الحصالة

هشام الجخ.. عمرو قطامش من الشخصيات اللي اشتهرت مرة واحدة، ويمكن ناس كتير بتقول دا حظهم عالي، بس الكثير ميعرفش، أن هشام، بيقول شعر وبيحاول ينجح بقالوا أكثر من 13 سنة، وعمرو، بيسعى بقالوا سنين بيدور ع الفرصة.. هشام وعمرو وغيرهم كتير، أطبق عليهم مبدأ الحصالة اللي ممكن يطبق عليك في أي وقت.
زمان وإحنا صغيرين، كنا بنحوش الفلوس في الحصالة، ممكن تحرم نفسك من حاجة علشان تحوش، وممكن تحوش الزيادة منك وبعد فترة تبدأ تفتح الحصالة، وتنغنغ نفسك وتخدلك يومين، والمبدأ دا مش بيطبق بس ع الفلوس دا كمان ع الجهد والأفكار.
يعنى حضرتك تشتغل وتتعب وتأخد أقل ما إنت متوقع، تخلص في شغلك قوي والنتيجة مخزلة، وطبعًا تتضايق وتتعب؛ لأنك ببساطة متعرفش مبدأ الحصالة، إن جزء من جهدك بتاخده دلوقتي، والجزء التاني في الحصالة بيزيد تلقائي.. فلما الحصالة تتفتح تلاقي فتح كبير قوي من ربنا عليك، تستغرب وتقول إزاي؟! أنا زمان كنت بعمل أكتر من كده منجحتش ليه؟!، وناسي إن اللي في الحصالة نتيجة لجهد دلوقتي وزمان.
حواليا ناس كتيرة بتملى حصلتها دلوقتي، ومنهم محمد شاكر وسيد شعبان وإسلام حمزة وغيرهم، وهيجي يوم بإذن الله، الحصالة تتفتح ويلاقوا أضعاف أضعاف النجاح.
أما عن حصلتي أنا، فبحاول أملاها بطريقة مختلفة، بحاول أكون سعيد بكل لحظة في حياتي، يعني أنا دلوقتي مش معايا عربية، وخلال شهور هجيبها بإذن الله، فكل مواصلة بركبها دلوقتي، هي جزء من جهد بيروح للحصالة، بحاول استمتع بكل خطوة لأن الحصالة لما تتفتح، الله أعلم هعرف أمشي بحرية زي الأول ولا لأ،
يعني بمشي وبجري في الشارع، وبأكل وأنا ماشي، وبفتح أيدي ع الآخر وأحضن الدنيا.. يا ترى لما الحصالة هتتفتح هعرف أعمل كده؟!.
من الناس اللي الحصالة عندها إتفتحت من سنين، وربنا كرمه ببقائها الشيخ محمد متولي الشعراوي، حصلته كانت له ولأولاده اللي عايشين ع سيرته الطيبة، رافعين راسهم لأفضل حصالة إتفتحت في عهدنا، إتعلمت منه حاجاتين.. الأولى: انكسار النفس، والثانية: التواضع والبساطة، ودول أقوى سرين للنجاح.
الانكسار لله بيديك قوة وكاريزما وحضور قوي، والبساطة بتديك سحر.. أوقات الناس بتسقفلي ونفسي بتفرح، وأرجع أأنب نفسي دول بيسقفوا لعظمه الله مش ليكي، أنت زيك زي أي حد بس حكمة ربنا، وإرادته هي اللي عايزة كده.
حاجه كمان إتعلمتها من الحصالة، إن أفكاري ونجاحي هو هبة من الله، وهو تجسد لإرادة الله، علشان كده عمري ما أتذل لبشر أو أنافقة؛ لأن ببساطة إرادة الله لا تنحي لبشر، وليس لى أن أفعل ذلك.. أنا وكل من يبحث عن النجاح، سنصل بإذن الله وتفتح الحصالة، فلا داعي للنفاق أو الذل، علشان كده إتعلمت أطلب بعزة نفس.
آخر حاجة بقى، هي يا ترى لما الحصالة تتفتح، هعرف استمتع بحياتي زي دلوقتي؟.. علشان كده بحاول استمتع بكل لحظة مع أصحابي، لشىء بسيط ممكن حصلتي تتفتح بره مصر، فأبعد عنهم، وممكن هما اللي حصليتهم تتفتح، فالدنيا تاخدهم.
في النهاية.. الدنيا حصالة بتحوشلك إحساسك ونجاحك وبتزوده، أوعى تندم ع اللي فات وحط فيها ع قد ما تقدر لوجه الله، واستمتع بحياتك وبالوقت الحالي قوي، وكلمة ثقة في الله.. حصلتك هتتفتح هتتفتح، فعيش الدنيا بالحب.