سن إبرة

الثورة طلعت صيني!!

يا أخي الأمريكان دول لهم حاجات غريبة, قرأت هذا الأسبوع عن دراسة اعدها مركزان من مراكز البحث هناك تقول ان تغير مناخ الصين هو السبب في اندلاع ثورة يناير!! شفت هبل العلم لما يستخدمه أحمق في تمرير خيال مريض؟!
وشفت ايضا هبلنا احنا اوصلنا لاي درجة؟‏!‏ امريكي تعبان مستخسر فينا اننا نكون ثوارا‏,‏ لا وإيه‏..‏ تغير المناخ في الصين مش في مصر‏,‏ يعني كانت تبقي مبلوعة لو قال إن الحر عندنا اصاب الناس بالزهق‏,‏ فخرجوا من بيوتهم لقوا نفسهم كتير ومش لاقيين حاجة يعملوها‏,‏ قالوا ما تيجي نعمل ثورة‏,‏ وربنا وفقهم والنظام طلع خرع وكان الحر مفرهده هو كمان فسقط بسهولة‏!!‏ لكن ده الثورة قامت في الشتاء؟آآآه‏..‏ يبقي الناس ما كانتش لاقية بطاطين كفاية تتغطي بيها في البرد‏..‏ خرجت تدور علي حاجة تولعها تدفي عليها مالقتش غير النظام ولعت فيه‏!!‏ بس تصدق انها نظرية يمكن قبولها‏!!‏ هو احنا مش كل حاجة عندنا صيني؟‏!‏ كل شيء حواليك صيني ومن النوع المضروب كمان‏,‏ بداية من الشبشب اللي أنت ماشي عليه‏..‏ وحتي الجيل اللي ملغمط شعرك بيه‏,‏ ياراجل ده حتي صاحبك‏..‏ صاحبك اللي انت عارفة‏..‏ طلع صيني‏..!!‏ ثم هي الثورة كانت فلحت عشان تبقي من النوع الفاخر‏..‏ الفرنسي مثلا أو حتي الاوكراني؟‏!‏ اكيد صيني طالما حصل كل اللي احنا شايفينه‏,‏ لا أهداف تحققت‏..‏ ولا سياسات تغيرت‏..‏ ولا دولة تطورت ده حتي الثوار بقوا رد سجون وممرمطينهم في النيابات والمحاكم‏,‏ ومش بعيد سوزان مبارك تسافر سويسرا ونوارة نجم تدخل السجن أو حمدين صباحي يشرف في طرة في نفس زنزانة جمال مبارك‏..‏ بعد ما يكون جمال سافر سويسرا مع ماما طبعا‏!!‏
عموما مش مشكلة‏..‏ما احنا بقينا ملطشة للي يسوي واللي مايسواش‏..‏ بدليل الأصابع اللي نازلة لعب في مصر‏..‏ وياولداه‏..‏ واضح ان اصحابها نسيوا يقصوا ضوافرهم ودوه سبب الدم اللي احنا شايفينه‏!!‏ يعني لافيه عنف شرطة ولابلطجة ميليشيات ولا عربدة جبهات‏..‏ الحكاية وما فيها اصابع لها اظافر بتلعب‏..‏ فطبيعي تجيب دم‏!!‏ وكله كوم والصباع القادم إلي ساحة اللعب كوم تاني‏!!‏ صباع ما يقدرش عليه ولا الرجل الأخضر ذاته‏,‏ وهو ده اي صباع؟‏!‏ ده صباع روبي ياعم‏!!‏ ألم تقرأ تصريحاتها المنشورة بجريدة المصري اليوم والتي أكدت فيها في بيان عاجل لم تتلق وكالات الانباء نسخة منه فنقلته عن الصحيفة التي انفردت بلقاء المجاهدة روبي؟‏!‏ عموما لمن فاته نصف عمره ولم يقرأ تصريحاتها الحاسمة اقول له ان الست روبي أكدت ان افلامها محترمة جدا جدا جدا‏..‏ وتوعدت بوضع اصبعها في عين التخين لو قال غير ذلك وتجرأ علي انتقاد افلامها‏!!‏
من جانبهم أكد عدد من خوابير الفضائيات الاستراتيجيين ان تصريحات روبي تشبه إلي حد كبير إعلان دولة عن امتلاكها سلاحا نوويا لردع جارة لها او عدو‏,‏ ومنعه من مجرد التفكير في مهاجمتها‏,‏ وبالتالي فان إعلان روبي نيتها وضع صباعها في عين من ينتقد افلامها يضمن لها تجنب دخول معركة من اصله‏,‏ لكن بعض الخبثاء اكدوا ان هناك من يتمني ان تضع روبي صباعها مش بس في عينه لا وفي اي حتة بس هي ترضي وتعملها‏,‏ خصوصا من يدعون العلم والافتاء من النصابين الذين ينتحلون صفة شيوخ ولايمارسون إلا الفتوي في النصف الاسفل للمرأة فقط‏,‏ سعادتك ح تقوللي اني ظالمهم لان صباع روبي في النصف الأعلي‏..‏ ياباشا ما تقلقش ماهو معظم النار من مستصغر الشرر‏,‏ والصباع هو مستصغر الشرر‏,‏ وبعدها الشيخ بلبوص افندي عريان‏..‏ متخصص فتاوي البول والحيض وما تحت القفطان‏..‏ ح يولع في الباقي وتبقي حريقة‏!!‏
طرف الخيط
لو تحقق ترشيح البعض مزور برخصة وسارق مقالات مصطفي امين وتحقيقات زملاء صحفيين لتولي رئاسة الوزراء‏..‏ أكيد الحكومة الجاية ستكون مهمتها سرقة الشعب‏!!‏
رابط دائم :