رفاهية إني أتكلم بقت ممنوعة عن روحي بأمر طبيب
رفاهية إني أَعُد ع البحر في وقت الشمس لما تغيب
وأقول أشعار
ويفضل قلبي متثبّت على الحيطة بميتين مسمار
وأموت م البرد
وأنا وانتي -كما العادة- بعيد عن بعض
رسالتك ليّا: أنا جنبك.. وحضني لسه ليك مفتوح
رسالتي ليكي: مكتوبة ف قصيدة شعر من غير روح
في وقت من الحياة بنكون ضعاف القلب والبنية
ومطلوب مننا نفضل نحب ونشتهي الدنيا
وتيجي إزاي؟
رفاهية إني أكون عايش بقت مش ملك إيد العين
بقيت بشبه لمتجوّز من الحزن اللي بيبكّيه
ويعشق ضحكة عشق حرام ولما بيسألوه ..
بيقول: دي ملك يمين!
رفاهية إني أحس بأي جنس حنين
بقِت تشبه لشمس وليل .. مايتقابلوش
في هذا الوقت من عُمري بكون يا حبيبتي محتاجك
تسامحيني على البُعد اللي ماخترتوش
وكوني عارفة من غير حتى ما أقول لك
ورغم إني ولا بشكي ولا جفني الحزين دمّع
أنا جوايا بُكا يكفي يطفّي كل نار قلبك
بعدت شويّة؟ علشانك .. وعلشانك في يوم هرجع!