أتنصب علية بجوازة

السلام عليكم
مشكلتي خطيرة لأني اتظلمت فيها بجد .. انا متزوجة من ثلاث سنوات ومن الأسبوع الأول وعلاقتي بزوجي غريبة فهو من اول يوم بعد قضاء ليلة الزفاف راح نام في غرفة تانية ولما سألته قال لي انه لسة مش متعود ينام بجانب حد فقلت يمكن عنده حق وكل واحد له طباعه ومع الوقت هيتحسن وكمان بيسهر طول الليل ويصحى شغله بالعافية ده تقريبا مش بينام خمس ساعات على بعض وكلمته كتير علشان صحته وعلشان برضه ده وضع غريب ، لكن مفيش فايدة هوة بيقول انه متعود على السهر طول الليل من أيام ما كان في بيت أهله ، لكن الأغرب من ده كله كمان ان علاقتنا الخاصة قليلة جدا ومن اول شهر زواج وفضلت صابرة المدة دي كلها قلت يمكن كل الناس كدة بس للأسف لما اتكلمت مع من أثق فيهم من الاصدقاء اكدولي ان الوضع ده غريب ، المهم ابتديت أحط الموضوع في دماغي وفضلت أساله عن سبب إهماله لية وعدم جلوسه معايا حتى يوم الإجازة دايما بيفضل الجلوس في صمت ولواحده ولما ضغطت عليه اكتر ابتدأ يتعصب وانفجر فيه وصارحني بانه مش بيحبني وان جوازه مني بسبب ضغط من أهله .. طبعا الكلام اول ما سمعته اتصدمت لأني مفهمتش برضه ليه وانه مش منطقي ان راجل يتجوز واحدة مش عايزها طيب ساب ايه للبنات ده حتى البنات مش هيتجوزوا اليومين دول إلا برضاهم ،، فضلت ورا الموضوع وصارحت والدته علشان اعرف تفاصيل الحقيقة وللأسف يارتني ما سمعت قالتلي شوفي يابنتي انتي كنتي الأمل في إصلاح حال ابني لانه أتعرف على واحدة من مده طويلة وعلمته الإدمان وصرفنا كتير عليه علشان يتعالج وانه رجعلها كذا مرة وبعد كل مرة علاج يرجع تاني لما اتخرب بيتنا لكن مع اخر مرة علاج قررنا انه يتجوز لان الجواز والمسئولية أكيد هيخلوه يتلهي عن العيشة السودة اللي كان عايشها .. ده كان كلام والدته باختصار شديد ، رجعت بيتي مصدومة صدمة عمري من كل النواحي اني أصلا اتخدعت منه ومن عائلته من البداية ومن انه قال لي ان مشاعره مش معايا أصلا وهوة عايش معايا تأدية واجب واعترف فعلا بانه بيحب واحدة تانية والظاهر ان الواحدة دي اللي والدته قالتلي عليها .. انا لغاية دلوقتي من الصدمة ما قلتش لأهلي ومش عارفة اواجههم ازاي أصلا مش مصدقة نفسي لكن بحمد ربنا اني معنديش أولاد جت كدة لواحدها من غير اي موانع .. انا دلوقتي مش عارفة اعمل ايه انا عايزة أطلق منه لأني كرامتي بالدنيا ده غير أنهم كلهم كذبوا علية يعني لو همة صارحوني من الأول وقالوا انه في أزمة واني هكون طوق النجاة كان ممكن اقبل أو لو هوة لواحده اللي كذب علية وأهله ما عندهمش فكرة كان برضه ممكن اعمل خاطر لأهله وأحاول اصلح حالة واعيش في هدوء لكن الأهل اكنهم دبسوني فيه وشيلوني مسئولية فشل ابنهم وغباؤه وانحرافه .. مش عارفة اعمل ايه خصوصا ان خراب البيت مش سهل ومش قادرة أتصور في نفس الوقت اني منصوب علية بالمنظر ده .. ارجو الرد سريعا وشكرا

فضفضة
محررة الصفحة .. نيفين حجازي
حياة بنيت على كذبة كبيرة بالطبع وخطيرة وما سيترتب على وجودك مع هذا الرجل مؤلما للأسف .. اعتقد أن تسرعين في أخبار اهلك بالأمر ليتولون إنهاء الموقف .. سكوتك لا فائدة منه الآن فالكذبة لم تكن عليكي فقط بل على أسرتك بأكملها .. أما عن قلقك بسبب خراب بيت فللأسف هو ليس بسهل فعلا لكن انتي صاحبة القرار .. هل تستطيعين ان تقومي بالدور الذي اختارته لك والدة زوجك ؟ اعتقد انه صعب وهذا واضح من لهجة رسالتك .. إذن الأمر محسوم .. أخبري اسرتك فورا .. ويعوض الله عليكي ما حدث خيرا .
[email protected]