بشوف الناس من تحت

السلام عليكم ,, ومساء الخير جميعا ,, مشكلتي في قصر قامتي .. طولي 145 ستنم بحس بخنقة لما امشي في الشارع , في الأول اخدت الموضوع بكوميديا كنت دايما بتريق على نفسي واقول لأمي قبل ما انزل من البيت
انا خايفة مارجعلكيش يا امي حاسة ان الناس هتدوس علية وانا ماشية في الشارع محدش هيشوفني ده غير اني بشوف الناس من تحت أوي ,, عمالقة بالنسبالي ,, المهم فضلت على الحال ده سنين لغاية ما ابتديت اواجه نظرات الناس اللي مقدرتش اقاومها مدة طويلة واللي كمل علية رفض شاب الزواج مني لنفس السبب , جاتلي عقدة حقيقية بعدها وبقيت افضل الجلوس في بيتي لدرجة اني قدمت استقالتي بس لسة المدير بتاعي مردش علية لأنه مش لاقي سبب للإستقالة ومعتقد اني مجتهدة في شغلي وطبعا مش قادرة اقول له الحقيقة وهي ان السبب كل الناس بتبصلي نظرات مش قادرة استحملها ,, كلامي ده اعتقد انه وضحلكم حالتي النفسية بقت عاملة إزاي ,, من الآخر انا مش عارفة اتعامل مع نفسي ولا مع الناس ولا طبعا مع اسرتي اللي دايما بيواسوني بس بطريقة مستفزة بالنسبالي ,, انا دلوقتي عايشة ميتة .. محبوسة طول الوقت مش عايزة اقابل حد .. وعصبية جدا وحاسة اني محسوبة على البنات بالورق بس ,, انا مش بعترض على خلق الله لكن انا بشر ومش قادرة اقاوم الإحساس السخيف اللي عندي ولا اتعايش معاه .
انا من مدة أخدت بالي ان أحد القراء طبيب للأمراض النفسية فياريت لو يتكرم ويرد علية اكون له شاكرة جدا وجزاكم الله خيرا
نونا