"أتكلمي" مدونة تغضح خطايا الشباب والفتيات فى قضية التحرش الجنسي

لا تعليق...
أطلقت مجموعة شباب مصرية تضم فتيان وفتيات مبادرة شبابية ضد ظاهرة التحرش الجنسي التي اصبحت تؤرق كثير من فتيات مصر.
مدونة "اتكلمي" كانت هي الخطوة الأولى التي قامت تلك المجموعه بإطلاقها بهدف نشر روايات الفتيات اللاتي تعرضن للتحرش.
وعن المبادرة قالت إحدى القائمات عليها، والتي رفضت نشر اسمها، لياهو مكتوب: تقوم فكرة المبادرة على جمع شهادات الفتيات اللاتي يعانين من ظاهرة التحرش في الشوارع المصرية ولكن لا يستطعن البوح بما يتعرضن له بسبب ما قد يسببه لهن ذلك من مشكلات اجتماعية أبرزها معاملة الفتاة على أنها جاني وليست ضحية".
وتضيف "قمنا بتخصيص بريد إلكتروني نستقبل عليه ما تكتبه الفتيات عن تجاربهن مع التحرش، لنقوم بنشره لكشف حقيقة تلك الظاهرة، ومواجهة المجتمع بها لإيجاد حل يواجه تفشيها في شوارع مصر".
ورأت الفتاة التي تنشط في المبادرة، "أن المشكلة تتمثل في أن المجتمع المصري تسيطر عليه تابوهات أخلاقية وفكرية، وهو الأمر الذي تعتقد أنه "يصعّب من مواجهة ظاهرة التحرش، لأن المجتمع يضع اللوم في النهاية على الفتاة وليس على الجاني".
ومع ظهور التيار الديني وأنصاره بقوة في الشارع المصري وعلى المستوى السياسي منذ ثورة يناير، يتوقع القائمون على المبادرة مواجهة صعوبات فكرية أكثر في محاولاتهم للتصدي لتلك الظاهرة المجتمعية.
وتقول إحدى المشاركات في الحملة إن "التحرش لم يعد مرتبطا بما ترتديه الفتياة من ملابس، فمن ترتدي النقاب تتعرض لما تتعرض له غير المحجبة من تحرش، كما أنه لا يقتصر على مرحلة عمرية معينة، فجميع الفتيات عرضة للتحرش في مصر"، وهو ما يكشف أن فكرة التحرش لم تعد مرتبطة بالتدين من عدمه.
إطلاق مبادرة "اتكلمي" جاء بالتزامن مع تدوينة نشرتها فتاة مصرية تدعى شيرين ثابت على حسابها الخاص على موقع فيسبوك تحت عنوان "موقع اباحي"، تحكي فيها الكثير من الحقائق المتعلقة بظاهرة التحرش في مصر، وهو ما لاقى تفاعلا كبيرا من جانب مستخدمي فيسبوك، وكذلك تويتر.
وفيما يلي نص التدوينة:
قررت أحرّض كل صاحباتي اننا نكتب بمنتهى الصراحة والوضوح عن يوميات البنت في شوارع مصر ومع المتحرّش المصري. قررت أحاول أقرف الناس على الفيسبوك وتويتر بحكايات في غاية القرف والسفالة، ماهه إحنا مش هانشيل الهم لوحدنا بأه. شكراً لسعة صدوركم و حفظها الله من الايادي الطويلة.
#هل_تعلم ان غالبا اي راجل طويل عريض يشوف بنت بتتمسك من أي مكان في جسمها بيتفرّج و مابيحاولش حتى يقول كلمة للمُتحرّش؟
#هل_تعلم ان البنت ممكن جداً وهي ماشيه في الشارع تسمع اي عبارة عن اي تفاصيل في جسمها و حتى عن أعضائها التناسلية؟
#هل_تعلم ان ممكن جداً واحدة (منقبة) تبقى واقفه في اوتوبيس و فجأه يتم التحرش بيها جسدياً و بكل الطرق الممكنة؟ و #هل_تعلم ان ماحدش بيتحرّك غالباً؟
#هل_تعلم انه من الغريب ان البنت تخرج وتروّح بيتها من غير ماتسمع كلمتين تلاتة عن اراء المواطنين في صدرها؟ وبكل الألفاظ الممكنة؟
#هل_تعلم ان لو لبس البنت مش عاجب سيادته بيعتبر التحرّش بيها حق مكتسب له؟ والغريب هو ان الناس تحاول تمنعه؟
#هل_تعلم ان في واحد غبي على تويتر بيسألني دلوقتي انتي واثقة من الكلام ده؟ و عرفتي منين؟
#هل_تعلم ان سواق الميكروباص مرة طلع نص جسمه من الشباك و شتم البنت كل الشتايم الأبيحة هي و أهلها عشان زرارين الشيميز بتاعها مفتوحين؟ ولما اتخانقت معاه شتمني وكان هايضربني و الرجاله
اللي في الميكروباص مانطقوش؟
#هل_تعلم ان مرة واحد على سلّم المترو كان نازل جنبي بيقولي أقذر الألفاظ ولما شتمته كان هايضربني و اتلموا الناس يلوموني انا عشان صوتي عالي؟

#هل_تعلم ان في خان الخليلي شباب بيعاكسوا 24 ساعة بمنتهى قلة الادب ولو اتخانقت معاه هايبجّح و يقل ادبه اكتر ؟؟ عن تجربة
#هل_تعلم ان مافيش اي فرق بين قذارة المتحرشين مع المحجبة و قذارة المتحرشين مع الغير محجبة؟ وماينفعش حد يفتي في ده غير بنت جربت الحالتين.
#هل_تعلم ان ممكن جداً كل فترة تقابل واحد في الشارع قرر يفتح بنطلونه ويفرّج البنات على عضوه الذكري بالعافية؟
#هل_تعلم ان مافيش بنت فاتها أي لفظ أبيح في شوارع مصر؟؟؟ كلنا بنسمع كل الكلام اللي ممكن أي حد يتخيله؟؟؟ وبنحمد ربنا انها جت على قد الكلام ومامدّش ايده؟؟؟
#هل_تعلم ان لو بنت مشيت في الفجالة هاتتعاكس بمعدّل كلمة مش محترمة كل 3 ثواني؟ و #هل_تعلم ان حصل مشكلة كبيرة بسبب كده من اسبوعين لإن اصحاب المحلات هرّبوا المتحرش اللي ضرب البنت لما شتمته؟
#هل_تعلم ان في واحد تاني على تويتر بيقولي مدام البنت لابسه محزّق يبقى التحرش عمل ايجابي؟
#هل_تعلم ان بعد عملية التحرّش بتفضل البنت متوترة و اطرافها ساقعة وفاقده القدرة على الكلام لمدة تعتمد على طريقة التحرش؟
#هل_تعلم ان أكتر من نص المُتحرش بهم بيتكسفوا يحكوا لأهلهم من كتر البشاعة؟ يعني لو حد قالك ترضاها لاختك وقلت اختي بتلبس محترم، لا يا بأف اختك بتتعجن بس انت اللي ماتعرفش.
#هل_تعلم ان في انسان على تويترا تعليقاً على موضوع خان الخليلي بيقولي: يبقى انتي عايزة كده ليه بتروحي هناك وانتي عارفة؟
#هل_تعلم ان اي بنت هاتقف في الشارع مستنية تركب او مستنية حد ، عادي جداً يعدي عليها عربيات تفتحلها الباب و البأف اللي جوة يدعوها للدخول؟ على اعتبار انها اكيد عاهرة الى ان يثبُت العكس؟ خصوصا في شارع خاتم المرسلين هرم
#هل_تعلم ان لما صديق حكالي على جرأة حرامي في سرقة الموبايلات في المترو جاتلي هيسترية ضحك؟ باعتباري مُت موتات احسن من دي بكتيييييييير !!! مستغرب من جرأته في سرقة موبايل. مش في سرقة قفشة!
#هل_تعلم ان تلت تربع رجالة تويتر منقسمين لنص شايفني ببالغ خصوصا على التحرش بالمحجبات ونص شايف ان البنت هي اللي غلطانة بسبب لبسها؟ وواحد عايز يوصفلي احساس الراجل لما بيشوف لبس ضيق؟
#هل_تعلم ان رداً على كلامي عن التحرش بستقبل بعض التحرشات على تويتر والفيسبوك حالاً؟
#هل_تعلم اني في ظل تلك الظروف العصيبة كل الذكور اللي قابلتهم في حياتي في اي مكان و في اي ظروف قالولي نفس الجملة؟ : انا عمري ما عاكست بنت
#هل_تعلم ان ممكن الناس تعدّي للمتحرّش الفاظه السافله و كلامه عن أكثر أجزاء جسم البنت خصوصية وتقفيشه كمان بس لو البنت قالتله #احا يبهدلوها؟
#هل_تعلم ان بسبب صديقنا المتحرّش مكن بنات ماتخرجش من بيوتها اساساً و مايمارسوش حياتهم بصورة طبيعية؟
#هل_تعلم ان صديقتي مابتلبسش غير اللون الاسود بسبب التحرش ويوم ماتلوّن بيبقى يوم اسود عليها؟ مأتم إجباري
#هل_تعلم ان البنات ممكن تحكي حكايات التحرش دي للأبد ومش هايخلّصوا؟
#هل_تعلم ان الملايين من الشباب اللي بيتحرّشوا بالبنات دول هم نفس الناس اللي دخلت فيلم شارع الهرم هم هم اللي انتخبوا الحرية والعدالة؟
#هل_تعلم ان ربنا طلب منك تغض البصر؟ #هل_تعلم ؟ سؤال لمرضى تويتر
#هل_تعلم ان صديقتي اللي معاها اليكتريك في شنطتها سوّاق التاكسي اعجب بيها وقرر يخطفها في عز الضهر ووسط البشر والزحمة و ماسابهاش غير لما ضربته؟
#هل_تعلم ان في حد بيرد على موضوع ربنا قال غض البصر و بيقول، ماهه طلب من البنت برضه الاحتشام قولي الحقيقة كاملة؟

#هل_تعلم ان التحرش الجنسي وصل كمان لمرحلة ان في بنات بتتحرش بالولاد؟ الحق يقال يعني.
#هل_تعلم ان في واحد على تويتر رده على موضوع الألفاظ السافلة في الشارع ان البنات كمان على تويتر بأوا بيشتموا براحتهم؟
#هل_تعلم ان لمسة إنسان لجسم فتاة مايعرفهاش بدون إرادتها بقت مسألة وجهة نظر؟
#هل_تعلم ان أول حادثة تحرّش كبيرة حصلتلي ومش هاقدر انساها ابداً كان معايا اتنين صاحباتي وكنّا في رابعة ابتدائي؟
#هل_تعلم اني اتعلمت الشتيمة على ايد المتحرشين؟
#هل_تعلم ان انا نفسي يبقى عندي اليكتريك؟ و اي سلاح ادافع بيه عن نفسي؟

#هل_تعلم انه راجل عنده 60 سنة ودقنه قد كده و بيفصص جسمها حتة حتة بمنتهى الوقاحة و بعدين يبصلها بقرف ويبص الناحية التانية؟

بطنكوا وجعتكوا؟ معلش، #هل_تعلم ان عادي جداً ان المتحرّش يضرب البنت من ورا في وسط الشارع متخذاً في ذلك تامر حسني قدوة و يضحك و يجري ولا كإنه عمل حاجة؟
#هل_تعلم ان ده اكتر يوم رجالة تويتر قلوا ادبهم عليا فيه؟ فعلاً الحقيقة بتوجع وكل واحد باين عليه جداً هو انهي نوع من البشر
#هل_تعلم ان انا مش ناوية اسكت؟ دوّر انت على حل انا مش عارفة اعمل غير اني ارغي
#هل_تعلم ان جملة التحرير وحش عشان فيه تحرش دي أكتر جملة كوميدية في الدنيا؟؟؟؟
#هل_تعلم اني في مرة من المرات بطرد الرجالة من عربية السيدات و عشان يغيظني نزل من الباب اللي انا واقفه عنده مع ان الباقي مفتوحين لمجرد انه يزنق نفسه فيا وهو نازل و يجري؟
#هل_تعلم ان المعاكسة الرقيقه اللي هي كلمة بسيطة حلوة وخلاص بقت رفاهية دلوقتي وانقرضت اساسا؟ واحدة صاحبتي فرحت جدا عشان واحد قالها شعرك زي موج البحر :)
#هل_تعلم ان رمسيس مكان مرعب ليا لإن اكيد اكيد هاتعرض للمعاكسة والتحرش هناك؟
#هل_تعلم انها مش محروسة ولا اللي فيها آمنين ولا اي حاجة من الأحلام دي من سنين طويلة؟
هو انت كنت فاكر الأمن مستتب؟ طب #هل_تعلم ان مرة واحد راكب موتوسيكل وقف قدامنا زماااان عند المدرسة واحنا بنات في اعدادي وفتح زراير القميص ولقيناه لابس تحته براه وبيضحكلنا ويشاورلنا واتفزعنا؟
#هل_تعلم ان التحرش الجنسي ده بيعتبر اغتصاب علني للبنت؟ عارف اختك اغتصبوها كام مرة؟
#هل_تعلم ان كل مابيعدي جنبي ولد في الشارع ايدي بتتحوّل لوضعية البوكس أوتوماتيك وضربات قلبي بتزيد؟
#هل_تعلم ان سن المتحرش بيكون 12 سنة فيما فوق؟
#هل_تعلم ان التحرش في الشارع و الجامعة والفيسبوك و تويتر و التليفون و الموبايل؟
#هل_تعلم ان انا ماعنديش حل للمشكلة دي؟ ماحدش يسألني تاني بأه !!! ماهه لو عندي حل ماكنتش قرفتكوا كده
#هل_تعلم ان كلهم في الشارع بقوا بالنسبالي شبه بعض؟
#هل_تعلم ان كونك متحرش وحيوان ده بيفقدني أنا جُزء من إنسانيتي؟؟ انا ممكن أعمل مصيبة بسببك!
#هل_تعلم ان الكلام في الموضوع ده مكانش فكرتي؟ انا قررت كده لما لقيت اتنين من صاحباتي بالصدفة البحتة قدامي عالتايم لاين بيتكلموا عن التحرش وواحدة منهم في حالة انهيار؟