شهادة عضو بمهندسين ضد الحراسة عن إسقاط النقيب والمجلس الإخواني: المجد للشباب الغاضب وتسقط أساطير الفلول

أكرم إسماعيل: التصويت نتيجة غضب الشباب الثوري اللي مجلس الاخوان حرض علي ضربهم كذا مره وطردهم من النقابة
الحضور كان أغلبه شباب ثوري ومجموعة محدودة من المهندسين العسكريين ومثلهم من المقاولين العرب غير مضمون ولاءهم لمن
قدم المهندس أكرم إسماعيل محمود عضو مهندسين ضد الحراسة شهادته عن الجمعية العمومية اليوم مؤكدا أن محاولة الإيحاء بأن الفلول والدولة القديمة وراء إسقاط المجلس الإخواني وسحب الثقة منه غير صحيحة .. وأوضح اكرم ان شباب المهندسين الغاضبين الذين هاجمهم المجلس الإخواني هم من اسقطوه وليس الفلول وضرب مثل بما حدث في نقابة الأطباء وكيف سقط الإخوان في مواجهة أطباء بلا حقوق . وإلى نص شهادة أكرم إسماعيل:
فى 2006 كان فى جمعية عمومية لنقابة المهندسين فى الصالة المغطاة، وكنا ساعتها اعضاء فى مهندسين ضد الحراسة اللى فيها احنا والاخوان والناصريين، والنقابة كان بقالها سنيين تحت الحراسه، رحنا وكان حشد الاخوان والمتعاطفين معاهم بيشكل 75 % من الحضور، وقابلت واحدة زميلتى من ايام الجامعه قالتى ان بتروجيت جابلتهم اتوبيسات عشان ييجوا واشتكتلى ان هى وزمايلها مش عارفين يصوتوا مع ايه، وهو فى الحقيقه مكنش فى فرصه لاى ك لام، اللى عايزينه الاخوان يومها اتعمل بالكامل، لأن مكنش فى غيرهم والدوله معرفتش تحشد الا شوية مهندسين مش عارفين هما جايين ليه زي زميلتى دى، وده كان مؤشر بالنسبة لى ان النظام منهار، فى الجمعية العمومية اللى فاتت الاخوان كانوا اقوياء جدا بس الشباب بتوع الدستور ومصر القوية والتحالف الشعبي( ساعتها) والديمقراطى الاجتماعى وشباب مرصد وشباب ثورى مستقل كانوا هما القوى المعارضه الاساسية "للمجلس والجمهور الاخوانجى" يعنى مكنش فى اى حشد للدوله ولا شركاتها (اصلا نص المهندسين فى المقاولين العرب اخوان او متعاطفين )، والنهارده الثقه تنسحب من المجلس المحسوب على الاخوان بعض معركة قوية، التصويت بتاع النهاردة هو نتيجة غضب شباب المهندسين الثورى اللى المجلس الاخوانجى حرض علي ضربهم كذا مره وطردوهم من النقابة، وحشد محدود من المهندسين العكسريين (مايجيوش 500 واحد) وحشد زيه من المقاولين العرب (مش عارف هل كلهم صوتوا لسحب الثقه ومش عارف ازاى قيادات المقاولين والدولة ممكن يضمنوا ده) والاغلبية بقى من قطاعات اجتماعية تعادى الاخوان وخسرتهم فى 2011 انتخابات النقابة الفرعية فى القاهرة اللى هى اكبر تجمع هندسى ) .
الحكومه طبعا دعمت تحرك سحب الثقه لكن اللى فاكر ان الدولة حشدت و اسقطت الاخوان النهاردة يبقوا مش واخد باله من حال الدوله دى اصلا، واستسهال ان ده النظام القديم ،طب و كان فين النظام القديم ده فى كل اللى فات ، هناك روافد مختلفة انتجت تصويت اليوم لسحب الثقه و ده ليس تحالف ولا نيله ، والحقيقه تبقى ان فى مزاج شعبي مناهض للاخوان (وهو من كام اسبوع مش خسر الاخوان امام اطباء بلا حقوق ولا ايه؟)، الكلام بقى بتاع الفلول والدولة القديمه هى فى الحقيقه اساطير واوهام عشان المزايده تحلى، الدولة دى تعبانه اوى يا جماعه ومعندهاش غير شوية عساكر، فو النبى براحه علينا شوية....