م الآخر| اعرف حبيبتك من "بروفايلها"

أيها الرجل "الفيسبوكي" عبر هذا المربع الأزرق الصغير الذي يدعى "فيس بوك".. انتبه، الفتاة لاتكتب شيء دون سبب.
انتبه لكل "Status" تكتبها، هتبعت بيها لك رسالة.. هتقولك حاجة مستنياها منك.. هترميلك كلمتين.. هتقولك بحبك.. هتقولك بكرهك.. هتقولك خلى بالك مني.. هتلومك.. هتلفت نظرك لحاجة ناسيها.. هتقولك زعلانة صالحني.. هتقولك فاجئني.
انتبه لتغيير صورتها الشخصية، هتلاقيها بتعيط.. بتضحك.. بتموت.. بتغرق.. بتكابر.. وحيدة.. سرحانة.. مستنية.. هتفارق.. عايزة تتكلم معاك وتبكي.. عايزة تخرج وتتبسط.
انتبه ل"COVER" بكلماته وحروفه وألوانه، هتبعتلك كلمة.. رسالة.. عبارة.. صورة من فيلم.. صورة تشبهك.
انتبه لأغانيها، هتقولك فيها حبيبي.. لاتروح.. اشتقتلك.. بحبك من زمان جدًا.. خد بالك عليا.. بغير عليك.. لو حبنا غلطة.. روح.. ماتسيبنيش.. أهواك بلا أمل.. عايزة أقولك بحبك، في اللحظة التي تضع فيها أغنية "في حاجات تتحس وماتتقالش" للفنانة نانسي عجرم.. اعلم إنك في مرحلة الخطر.
انتبه لتعليقاتها مع أصدقائها، هتقولهم فيها خلاص نسيت كل حاجة.. أو هتقول لسة بحبه.. ياللا نخرج نفسيتي وحشة.. في حاجة ناقصاني.. مستنية مفاجأة.
انتبه لأصدقائها على "الوول"، هيقولوها سلامتك.. مابترديش علينا ليه.. وحشتينا.. ارجعي لضحكتك تاني.
انتبه لضحكتها، أنت فقط من يحدد ضحكتها سواء من القلب أم لإخفاء أمر ما، هتحس بضحكة محتجاك فيها أم الابتسامة الصفراء تطغى عليها.. وممكن ضحكتها تختفي أساسًا.
انتبه ل "لايكاتها"، هتلاقيها عاملة "بوست" بتقولك فيه افهمني.. اكرهني.. حبني.. ابعد عني.. كلمني.. محتجاك جنبي.. أوعى تخونني.
انتبه لوجود ضوء أخضر يختفي ويظهر أسفل يمين الشاشة، أحيانا تنتظر منك كلمة وعندما تفقد الأمل ال"أوف لاين" يكون هو السبيل الوحيد لها.. بتفضل قاعدة مستنياك تبدأ الكلام.. بتقولك أنا بصالك.. وممكن تقفل عشان زهقت من "برودك".. وممكن كمان تقفل عشان مستنية الضوء الأخضر اللي تحت يتحول لإشارة حمراء فوق لما تبعتلها رسالة في نفس الوقت اللى بتعمل أوف لاين.
انتبه بشدة لصمتها المفاجئ، صمتها يعني ابتدت تفكر.. يعني أول خطوة للتحول.. يعني بتفكر في كل حاجة عشان تبعد عنك.. ممكن تكون بتكرّه نفسها فيك.. بتفتكرلك كل حاجة وحشة عشان تقاوم حنينها.. صمتها يعني انسحاب.. يعني بتفوق.. يعني بتلوم نفسها.
انتبه للموضوع ده هي "مشيراه" عشانك أصلا.. انتبه ولاتتجاهله.
أيها الرجل: "رسالة المرأة" أصبحت في "بروفايلها"... التفت لأبسط الأشياء.. لاحظ مزاجها وحروفها افهمها وانتبه.. فقط انتبه.