حزب الله ياحمدين؟!

بعد أن أعلن حمدين صباحي المرشح المحتمل للرئاسة، الحرب المقدسة ضد زميله المحتمل محمد البرادعي، علي اعتبار أنه إبليس ولابد في الخرابة، وكل شوية ينط في خلقة العيال بتوع الثورة، ويضحك عليهم.. ويقولهم.. تعالي أوديك لماما يا حبيبي، ويطلع بيهم علي الخرابة عشان الأبالسة الصغيرين يركبوهم، ويبرطعوا بيهم علي الكورنيش، وآهي ركوبة ببلاش، وأجدع من التوك توك والحنطور، مع أنه حتي هذه اللحظة لم يهاجم واحداً من الإخوان المحتملين برضه، جايز لأنهم ناس بركة، ولو قروا عليه عدية ياسين، مش هايلحق حتي يبقي رئيس مجلس محلي، وجايز لأن عندهم فرقة كوماندوز معتبرة، قادرة علي التدخل السريع، وصد أي هجوم محتمل، من بتوع العلمانية والدولة المدنية الملاحدة، اللي ماشيين عريانين في الشوارع، وعمَّالين يغنوا.. طفي النور ياولية.. احنا بتوع المدنية.
وبعد أن انتهت تلك الحرب المقدسة، بطرد فلول البرادعي إلي الطريق الصحراوي، وتطهير البلد منهم شارع شارع.. وزنجة زنجة.. واضربلك كوباية مانجة، زي المخلوع اللي مع إنه عامل فيها عيان ومكسح.. رقع ثلاثة كيلو مانجة في يوم واحد، وكمان بيتزا باللحمة، ده كان ناقص ياكل الممرضات بقي، بعد انتهاء تلك الحرب بالانتصار العظيم، أعلن المرشح المحتمل حمدين صباحي أنه إذا نجح في الانتخابات بإذن واحد أحد، ومن غير مقاطعة، فإنه سوف يتحالف مع حماس وحزب الله! ليه يا محتمل؟! قالك عشان الاتنين دول بالذات بيحاربوا إسرائيل! مع إنك يا أخي ماتعرفش بيحاربوها فين؟! يعني علي الفيس بوك،ولا مجلات الحائط، ولابيدعوا عليها بعد صلاة العشا، وبعدين يطلعوا يفرقعوا شوية بمب في الشارع، ويستخبوا تحت الأرض، عشان الصواريخ الإسرائيلية، تنزل فوق الأعداء بتوع فتح، والبنات المايصة بتاعة لبنان، وتجيب عاليها واطيها.
وسواء كان المرشح المحتمل حمدين يغازل الإخوان بهذا التحالف، أو يقوله عن قناعة، وفي هذه الحالة تبقي كارثة.. فحكاية أن حزب الله وحماس بيحاربوا إسرائيل، مجرد نكتة ولانكت الراجل الجدافي بتاع من أنتم؟! وهانحرر ليبيا من الجرذان والقمل.. لأن حمدين يعلم تماما أن المناضل الثوري حسن نصرالله.. ماشي بيتفلي.. يناضل الآن جنبا إلي جنب، مع الرئيس القفا الكذاب، لتحرير سوريا من الشعب السوري، لدرجة أن السوريين يهتفون ضده، ويحرقون صوره يعني الراجل بيدافع عن مصالحه حتي لو كانت ضد إرادة شعب يريد الحرية، فهل سعادتك تريد التحالف مع مثل هذا الرجل، وميليشياته التي تقتل النساء والأطفال في سوريا، ولا ده تحالف استراتيجي عشان يحددولك النسل في مصر، ويخفوا الزحمة دي شوية، ولا سعادتك شايف إن الشعب السوري يستاهل الحرق بجاز، وحرية إيه اللي عاوزينها دلوقت، ما طول عمرهم مكتومين كتمة الجوزة الخربانة، وما بيفتحوش بقهم إلا عند دكتور الأسنان، اشمعني دلوقت الرئيس القفا بقي كُخة، ولا عشان ربنا أداهم شوية صحة يعني، يقوموا يتفرعنوا علي الراجل الغلبان، اللي عمال يديهم إصلاحات لحد ما مصارينهم طلعت برة.
والأخوة المناضلون الأشاوس بتوع حماس، الذين قتلوا من الفلسطينيين أكثر مما قتل الإسرائيليون، علي الأقل الإسرائيليين كان في قلبهم رحمة، وما رموش حد من فوق البيوت، ولا مثلوا بجثة فلسطيني ورموه في الشارع، زي ما عمل المناضلون بتوع حماس في العدو الفتحاوي وعندما قعدوا في غزة، وأعلنوا إمارتهم الإسلامية المقدسة، ضربوا كل ما له علاقة بالفن أو الثقافة بالجزمة، واشتغلوا بالتهريب والتخريب والابتزاز، فهل تتحالف معهم لو قدر الله يعني ونجحت الشر برة وبعيد عشان يعملو لنا شوية أنفاق لحد ليبيا، ونشتغل كلنا في التهريب، ونقعد في العتبة ونسميها سوق ليبيا الحرة؟! وقبل ما نلم الفرشة، نخطف رجلينا لحد المرشد العام، نحب علي إيده ونرجع؟! وإذا كانت الحكاية تربية دقون ما احنا نعرف برضه نربي دقننا، وبعدين ماخلتش ليه بالمرة يعني في سكتك، علي إيران لأنها بتهرب السلاح لحزب الله، عن طريق الرئيس القفا اللي بياخد عرقه، أو مع المناضلين بتوع طالبان، الذين يحاربون الإمبريالية العالمية، والحمد لله ياعم حمدين.. إنك مش رئيس فعلا.. كان زمان مصر مليانة خيم سودة، وجلاليب بيضا ودقون، وأي شعب عربي يعمل ثورة ضد الديكتاتورية نطلع نحدفه بالشباشب الزنوبة، اللي مهربينها من ليبيا.