مفيد فوزي:من الطبيعى جدا ان يحدث هذا سواء فى حياتك او فى حياتى ولكم موفور الصحة عندما يقرر الطبيب الجراح اجراء عملية جراحية فوق هذا السرير وبهذه الاجهزة فأن الناس قد تخشى فقط عندما يذكر اسم طبيب التخدير ولا ادرى السبب لماذا طبيب التخدير فى مصر متهم ؟ هل هى مبالغات الاعلام ؟ هل هناك اجهزة معطلة ؟ لماذا الطبيب الجراح قد تعلق بعض اخطائه على شماعة طبيب التخدير ؟ ماهى حقيقة قضية التخدير فى مصر ؟ هل هى مجرد ابرة بنج سريع وينتهى امره ؟ هل للناس ثقافة تدرك بها ابعاد عمل طبيب التخدير ؟ لماذا طبيب التخدير مهمش ؟ لماذا اقل اجرا ؟ لماذا يهاجر احيانا ليقبض مرتبا عاليا فى مكان اخر ؟ انه طبيب التخدير فى حديث المدينة فاصل مفيد فوزي:د . نبيلة فهمى استاذة التخدير ... لسة انت خارجة من غرفة العمليات ... كأستاذة تخدير ماهى الحالة اللى كانت معاك ؟ الدكتورة نبيلة : حالة زراعة كبد مفيد فوزي:هل دى ناجحة فى مصر ؟ عمره اد ايه المريض ؟ الدكتورة نبيلة: اه ناجحه وعمره 58 سنة مفيد فوزي:ممكن للكبد ان يعيش اد ايه ؟ وهل هناك فترة زمنية ؟ الدكتورة نبيلة: تختلف من مريض لاخر مفيد فوزي:هل الجسم ممكن يطرد عضو جديد؟ الدكتورة نبيلة: ممكن الجسم يطرد عضو جديد مفيد فوزي:كام فى المئه ممكن الجسم يطرد عضو جديد؟ الدكتورة نبيلة: يعنى فى حدود من 2 الى 10% وحصل ده قبل كده كان فيه واحد عنده حوالى عشرين سنة عملنا له زراعة كبد وحصل رفض من الجسم وبعد 14 يوم رجعنا عملنا له زراعة كبد ثانى وموثقة دوليا مفيد فوزي:عملها امتى ؟ الدكتورة نبيلة: بقاله سنة مفيد فوزي:نرجع لموضوعنا ... حضرتك اكيد بتشاركى فى محافل وبتروحى النادى والروتارى بتشوفى الحياة ... ايه الاسئلة الفضولية الى بتسألهالك الناس ؟ الدكتورة نبيلة: ناس على درجه عالية من الثقافة والعلم بتسألنى انت خدتى شهادة بكالوريوس طب مفيد فوزي:ده بيشكك فيك الدكتورة نبيلة: بيسأل دكتور تخدير هى دى وظيفة هو بيعمل ايه ... الناس فى المجتمع ما عندهاش دراية بعمل دكتور التخدير مفيد فوزي:بيعمل ايه ده الدكتورة نبيلة: اتسألت بتروحى تدى سرنجة بنج وخلاص لاحظت ان الناس ما عندهاش علم بشغلنا انت عارف ان احنا درسنا الطب باللغة الانجليزية فا اسمحلى ان فى بعض الكلمات بالانجليزى بس هحاول اقلها بالعربى دى حاجة تلقائية الواحد بيستغرب جدا وبقعد اشرح للناس واقلهم احنا بكالوريوس طب ومعنا ماجستير ودكتوراه وعملنا ابحاث واترقيت استاذ مساعد ثم استاذ ونعمل ابحاث ثانى ونسافر حتت كثير مفيد فوزي:كام سنة فى هذا المجال ؟ الدكتورة نبيلة: حضرتك انا دفعة ديسمبر 1981 تقريبا داخلة على 30 سنة فى التخدير مفيد فوزي:يعنى بقالك فى التخدير 30 سنة الدكتورة نبيلة: ايوه مفيد فوزي:ايه هى الاسئلة الثانية ... ماحدش بيجبلك سيرة الجرعة الزائدة ؟ الدكتورة نبيلة: حضرتك لقيتها فى الجرائد الجرعة الزائدة من البينج وماحدش من الناس عنده فكرةعن البينج ... يعنى ايه جرعة زايدة ؟ العيان ما بيشفش غير الجراح والعيان بيروح للجراح ويقوله اكشف على ممكن يكون عنده مرارة او قلب او صدر اى حاجه وعمره ما يقله دكتور تخدير مين الى ها يبنجه مين الى ها يشوفه مفيد فوزي:حضرتك ذكرتى الجراح خمس مرات معناه ان الجراح يخطف الضوء دائما الدكتورة نبيلة: بصراحة الجراح يخطف الضوء لكن كل ده اتغير الايام دى مفيد فوزي:هل الجراح يهمش دور دكتور التخدير ؟ الدكتورة نبيلة: مش ذنبه لانه اعتاد على كده العيان لا يعرف مين هو دكتور التخدير هناك اليوم فى عيادات ما قبل العملية وهناك خطة للتخدير و لعلاج الالم انا استاذة تخدير ورعاية مركزه انا لازم احط خطة للعيان قبل واثناء العملية وبعدها علشان ما يحسش بالم دكتور التخدير هو المايسترو يحافظ على جميع اجهزة الجسم والجراح بيشتغل على عضو واحد ذى القلب اما دكتور التخدير بيحافظ على كل العلمات الحيوية فى الجسم من ضغط ونبض وحرارة والكلى مفيد فوزي:لماذا الكلى بالذات فهمينى؟ الدكتورة نبيلة: اى عقار او حقن نعطيها للمريض او محاليل كلها بتروح عن طريق الكلى او الكبد فلازم العيان نركبله اسطرة بول ولازم نشوف كميته الى طالعه لو كمية البول اقل من حد معين يبقى العيان ده عنده قصور فى الكلى ومين الى هياخد باله من قصور الكلى الى لازم يعالجه دكتور التخدير مفيد فوزي:متى تقول للجراح ما تعملش العملية؟ الدكتورة نبيلة: لو لسه المريض ما نامش مفيد فوزي:فى حاجات ثانية لا تؤهله لعدم اجراء الجراحة ؟ الدكتورة نبيلة: هناك اجهزة اشوف بيها القلب والسكر وماشيه ازاى الكلى والاجهزة داخل غرفة العمليات فاصل مفيد فوزي:دكتور توفيق نور الدين استاذ التخدير ووكيل طب الازهر ..ايه الحرام فى الطب ؟ الدكتور توفيق : اشياء حرمها الدين زى الاجهاض او اغش المريض اقول للمريض هعملك عملية وادخل مثلا ابتر او اشيل عضو من غير ما اقوله او اخذ من اسرته او اديله حاجه تضره ده بيحصل فى اماكن معينة مفيد فوزي:خليك مباشرهل يحدث فى مصر ؟ الدكتور توفيق: لا مفيد فوزي:فى المانيا مثلا الدكتور توفيق: فى المانيا اعطوا ادوية لمرضى فى الحرب العالمية " فاكسين" اوميكروب ولقوه بيضر المريض وهذا قد يحدث فى مصر بخطأ ولكن بعمد لا مفيد فوزي:بينى وبينك دائما اقول الله احمينى من اجتهادات الاطباء احنا ما عندناش ثقافة البحث عن دكتور التخدير قبل الجراح انا عملت جراحة الرئة فى فرنسا للاسف وعملت عقد الاحبال الصوتية فى ليون جنب باريس ما اعرفش ايه الى حصل لماذا اختير لى ان اذهب الى هذه البلاد المتحضرة ربما لان طبيب التخدير هناك شخصية مرموقة الدكتور توفيق : بالتأكيد يا فندم مفيد فوزي:انا قرأت فى الجرايد خبر ان معالى وزير التربية والتعليم احمد زكى بدر عمل عملية المرارة من الى بيشوفه من ساعة ما عمل وزير والناس بتدعى والمدرسين الى بيمشوا والنظار الى بيمشوا والمدارس الى بتقفل فا الراجل عمل عملية المرارة عملها له الدكتور / حسن شاكر ونجحت العملية ولم يذكر من عمل له عملية التخدير لماذا هذا التهميش فى نظرك ؟ الدكتور توفيق: دور الاعلام فا همية طبيب التخدير غائبه بسبب غياب ثقافة علم التخدير فى مصر التخدير يعرف " بفن التخدير " وده كلام مش بتاعى اراه كما يراه غيرى مفيد فوزي:ايه الحرام فى التخدير بما انك طبيب فى الازهر ؟ الدكتور توفيق : الحرام فى الطب ان اساعد طبيب على ان يعمل حاجة حرام مفيد فوزي:فهمنى زى ايه ؟ الدكتور توفيق: ابنج مريضة هيعملها اجهاض غير مباح او يعمل مشكلة للعيان مفيد فوزي:ممكن الدكتور يعمل عملية اجهاض تحت السلم وغالبا يكون هو برده دكتور التخدير الدكتور توفيق: بس لو ساعده طبيب تخدير بيتحمل معاه المسئولية مفيد فوزي:الاجهاض فى مصر غير اخلاقى على الاطلاق الدكتور توفيق : بس اذا كان بسبب طبى خوفا على صحة الام يبقى مفيد لكن لو مافيش خطوره يبقى حرام مفيد فوزي:الاسماء مع فريق دكتور حسن شاكر طلعت كلها فمن الذى اسقط اسم طبيب التخدير هل الاعلام ؟ لما انا كنت رئيس تحرير مجلة صباح الخير هل انشر جميع اسماء الاطباء دون اسم دكتور التخدير مش ممكن الدكتور توفيق : العيب فى الجراح ممكن يكون نسى اسمه من ضمن افراد الطاقم الطبى او ادلى بتصريح مكون من فلان وفلان ولم يذكر اسم طبيب التخدير مفيد فوزي:انت رجل صادق مفيد فوزي:الجراح الكبير دكتور / حسن شاكر ... حضرتك اجريت عملية المراره لزكى بدر هل المراره عضو شفته بالعين ؟ الدكتور حسن شاكر : اه طبعا العمليات جوه البطن بنعملها بالمنظار وتكون مكبره مفيد فوزي:حجمها ايه المراره الطبيعية ؟ الدكتور حسن شاكر: حجمها ذى الكمثرة طول 10 – 12 سم وقطرها 4 – 5 سم مفيد فوزي:هل مرارته زى اى حد ؟ الدكتور حسن شاكر : مرارته زى الشخص الطبيعى بس كان فيها التهاب حاد من الحصوات مفيد فوزي:بتيجى منين الحصى ؟ الدكتور حسن شاكر: تسربات فى السائل المرارى ولها اسباب كثيره وفى اغلب الاحيان ملهاش سبب مفيد فوزي:ندخل فى موضوعنا لماذا طبيب التخدير فى مصر مهمش ؟ الدكتور حسن شاكر: ده مش كلام مضبوط ومش مفروض يكون موجود قد يكون ثقافة مفيد فوزي:لماذا استخدمت كلمة " قد " ؟ الدكتور حسن شاكر: لان التعامل يكون دائما من خلال الجراح والمريض دائم التعامل معه ولا يعرف دكتور التخدير رغم انه عضو اساسى ولو الجراح مش معاه دكتور تخدير على كفاءة وتفاهم مع الجراح الامور ما تمشيش كويس جوه غرفة العمليات مفيد فوزي:دكتور التخدير اقل اجرا ؟ الدكتور حسن شاكر: فى العملية يكون اقل اجرا من الجراح لاكن دكتور التخدير بيشتغل مع جراحين كثير مفيد فوزي:اليس من المهانة ان يتقاضى دكتور التخدير اجره من الجراح ؟ الدكتور حسن شاكر: الامور اتغيرت هناك امور محاسبية ولها اجراءات وهناك الية جديدة وطبيب التخدير والجراح يأخذ اجره عن طريق المستشفى او الحسابات وحتى لو خد اجره من الجراح ليس فيها مهانه لان كلنا فريق عمل واحد واصدقاء فالجراح عندما يتسلم اجرالعملية بيكون فيها نصيب التخدير وليس من العيب ان ياخد اتعابه من الجراح فكلنا زملاء فى المهنة مفيد فوزي:احيانا اطباء الجراحة لهم اخطاء قد يتحملها طبيب التخدير الدكتور حسن شاكر: اى مهنه فيها اخطاء وفى مهنتنا سواء كان تخدير او جراحه او تمريض اى شخص داخل غرفة العمليات من الجائز ان يخطىء ولكن عمر ما فى حد داخل غرفة العملية وفى باله ان يخطىء لكن بيبقى داخل وعامل احتياطاته بنسبة 100% انه مافيش اخطاء خالص والنقطه الاهم ان اى عمليه فى الدنيا لها نسبه من المضاعفات قد تحدث وفى الاغلبيه لا تحدث لكن فى ناس معرضه لحدوث مضاعفات لما يحصل التهاب فى الجرح المهم ان الطبيب يشرح للمريض طريقة عمل العملية وان هناك نسبه من المضاعفات قد تحدث لكن فى الاغلبيه من المرضى ما بتحصلش وده لازم علشان المريض يتقبل حدوث المضاعفات مفيد فوزي:لماذا اهل المريض اذا حدث اختاره الله يتجهون بالاتهام لطبيب التخدير؟ فهمنى الثقافة دى ايه؟ الدكتور حسن شاكر: الثقافة دى داخل فيها كلام بنسمعه ليس له وجود فى الطب ذى بنسمع جرعة بنج زيادة الكلام ده فى الطب مفيش منه خالص فى اصول وقواعد للتخدير وهو علم كبير وواسع ويتقدم ويتحدث زى اى علم وتخصص اخر مفيد فوزي:هل الشخص المدمن سجائر كثير ممكن ياخذ نفس الجرعه حسب معلوماتك ؟ ادينى فكره الشخص الى متعود يشرب هل ده ياخذ جرعه معينه اكثر ؟ عايز افهم الدكتورحسن شاكر: المريض المدخن بطبعه عنده فى الجهاز التنفسى بعض المشاكل وفى العمليات الى بتتعمل بمخدر كلى بيكون المخدر داخل عن طريق الجهاز التنفسى علشان كده لابد انه يكون فى بعض الاحتياطات لغاية موعد العمليه نطمئن على الجهاز التنفسى بحاله كويسه ومفيش التهاب واستاذ التخدير قبل العملية بيشوفه ويحصل للمريض تقييم قبل العملية من الفريقين الجراحى والتخدير علشان يطمئن ان هذا التدخين ليس له تأثير واخذ الاحتياطات فى حالة وجود تأثير مفيد فوزي:لماذا يهرب اطباء التخدير من هذه المهنة ؟ الدكتورحسن شاكر: مين قال انهم بيهربوا دى مهنه زى اى مهن مفيد فوزي:رئيس اتحاد اطباء التخدير فى الاسكندريه فى مانشت بيقوا ان اطباء التخدير يهربون وقد يلجأون الى اشياء اخرى فى الطب يمارسونها يعنى حضرتك مثلا لما اتنشر انك عملت عملية لمعالى الوزير نشرت جميع الاسماء لطقمك ولم يذكر اسم طبيب التخدير هل هو خطأ من الاعلام ؟ الدكتور حسن شاكر: احنا لا نعرف المعلومات اتخدت ازاى او نشرت ازاى انما طبعا لو سئل فى هذا ومن الفريق الى اشتغل كنت ها اقول اسماء الفريق الى دخل غرفة العمليات حتى اصغر عامل مفيد فوزي:طيب ليه لم يسأل ؟ الدكتور حسن شاكر: نقطه طبيب التخدير اقل اجرا هو ياخذ اجره بعد العمليه مفيد فوزي:انا احترم دماثتك ومحترم انك تعتبر دكتور التخدير اخ و زى الدكتور مجدى يعقوب بيستخدم اطباء انجليز النهارده طبيب التخدير مصرى لكن عموم اطباء التخدير فى مصر تشعرون انهم اقل اجرا واكثر تهميش بدليل انا اعرفش مين طبيب التخدير الى اجرى هذه العملية التخدير بغض النظر مين الى عمل العملية الوزير احمد زكى او ابراهيم على او محمد اى حد انما الناس عرفت الدكتور / حسن شاكر الدكتور حسن شاكر: ها ارجع واقول لحضرتك ان الجراح هو الى فى الوش يعنى لو العملية لاقدر الله حصل فيها حاجه مثل المضاعفات الجراح هو المتحمل المسئوليه وكل حاجه ليها ثمن ولو تكلمنا عن المحاسبه القانونيه الجراح هو الزى يسائل حتى ولو الممرضه الى غلطت فا الجراح هو قائد فريق غرفة العمليات فاصل مفيد فوزي:دكتور / جمال فؤاد طبيب التخدير الكبير عايز اقول لك ان فيه طبيب تخدير امضى 42 سنه اسمه زى ما انا مسجله الدكتور عصام عبد الصمد ده رئيس اتحاد المصريين فى لندن وهو طبيب تخدير على النت بيقول على فكره انا ها اقول كلام صادم لو بتشيل شوكه من حلقك لو بتزيل اللوز لو بتعمل عملية تافهه اعملها بره وما تعملهاش فى مصر لان اسطوانات المتخصصه للتخدير اسطوانات غير امنه وانا خايف على حياة المواطن ويقول لامفر انك تسافر حتى لاتموت فى مصر دون تبرير او تفسير هل هذا الرجل يتكلم كلام واقعى صادم ولا هو مبالغ ولا هو ايه بالضبط وامانتك هى القيمه الى بتعامل معاك فيها الدكتورجمال: هو مبالغ استاذ مفيد طبعا وربما فى قدر بسيط من الصحه فى هذا الكلام مفيد فوزي:قلت لى استاذ مفيد الراجل ده مبالغ وسكت اربع ثوانى وقلت لى على فكره استاذ مفيد بس فى ايضا صحه فى هذا الكلام الدكتور جمال: الكلام كله نسبى وهو بيقارنا بالمجتمعات الغربيه الى عايش فيها من اربعين سنه مفيد فوزي:هل يموت الانسان فى مصر بسبب التخدير احيانا ؟ الدكتور جمال: ممكن مفيد فوزي:قد ايه مخاطر موته ؟ الدكتور جمال: تعتمد على ظروف متعدده نقول الاول حالته الصحيه وحجم العملية الى بيعملها المنظومه الطبيه الى هو داخل جواها ... الموضوع مش موضوع التخدير وغرفة العمليات وبس الموضوع معقد وواسع من اول ما يدخل باب المستشفى او يقابل الجراح لاول مرة او يقابل الممرضه ومعمل التحاليل مفيد فوزي:انا شايف ان حضرتك تكون بتوسع المسئوليه الدكتور جمال: لا ما بوسعش المسئوليه لا احنا متحملين المسئوليه كامله بس احنا محتاجين دعم من اجهزة كثيرة مفيد فوزي:زى مين ؟ الدكتور جمال: انا بقول لسيادتك .. الاشعه / المعمل / التمريض / ادارة المستشفى / جهاز الصيانه للمستشفى / المصنع الى بيصنع اسطوانه الاكسجين / العربيه الى بتنقل الاسطوانه مفيد فوزي:هل حقا ان المصنع الى بيطلع اسطوانة التخدير لحضرتك هو نفس المصنع الى بيطلع اسطوانة بتاعت اللحام بتاعت الحدادين ؟ الدكتورجمال: هما بيخدوا الطبى وبيستعملوه ... الاكسجين طبى له درجة نقاء معينه 99.9 ولها توحيد قياسى وزارة لصناعه تفتش عليه مفيد فوزي:بتاع حدادين الدكتور جمال: هما بيخدوا بتاع الطب ويستعمله هو منتج واحد مفيد فوزي:الدكتور جمال افرض وحضرتك بتعمل عملية تخدير الكابل الى موصل للمريض اتهز مسئولية مين ؟ الدكتور جمال: مسئوليتنا احنا طبعا وطبيب التخدير مسئول ان يتاكد ان المعده بتاعته سليمه 100% قبل ما يشتغل لازم يعمل فحص دقيق للاجهزة ولازم يجرب كل حاجه زى الطيار قبل ما يطلع بيمسك قائمه ويراجع كل العدادات ولو فى خطأ ما يسافرش واحنا كمان لو سلك جهاز رسم القلب عطلان المفروض مبدأش العمليه مفيد فوزي:عفوا صديقى الطيار عيسى خليل بيقولى لو لمبة كهرباء محروقه فوق راكب اقول لا ما اسافرش هل هو على حق ؟ الدكتور جمال: مضبوط هى دى منظومة الامان مفيد فوزي:انا متخيل انه عايز يدينى صورة عريضه وفاخره عن الطيران الدكتور جمال: هناك تشابه بين الطيران وبين الجراحه والتخدير مفيد فوزي:يعنى انت الطيار خلال العملية ؟ الدكتور جمال: بالضبط مفيد فوزي:الله مش الجراح يعنى الدكتور جمال: الجراح طيار بره غرفة العمليات مفيد فوزي:ليه قلت كده الدكتور جمال: هو ده الرد المناسب طبيب التخدير هو المايسترو ومدير غرفة العمليات مفيد فوزي:اليس غريبا انه يحكيلي صديقي جراح الاسنان طارق زاهر انه لما عمل عملية في المستشفي الامريكى فى باريس شاف الجراح مرة و في خمس ايام بيشوف طبيب التخدير هل هذا يحدث في مصر؟ الدكتورجمال: احيانا مفيد فوزي:كام في المئة ؟ الدكتور جمال: من 20-25 % مفيد فوزي:نقول 10% الدكتور جمال: موافق 10% معظم العمليات في مصر لا تجرى في المستشفيات الكبيرة والاف العمليات تجرى يوميا في القرى والنجوع ودي ظروفها مختلفة عن ال بنتكلم عليه في المستشفي الامريكي او المستشفيات الضخمة في مصر مفيد فوزي:انا بستغرب من كلام د: طارق زاهر عما قاله انه شاف الجراح مرة واحدة وطبيب التخدير خمس مرات الدكتورجمال: تسمحلى اقول لك لمحه تاريخيه عن التخدير مفيد فوزي:لا لا دكتور جمال الكلام ده حضرتك تقوله داخل كلية الطب لان الناس الي قاعدة ادامنا الى بتسمعنا محتاجين منك معلومات حقيقيه عن طبيب التخدير الدكتور جمال: الحقيقه انه هو مفروض يكون مسئول عن كل ما حول العملية من قبلها الى اثنائها الى ما بعدها لان هناك فترة خطورة و تغيرات بيمر بها الجسم مفيد فوزي:ليه قلت المفروض ؟ الدكتور جمال: علشان لسه مش بيطبق دائما مفيد فوزي:ده المهم اعرفه .. ايه الضغوط يا دكتور جمال الواقعه على طبيب التخدير؟ الدكتور جمال: فى حاجات كثير مفيد فوزي:اتفضل بسمعك الدكتور جمال: اولا عدم معرفة العامه والخاصه احيانا بالدور الحقيقى لطبيب التخدير .. فى ناس متعلمه تيجى تسئلك هو حضرتك بتحضر العملية للاخر ولا بتدى الحقنه وتمشى او يقول لك هى مدة العملية قد ايه ..اقول له بالتساهيل الله انا مش عارف هو بيسال السؤال ليه .. يقولى الله اما انت بتحسب الجرعه ازاى ..هو فاهم ان انا بدى الحقنه فى الاول وهى دى وبس لو هى ساعتان اديله على قد كده ولو نصف ساعه اديله قد كده .. هى مشكله مفيد فوزي:هل لكل عملية جراحيه تخدير معين؟ الدكتور جمال: احنا مش بنستخدم عقار واحد يا استاذ مفيد احنا بنستخدم عدة عقاقير جوه العملية الواحده وبعضهم للتخدير وبعضهم لاهداف ثانيه علشان اغير من وظائف بعض الاعضاء الى بتتغير اثناء العملية انا عايز اعمل موالفه للاعضاء كلها مع بعضها اثناء العملية مفيد فوزي:انت بتعمل موالفه ولا بتمنع الالم فهمنى ؟ الدكتور جمال: لا بتمنع الالم ده جزء من العملية والتخدير تعريفه ثلاث او اربع حاجات مع بعض مفيد فوزي:ايه هي ؟ الدكتور جمال: واحد منهم هو منع الالم لكن غياب الوعى الحاجه الثانيه لان فى ناس تصحى وتسمع اثناء العمليه ويجلهم مرض نفسى فى الغرب لكن عندنا الناس لطيفه وتحكيها وتتندر بيها او تشتكى مفيد فوزي:ايه المغزى ؟ الدكتور جمال: المغزى من ده ان الوعى اثناء العملية مشكله مش قادرين نمنعها بجميع الادويه ولها حدوث نادر ولاكن موجود واحد الادويه الى بنستعملها بيشل العضلات وفى اخر العملية بعكس تأثيره مفيد فوزي:ما يوصلش لشلل ؟ الدكتور جمال: لا ما يوصلش لشلل انما هو بيشل العضلات بصورة مؤقته علشان الجسم يكون مسترخى مفيد فوزي:ليه الناس بتخاف من التخدير النصفى فى الظهر؟ الدكتوره نبيلة : قلة معلومات مفيد فوزي:ايه المعلومه الشائعه ؟ الدكتوره نبيلة: ابرة الظهر بتشل احنا عايزين نعرف يعني ايه تخدير نصفي وده مش حاجة واحدة مش كل طبيب تخدير يقدر يدي بنج نصفي صح ومعتدل مفيد: بقي ايه صح فاهميني علان الناس تعرف دكتورة نبيلة : ذي ما تقول حضرتك انا هروح اشتري حاجة من المحل ده لانه كويس يعرف يديك ده بطريقة صحيحة مفيد فوزي: قطعة غيار صح مش من تحت السلم دكتورة نبيلة: في نصيحة للرأي العام لاي واحد من الناس الموجودين من الشعب لما يجي يعمل عملية بلاش يعملها في عيادة او مستشفي غير مجهزة من فضلكم لا تذهبوا هناك وتتهموا بعدها طبيب التخدير فاصل عودة للدكتور ماجد مفيد فوزي:ماذا حدث لسعاد نصر؟ الدكتور ماجد:انا هقلها بصورة عامة ومش لازم العملية ذي المشاكل ال بتحصل ان الطبيب لازم يمشي على خطوات واحد اثنين ثلاثة مفيد فوزي:ارجوك يا دكتور ما توهنيش ايه الي حصل لسعاد نصر؟ دكتور ماجد :حصلها ان الاوكسجين لم يصل بدرجة كافية للمخ مفيد فوزي: هل لما اتقلبت على وشها؟ دكتور ماجد :لما انقلبت على وشها كان فيه مشكلة اصلا مفيد فوزي: هل الانبوبة اتحركت؟ دكتور ماجد: ممكن تكون الانبوبة لم تدخل اصلا انا ما اقدرش احكم لاني ما كنتش موجود ال يعرف ال حصل بس ال كان موجود مفيد فوزي: هل قرات حكم دفاعا عن اطباء التخدير لما صدر الحكم بسجن احدهم حين يحدث خطأ ما؟ دكتور ماجد: الاعلام يحب يوجه اصابع الاتهام لحد احنا اخر ناس نشكر لما العملية تنجح واول ناس توجه لها اصابع الاتهام لما حد يخطأ فاصل مفيد فوزي: ماذا هو متهم في مصر بامانة الاستاذ الاكاديمي؟ دكتور توفيق نور الدين: اذا كنا عايزين الحقيقة هو طبيب التخدير بيلقي عليه المسئولية بنسبة كبيرة وهي مسئوليته فعلا يعني احنا عندنا مبدا ان المريض لما يحصله حاجة غالبا ما تبقي مشكلة تخدير وليس جراحة صعب اوي جراح يموت عيان لو معاه طبيب بنج كويس الا اذا تعمد وفاته وده صعب جدا لكن الطريقة ال بيتعرض بيها ان طبيب التخدير متهم بانه ادى جرعة بنج زايدة فهي طريقة خاطئة مفيد فوزي: ما صحة هذا؟ دكتور توفيق : صحة هذا طبيب غير كفء ومكان غير مجهز ومريض حالته فيها مشاكل والطبيب مش قادر يلم بيها مفيد فوزي:بياخد اد ايه طبيب التخدير؟ دكتور توفيق :بياخد من 7 الى 12 % من ثمن العملية مفيد فوزي:والجراح؟ دكتور توفيق : من 60 الى 70 % من ثمن العملية مفيد فوزي: يعني الف جنيه او اكثر هقول خمسين الف جنيه الجراح بقى بياخد كام؟ دكتور توفيق :على حسب الجراح لما يديله مفيد فوزي:طبيب التخدير بياخد من الجراح؟ دكتور توفيق:هناك بعض المستشفيات تحاسب طبيب التخدير بمفرده اما الشائع ان طبيب التخدير بياخد اجرته من الجراح مفيد فوزي:هل دخل مصر التخدير بالكمبيوتر؟ دكتور توفيق: الكمبيوتر ازاي يعني مفيد فوزي: يدي جرعة بمعدل ثابت دكتور توفيق:انا بقل حضرتك هو كعلم بيتقدم وبيطور فاصبح ذي كل حاجة دخل فيها الكمبيوتر والحسابات والالكترونيات فطبيعي ان طبيب التخدير معظم شغله ادوية ليها حسابات فقد يكون ذلك ولكن هناك محاليل تعطي قبل واثناء العملية او بعدها ياخدها بمعدل يعني تضبط بالكمبيوتر وتمشي حسب ما يضبط الجهاز فاصل مفيد فوزي: دكتور حسن شاكر انا اعرف اسماء جراحيين مشاهير من اشهر طبيب تخدير في مصر؟ دكتور شاكر: انا ليه راي في الموضوع ده مش مهم مين احسن او اشهر المهم في كل مهنة في الجراحيين مثلا ما فيش اشهر في جراحيين كثير ممتازين وعلى مستوى عالي وكلهم زملاء افاضل مفيد فوزي: انا بسأل لانه انا اعرف جراحيين يحملون اسماء رنانة وما اعرفش دكاترة تخدير يحملون اسماء رنانة دكتور شاكر:انا بقلك علشان طبيب التخدير داخل مستشفى او غرفة العمليات هو معروف للطاقم الجراحي اكثر مما هو معرف للعامة دي طبيعة تخصصه ذي تخصصات اخرى في نفس المستوى مفيد فوزي: اسأل الجراح حسن شاكر ما الذي تريد ان تستأصله كجراح في اخلاق مصر؟ دكتور شاكر:سلوكيات الناس ال اتغيرت مفيد فوزي: ما الذي تريد ان تستأصله كجراح ما تفكرش؟ دكتور شاكر : عدم احترام الصغير للكبير وده ما كنش موجود زمان مفيد فوزي: انت تريد ان تستأصل فكرة عدم احترام الصغير للكبير دكتور شاكر:لانه بتتراكم عليها اشياء كثيرة زمان زمان ما كنش كده مفيد فوزي:ما الذي يخدر الناس في مصر؟ دكتور شاكر : الكورة لمشاهدة الحلقة " فيديو"
