صافينار.. معلمة الأجيال

عادي إني ماكونش بعرف أرقص.. وعادي جدا إن مايكونش الرقص من اهتماماتي.. والعادي أكتر إن اللي حواليا يشجعوني إني أرقص معاهم في أفراح صحابنا، فأهبّل كده معاهم وخلاص، بس الفرحة اللي كنت بحسها وأنا بعمل أي حركات بهلوانية هي اللي شجعتني إني لأول مرة أفكر جديا في إني أتعلم الرقص.
طبعا الكل فرح جدا بالقرار ده، لأنهم من زمان بيحاولوا معايا وأنا اللي مش قابلة ولا حابة الفكرة، لجأت لصحباتي البناتيت اللي لو الواحد اعتمد عليهم فعلا، ممكن يفتح بيهم كباريه ويعيش باقي حياته مستريح من النقطة اللي هتنزل عليهم بس، علموني أساسيات الرقص، هزة الوسط حركة الرجل والحاجات اللي لازم تتعمل مع كل نوع من الأغاني، حلو كده؟ اتعلمت وتمام؟ لا ياسيدي.. اكتشفت أن الموضوع بيتطور وإحنا لازم نطور نفسنا معاه.
فكرة إن أطور نفسي في الرقص كمان دي كانت بالنسبالي هزلية، اللي هو مش كفاية إني اتعلمت أساسا كمان أطور نفسي، إيه الفضا ده، ألاقي فلانة تقولي شوفي "بوسي" بتغني وترقص بخفة إزاي، طب هاتي قناة مش عارف إيه هتلاقيهم بيطيروا زي الفراشات، مش زينا بجعات فاكرة نفسها عصافير، لحد ما ظهرت القنبلة اللي عقدت كل البنات في الرقص، "صافي نار"، الحيقية أنا شخصيا أول ما شفتها اتخضيت، هو ده رقص ولا تمارين رياضية ولا إيه بالظبط.
صافينار ضربت بمفهوم الرقص عرض الحيطة، أصل الرقص في مفهوم معظم الناس بيكون عن "الوسط"، لكن صافينار بترقص بكل جوارحها، كل حاجة فيها بترقص، ده ضحكتها نفسها تحس إنها بترقص، ماكنش ده الغريب، على قد ما الغريب كان إن في بنات ابتدت تقلدها وتتفرج عليها عشان ترقص زيها "بنفس الجوارح"، مع اختلاف "القوالب" طبعا، مع السؤال والتتمحيص والتدقيق عرفت إن فعلا البنات خدت صافينار قدوة في المجال، وبيتفرجوا ويقلدوا عشان يبقوا زيها في الرقص طبعا.
الصادم بالنسبالي إن رقص صافينار بدأ فعلا ينتشر ويتوغل ويتعمق، أنا بقيت ألاقي بنات في الأفراح بيرقصوا بنفس الطريقة، ولما استغربت لقيت الرد "يابنتي.. صافينار دي معلمة الأجيال"، بس يا سيدي ومن ساعتها اعتزلت من قبل ما ابتدي، وقربت أقاطع الأفراح، مالها الحركات البهلوانية اللي كنت بعملها يعني.