سمير صبرى: سعاد حسنى لم تنتحر

كشف الفنان القدير سمير صبرى، عن أن السندريلا سعاد حسنى، لم تنتحر وانما تم قتلها بهدف السرقة لإن حينها كان يتواجد معها مبلغ مالى كبير عقب بيعها نسخة فيلم الراعى والنساء فهناك من يعلم ذلك وتتبعها وقتلها بهدف السرقة، وأوضح أيضا انها تتمتع بعزة نفس عالية لدرجة أنه كانت تحتاج إلى المال فى بعض الوقت وعلى الرغم من عرض بعض الدول العربية مساعدتها فكانت ترفض ذلك.
جاء ذلك خلال استضافته الليلة، فى برنامج مصر الجديدة الذى يقدمه الإعلامى معتز الدمرداش، عبر قناة الحياة 2 حيث أوضح قائلا عن وفاة السندريلا ُ: تقرير الطب الشرعى اوضح ان مفيش كسر حتى فى صباع فى ايدها.. اذا هى مش انتحرت ورمت نفسها والا كان هيبقى فى جروح كتير.. هى اتخبطت فى شفتها وشالوها ورموها من فوق على حاجة من ورا العمارة.. عشان كده نزلت مفيهاش كسر... والهدف من ذلك كان السرقة لانها كانت بايعة نسخة من فيلم الراعى والنساء فكانوا عارفين ده .
وأضاف: سعاد حسنى متقتلتش عشان المخابرات او قضايا سياسية زى ماتقال ولا عشان هى معاها مذكرات عن السياسين.. الموضوع كان بهدف السرقة وده نتيجة التحقيق اللى انا عملته .
وتابع: سعاد حسنى كانت بتتمتع بعزة نفس عالية جدا.. وكانت محتاجة فلوس فى وقت وانا كنت عارف ده.. والدول العربية عرضت عليها مساعدتها ولكنها رفضت تماماً.. وحتى فى دولة اجنبية سكنت فى لوكاندة كان صاحبها مصرى... ومكنش راضى ياخد منها تمن الاقامة.. نزلت اشترت لمراته هدايا بقيمة المبلغ.. عشان ميبقاش عليها حاجة لحد .
وأتم حديثه قائلاً: التحقيق اللى عملت عن مقتل السندريلا انا كنت سعيد بيه جدا.. لانه كان اول تحقيق تلفزيونى فى التوقيت ده.. وخرج بشكل كويس جدا والناس كانت بتستناه .