جوزي بيكلم واحدة غيري وعايزة أتطلق..

أنا عاوزة أبعت مشكلتي لفضفض لنا، علشان أنا محتاجة حد يفيدني برأيه السليم، أنا على طول بتابع الموقع، وطريقة علاج أي مشكلة بصراحة بتعجبني أوي.
أنا متزوجة من أربع سنين وعندي بنتين، اكتشفت أن جوزي بيكلم واحدة في التليفون، وبيبعت لها رسائل على الموبايل -رسائل جنسية- ولما كلمت الرقم البنت قالت لي إنه على طول بيكلمها، وأنا لما سألته أنكر، وقال إن ده رقم واحد بيعاكس وهو بيشتمه، المشكلة دلوقتي إنه نزل من نظري جدا، وأنا مش قادرة أنسى الرسايل دي؛ حتى بعد ما هو حاول يبرر موقفه السخيف ده وقال إنها واحدة مش كويسة، وإن هوّ عايز يعرف مين اللي بعتها له، وأن هوّ عمره ماعمل حاجة غلط قبل وبعد الجواز.
أنا خلاص مابقاش عندي ثقة فيه خالص، وكنت عايزة أنفصل عنه لأنه بيكدب بطريقة مش طبيعية، وبيعرف يألّف بطريقة مش عادية، لأنه هو وأهله بيعرفوا يكدبوا جدا، أنا كل مرة باحاول أصلح علشان بيتي وبناتي؛ بس أنا خلاص فقدت الثقة في كل الناس، بقيت مش باصدّق حد، وبعد ما رجعت له بقى ليّ هدف واحد، إني أكدب عليه وأخدعه زي ما هو بيحاول يخدعني ويغشني.
أنا حاسّه إني مهزوزة جدا، ثقتي بنفسي صفر، مش حاسه بوجودي ولا حياتي، هو على طول بيحاول يهزني وما بياخدش رأيي في أي حاجة علشان أمه مش سيباني هي كمان في حالي؛ من أول يوم جواز وهى بتحاربني، بس أنا ماعرفتش غير لما بدأت تتكلم قدامي، وإزاي إني أنا اللي بامشيه، وإزاي إن هو بيسمع كلامي، فيحاول يثبت لها عكس الكلام ده، أنا زهقانة أوى من كل حاجة في حياتي، حتى من نفسي لأني حاسّه إنى قد إيه ضعيفة في كل حاجة حتى في شخصيتي مش عارفة، نفسي أرجّع ثقتي بنفسي زي الأول، إزاي أرجعها تاني؟ إزاي أعرف أتعامل مع الشخصية دي؟ أنا ساعات باحس إني بقيت عبيطة، وهو بيتعامل معايا على هذا الأساس، أنا خلاص بقيت مش بافكر كويس، وحسه أني محتاجة علاج نفسي.

MEMO_LOVE9444


صديقتنا العزيزة.. شكرا على ثقتك فينا وأتمنى أننا نقدر نساعدك في مشكلتك دي اللي بتواجهها كتير من السيدات، والحقيقة أنا مش شايفة إن حلها في الطلاق، أو إنك محتاجة علاج نفسي زي ما بتقولي، وهاقول لك ليه!
الطلاق دلوقتي وإنتِ معاكي بنتين يمكن يخلق لك مشكلات أكبر، ويمكن بعد كده لو فكرتي تتجوزي تلاقي نفس المشكلة عند الرجل الجديد، وهيزيد عليهم مشكلات بناتك اللي هيعيشوا تجربة الحياة المفككة، ومن شرحك لمشكلتك كمان أقدر أقول إنك فاهمة إنتي فين، وأيه المشكلة وأيه علاجها؛ بس محتاجة تفتشي جواكي شوية وتدوري على الأنثى اللي تاهت وسط مسئوليات الأم وست البيت.
الحل يا صديقتي مش إنك تخدعيه زي ما خدعك أو تكذبي عليه.. إطلاقا، مش هتصلحي الغلط بغلط، بس برضه كل البني آدمين بيغلطوا؛ فلازم نعدي ونسامح ونغفر وننسى.
الحل إنك تنتبهي لروحك، تفكري في نفسك وأنتي معاه، سيبك من موضوع إن الرجالة عينهم زايغة، وإنهم كدابين، خليه يكلم ألف واحدة في التليفون، بس اعرفي من جواكي إنك واحدة غير الألف دول، إنتي الوحيدة اللي مراته واللي تملكيه فعليا، وما تخليش ده كله يدمر روحك، اهتمي بنفسك أكتر، اهتمي بشكلك، أعملي الحاجات اللي بتحبيها، ما تفكريش تصلحي بيتك، صلحي جسمك وشكلك واسألي نفسك إنتي عاوزة إيه واعمليه.
من فترة قريت قصة حلوة عن ست بيت عادية زيي وزيك، كان كل حلمها إنها تلبس فستان كتان أبيض بسيط وتقعد على شط البحر والهوا يطيّر شعرها، لكن فضلت عايشة سنين مع جوزها في المدينة الخرسان اللي عمرها ما شافت بحر، بتكنس وتمسح وتحضر الأكل وتحتمل كل سخافات الحياة، وبعد 15 سنة صحيت يوم الصبح وعملت حاجات كل يوم نضفت وعملت الأكل ومسحت الأرضية ولبست أحسن فستان عندها ومسكت بندقية جوزها وضربت نفسها بالرصاص.
مؤلمة.. مش كده، لأنها يأست من أن تحقق حلم بسيط زي ده، ماتخليش اليأس يقتلك، إنتي مش مجرد بيت وزوج وبنتين، إنتي بني آدم له حقوق وله أحلام، تبرير جوزك السخيف لموضوع الرسايل معناه إنه ضعيف، إنتي أقوى منه بكتير، وكذبه معناه إنه محتاج لك وخايف يقول الصدق فيفقدك، أما هو ليه عمل كده فيمكن يكون الملل، وممكن يكون الفراغ، وممكن يكون محتاج تغيير في حياته، متهيأ لي إنتي كمان محتاجة لتغيير، عاوزة تعلميه الأدب حسسيه إنه هيفقدك، مش بإنك تسيبي البيت وتاخدي بناتك وتروحي بيت أهلك، أكيد دي لعبة قديمة ومابقتش تأثر لأنه عارف أن أمومتك أقوى من أنوثتك، وأنك هترجعي أو زي ما قولتي "عبيطة".
خليه يحسّ إنه هيفقدك وإنتي عايشة معاه في نفس البيت وبتنامي معاه في نفس السرير، حسسيه إنك ما باقتيش العبيطة بتاعة زمان، وإن في حاجات في دماغك هو مايعرفهاش ومش هيقدر يعرفها طول ما هو بعيد، اخلقي لنفسك دنيا وأحلام وطموحات في المستقبل تعوضك الفراغ اللي بيسيبه لما بيروح يشغل نفسه مع ستات تانيين، وخليكي أحلى، زي ما قلت لك أهتمي بنفسك، وخصصي وقت ليها، طلعي فساتينك القديمة وقمصان نومك، حطي شوية ميك أب خفيف في البيت لو مش متعودة تحطي، اخرجي، أتمردي، وأعملي الحاجات اللي بتفرحك، اتحرري من الهموم شوية، الدنيا مش هتقف لو أخدتي إجازة من جوازك ومسئولياتك أسبوع وسيبتي البيت يضرب يقلب، لكن يمكن تتدمر لو فكرتي في الطلاق.
ارجعي لروحك، واعرفي إن السعادة بتنبع من الداخل، وإن تصرفات جوزك لو غلط مش لازم تدمر حياتك إنتي لأنك كائن مستقل، أعرفي تفصلي بين روحك وبين اللي حواليكي، قدري نفسك هتلاقي اللي حواليكي بيقدروكي.

لو عايز تفضفض لنا دوس هنا