فتاة التجمع ل منتقديها: "لما الشباب يغتصبوا البنات مش عايزة حد يزعل"

قالت منى جبران، الشهيرة إعلاميًا بفتاة التجمع، إن هناك بعض الفتيات قمن بانتقادها لتصويرها الشباب المتحرش بها لفظيًا، معقبة: "الناس دلوقتي بتتصور مع الشاب المتحرش كأنه نجم من نجوم المجتمع، البنات اللي بتنتقدني لما 5 شباب يغتصبوا واحدة فيهم، مش عايزه واحدة فيهم تزعل".
وأضافت "جبران"، في تصريحات تليفزيونية مساء السبت، أن مشكلة المجتمع المصري أنه لا يتقبل فكرة إختلاف الآخرين، متابعة: "مسكوا صوري وطلعوني قليلة الأدب، كل فئة في المجتمع بتلبس غير التانية، لازم نتقبل ده".
وتابعت: "أنا مش واحدة فاضية، أنا برجع من الشغل تعبانة وهلكانه، أنا محبوسة دلوقتي في البيت عشان أهلي خايفين عليا، هو ده حال البنت في المجتمع الذكوري اللي احنا عايشين فيه، أنا والدي متوفي وأمي اتشتمت كتير".
يشار إلى أن "منة جبران" أثارت الجدل مؤخرًا، بعد نشرها لمقطعي فيديو ظهر فيهما شابان تحرَّشا بها لفظيًا أثناء وقوفها على الشارع في منطقة التجمع لانتظار الحافلة التي تقلها إلى منزلها.
وفيما دعمها البعض على ذلك لمواجهة المتحرشين، وفضحهم على مواقع التواصل، يرى آخرون أن مقطعي الفيديو لم يحملا أي إساءة لها، بل تضمَّنا تشهيرًا بالشخصين فقط، رغم أن الأمر لا يستحق.