي: اما القصر العيني بيخرج كام
د.وائل: 600 تقريبا
مفيد فوزي: قلي ايه حكاية مكافحة العدوى وليه بالتحديد هنا
د.وائل: احنا اول ما اشتغلنا خالص، طبعا احنا بنشتغل بالامكانيات الموجودة، هما معندهمش الرولز الحديثة بتاعة مكافحة العدوى، احنا عندنا في مصر واصلة لمستوى عالي جدا، على هامش زيارة دكتور حاتم الجبلي لما جينا هنا قلنا ان عندنا مستوى مكافحة العدوى تعترف به منظمة الصحة العالمية ان احنا افضل ناس في المنطقة دي كلها ، واحنا مش باخلين على المكان ده بشيء
مفيد فوزي: هل هنا العدوى شديدة
د.وائل: لأ هي مكافحة العدوى مش انتشار العدوى، يعني داخل المستشفيات عشان اقلل نسبة الإصابات داخل المستشفى نفسها ، طريقة التعامل مع الأجهزة، طريقة التعامل مع العيان، فهي دي احنا قلنا عايزين نعمل كده وهما رحبوا جدا فبدأنا على طول من القافلة اللي بعدها نجيبلهم مكافحة العدوى المصرية اللي هي تقعد 6 اسابيع
مفيد فوزي: الأستاذ الدكتور محمد عبد الفتاح تأذن لي اعرف من حضرتك الوجوه السمرة الجميلة دي هل هما طلبة في كلية الطب هل هما دكاترة
د. محمد: أهلا وسهلا بحضرتك على أرض أثيوبيا وفي الترينينج بتاعنا، زملائنا هنا فنيين وأخصائيين
مفيد فوزي: فهمني يعني ايه فنيين
د. محمد: فنيين وبائيات، فنيين أشعة، فنيين معامل
مفيد فوزي: الفني المفروض هو المساعد للدكتور
د. محمد: بالضبط
مفيد فوزي: يعني جوه العملية بيبقى هو اللي واقف جنبه
د. محمد: بالضبط مساعد للطبيب ومسهل لشغله وفي بعض التمريض وفي بعض الأطباء موجودين هنا
فاصل
مفيد فوزي: نحن بهذا ببساطة شديدة نستعيد الدور المصري في أفريقيا، عشنا طويلا مهتمين بالجانب الأفريقي ثم حدثت في فترة من الفترات أن الجانب العربي شد انتباهنا اكتر وضعف الجانب الإفريقي، يحتاج الأمر إلى مساعدات شتى وتذليل كل الصعاب وبذل جسور محبة بيننا وبين العالم الأفريقي، اللي عايز اقوله باختصار،من اديس ابابا أتحدث إليكم، جئت انقل التجربة لأني مؤمن إيمان عميق أن مثل هذه التجارب إنما تصنع في السياسة أشياء مذهلة إنها تعطي الجانب الإنساني لمعادلات السياسة الصعبة