بالامس اعدت قراءة مقال كتبته يوم 1 نوفمبر 2011 وفوجئت بأنني كما لو كنت كتبته بالامس ، ويبدو اننا نحتاج للعديد من "حبوب تنشيط الذاكرة" لعلاج "الزهايمر الثوري" الذي اصبنا به واعيد اليوم نشره لانه كما تعرفون فالتكرار يعلم "الشطار" .. نعم .. ايه .. لا مشيها الشطار المرة دي عشان خاطري !! سؤال شديد البراءة.. سألني إياه صديق تخدعك ملامحه التي تشبه الراحل يونس شلبي، وتخفي خلفها صحافياً ألمعياً ناجحاً.. تفتكر إحنا بنتسرق حضرتك؟.. لم ينتظر إجابتي.. واستطرد.. أصل يا أستاذ قريت ان دولة رومانيا الصديقة كان عندها ثورة عظيمة، وقتلوا رئيسهم نيكولاي تشاوشيسكو والحربايه مراته بالرصاص، وفرحوا وهللوا وبعدين حصلت حاجات خلتني مش عارف أنام من الكوابيس، وعمال أفكر.. ممكن ده يحصل عندنا؟ أجبته: يا سيدي مصر مش رومانيا، ومبارك مش تشاوشيسكو وسوزان مش إيلينا. وواصل صديقي حديثه وكأنه لم يسمع شيئا: باقولك في رومانيا كان الجيش والشعب ايد واحدة زي ما كان عندنا والشعب الروماني كان بيكح تراب زينا، وشبابه المثقف قادوا الثورة ضد الفساد اللي كان معشش في رومانيا زي ما كان معشش عندنا،.. وضد انعدام العدالة الاجتماعية والفقر اللي كانوا مبتليين بيه عشان أصحاب وصاحبات تشاوشيسكو، وصاحبات ايلينا كانوا بالعين رومانيا وسارقين خيرها زي ما كان عندنا يا أستاذ!! أبعدت نظري عن عينيه المندهشتين وانا اقول بصوت أخفت قليلا من ذي قبل: يا أخي قلت لك مصر مش رومانيا. بدا صديقي وكأنه لم يكن ينتظر ردي أبدا وواصل حديثه: .. وبعدين بعد الجيش ما أعدم مباركشسكو وسوزانينا بتوع رومانيا جه واحد اسمه إيون إيليسكو، وكان من الصف الثاني في الحزب الوطني الشيوعي بتاع رومانيا، وكان صاحب تشاوشيسكو برضه، وجمع «فلول» رومانيا في بتاعة اسمها جبهة الخلاص، ويمكن كان اسمها الاخلاص لشاوشيسكو مش فاكر، وبدأ سعادتك يظبط لواءات المجلس بتاع رومانيا لحد ما سيطر على البلد، وجاب واحد من الثوار ظبطه ومسكه التلفزيون والاعلام كله، وشويه شويه كوِّش عمنا ايليسكو على رومانيا، لكن الشباب الروماني الواعي الثوري حسوا أن الثورة بتتسرق منهم، وصوتهم بدأ يعلا.. قام إيليسكو ده قال عليهم خونة وعُملا للامبريالية، وعندهم أجندات وبيقبضوا، وسحبهم على المحاكمات واحد ورا التاني، والقضاة بتوع رومانيا كانوا في الأصل متظبطين من أمن الدولة بتاع رومانيا برضه، وطسوهم أحكام خفيفة ابو سنتين تلاتة «عبال» ما أخونا إيليسكو يهضم رومانيا، مش بس كده، ده كان بيلعب بالعمال وغير المثقفين والناس الغلابة ويخليهم يهاجموا الشباب الثوري ويقتلوهم عشان مفهمهم ان الشباب دول ضد استقرار رومانيا.. وبعدين سعادتك عمل انتخابات «نزيهة» وانتخبوه رئيس لرومانيا 3 دورات، والثورة الرومانية دخلت المتحف الروماني سعادتك.. وسجلت في موسوعة جينيس ريكورد على أنها ثورة مرات ثور.. و.. ولم أتركه يستكمل حديثه وصرخت فيه.. هوأنا ناقصك حريقة تحرقك أنت وثورة رومانيا.. يا أخي افهم مصر مش رومانيا.. والقاهرة مش بوخارست.. "والشفيق" مش إيليسكو.. "والشفيق" مش إيليسكو.. "والشفيق" مش إيليسكو.. "والشفيق" مش إيليسكو.. مصر مش رومانيا.. مصر مش رومانيا.. مصر.. مش رومانيا شكل الحرامي جديد ولا دي بدله قديمه مستني بيها العيد ويحزّم التحزيمه شايف الخواجه بعيد بيظبّط الأفلام وكل يوم بيزيد الغش في السيمه ٭٭٭ طلع الرصاص م الأخ وانطخ في المغدور مطر الحقايق رخ غرّقنا في المحظور ثورتنا حبّة ورق ولاّ كلام.. وفلول عبّاره عاشقه الغرقْ وقطرنا مكسور؟ twitter@hossamfathy66
