الزوج ليس ملكية خاصة

صباح الخير استاذة نيفين
مشكلتي مع جوزي زي ما هوة ما بيقول اني بعاملة على طريقة الملكية الخاصة انه هوة بقى بالنسبة لية ملكية خاصة خصوصا بعد الجواز , احنا انهاردة بعد قصة حب قبل الجواز تحولنا الى اتنين ماسكين السلاح لبعض .. صحيح انا غيورة جدا وبعترف بكدة لكن انا بحافظ عليه وعلى كيان بيتي من الخراب وصحيح انا مش ماسكة عليه اي تصرف يدينه لكني بغير في العموم .. ما اعتقدش ان فيه ست في مصر بتسيب لجوزها الحبل يتصرف زي ما هوة عايز والا كانت خربت , مشكلتي معاه اننا فقدنا تماما كل وسائل التفاهم وكل انواع الحوار ومش عارفة ارجع الحالة الجميلة اللي كانت بيننا ازاي كنا متفاهمين جدا والكلام بيننا مش بيخلص انهاردة بنلاقي موضوع مشترك بالعافية .. مش عارفة اعمل ايه ؟
م . ع
فضفضة
محررة الصفحة .. نيفين حجازي
يا استاذة ميم .. مفيش حاجة اسمها ملكية خاصة ولا فيه حاجة اسمها كل ستات مصر مش بيسيبوا الحبل لتصرف الزوج .. هوة مش ابنك على فكرة دة جوزك يعني شريك الحياة وقبل ما يكون شريك فيها المفروض يبقى صديقك المقرب وعلى الأساس دة تصح العلاقة وتستقيم .. انتي بتسألي نفسك عن سبب المشكلة والإجابة عندك أساسا .. لما كنتي متفهمة وبسيطة ومش قاعدة مراقباه كانت العلاقة فيها تفاهم وتناغم وكان فيه كتير من الموضوعات المشتركة وأول ما إبتديتي تعامليه زي أبلة الناظرة طبيعي جدا يوصل الى كل ما وصل اليه هذا الزوج التعيس .. منتظرة منه ايه وانتي محسساه بالمراقبة والغيرة بدون مبرر ودة كلامك .. ان مفيش تصرف عمله دليل على إدانته بالخيانة مثلا .. طيب ليه سبقتي وإفترضتي انه هيعمل كدة .. نوع من الدفاع الإستباقي مثلا ؟ .. هية مش حرب يا استاذة دي علاقة بتتنفس وتعيش زينا بالظبط .. إذا جالنا ضيق نفس في يوم نتيجة اي وقعة صحية مش هنقدر نكمل وهنحتاج طبيب .. سيبي للراجل فرصة يرجع زي ماكان ودة مش هيحصل إلا لما تعيدي الثقة اللي كانت بينكم من جديد وبطريقة حقيقية علشان يقدر يصدقك تاني .. مفيش حل غير كدة .. وارجوكي ما تخربيش على نفسك أكتر من كدة وإسمعي النصيحة .
[email protected]