حصري مصري "3".. السيسي يستعين بتوفيق عكاشة

هذه ليست سلسلة مقالات.. بل حلقة "توك شو" طويلة أو حلقات.. عنوانها هو.. "فى الإعجاز الاعلامى".. لمناقشة أحوال إعلامنا صانع المعجزات.. قررنا أن نزاحم الإعلاميين الكبار.. وأن نتكلم معهم وعنهم بلغتهم.. لكن ليس بأسلوبهم.. وأن نشتبك.. لكن ليس على طريقتهم.. اشتباك خاص.. فى الموضوع.. لا مع الأشخاص.. من خلال برنامجنا الحصرى.. "اشتباك".
السلام عليكم ورحمة الله وبركاته.. السيد المواطن الحر الكريم.. أهلا بك فى حلقة جديدة هذا المساء.. من برنامج.. اشتباك.
قبل البداية.. احنا بس عايزين نشكركم على رد الفعل المفاجئ اللى أسعدنا طبعا.. بعد حلقة الأسبوع اللى فات.. بعنوان.. ديدان على كتف الرئيس.. اللى تم تداولها على موقع فيسبوك بشكل كبير.. وصل مساء يوم الأحد الماضى إلى 6 آلاف مشاركة.. أو شير يعنى.. لكن كمان كان فيه آراء منتقدة بنحترمها.. بس خلونا نؤكد اننا حنستمر فى تجربتنا.. وتجريبنا.. تجريب تقديم حلقة توك شو من خلال زاوية مخصصة لمقالات الرأى فى موقع الكترونى.. هو موقع "صدى البلد".. يعنى احنا.. مكملين.. ههههه.. بس بطريقتنا.
كنا وعدناكم الأسبوع اللى فات إننا نحاول الإجابة عن سؤال مهم هو.. ليه الرئيس عبدالفتاح السيسى بيقرب هؤلاء الاعلاميين منه رغم كل ما فيهم من عيوب فاضحة.. هل هو عايزهم كده.. وده الحقيقة سؤال مهم لأن اجابته حتعكس الى حد كبير.. مفهوم الرئيس عن الإعلام.. وعن الحرية.. أقول كمان؟. عن الحرية.. هههههه.. معلش ياريس.. انت اللى علمتنا كلمة. أقول كمان؟.. لتأكيد الرسالة يعنى.. ههههه.
واحنا عند وعدنا.. ومش حنخذلكم.. ولا نحاول نخدع عقولكم. لأن أصلا مابقاش حد ممكن يتخدع.. بس خلونا نحاول الإجابة عن السؤال.. بشكل عملى أكتر.. من خلال نماذج.. نماذج فعلية لإعلاميين.. وممارساتهم.. وتعامل السلطة معاهم.. يعنى مثلا.. زى عبد الرحيم على، ويسرى فودة، وكمان باسم يوسف، اللى ما بقاش موجود، بس ده طبعا لو فضلنا احنا كمان موجودين.. هههههه.. ولو ماحدش يعنى قرر إنه يشتبك بعنف مع.. اشتباك.
الأستاذ توفيق عكاشة.. رجع بالسلامة لبرنامجه وجمهوره.. على قناة الفراعين.. السبت اللى فات.. بعد توقف القناة أكتر من يوم بسبب ديون لمدينة الانتاج الاعلامى.. دفعت المدينة إلى بدء وقف الخدمات عن ستوديو القناة.. فأعلن الأستاذ "توفيق" على الهوا وقتها بغضب عن إغلاق القناة بس قال حاجة غريبة أوى.. قال إنه عنده علاقات قوية جدًا مع الرئاسة والجيش.. لا يتخيلها أحد.. وقال بالنص إن المؤسسات دى متجوزاه عرفى. فى السر يعنى.. هو قال كده تحديدًا.
ورجع فعلا توفيق عكاشة.. مش عارفين بقى.. القناة دفعت الديون ولا لأ. بس المهم إنه رجع.. وصدر بيان من القناة وتصريحات لرئيس تحرير البرامج فيها.. اسمه... أيوه فريق الاعداد بيفكرنى.. اسمه عز الأطروش.. الأستاذ الأطروش قال إن العاملين فى القناة قاموا بتحركات حثيثة ومكثفة لعودة البث.. مع مساع للتسويات الداخلية والخارجية.. وانه تم التوصل لحلول مؤقتة لعودة البث بجهود محبى القناة.. ده كلام الأطروش.. ولو حد فاهم حاجة.. أو إيه اللى حصل بالضبط.. وهل تم سداد الديون لمدينة الإنتاج ولا لأ.. ياريت يبعتلنا.
طبعًا فى أول حلقة بعد الرجوع.. الأستاذ "توفيق" قال: الحقيقة كلام كتير.. كلام كلام.. فى كل الاتجاهات.. ما هو الأستاذ توفيق بيشتبك دايما برضه.. بس مش زينا قطعًا.. قال انه عرف معلومات ان الرئيس السابق.. الراجل المحترم.. عدلى منصور طلع اخوانى.. والمسلمانى أبوه كان اخوانى.. ومصطفى حجازى يسارى.. وأنس الفقى جده كان شغال تربى.. وهدد وزيرة التضامن الاجتماعى وقال لها.. هحطك فى دماغى وأعملك قضيتى.. واقترح كمان الحقيقة على الرئيس السيسى انه يصدر قرار بقانون لدمج الأحزاب فى بعضها.. عشان يبقى عندنا 7 أحزاب بس.. كفاية.. وقال للسيسى كمان على الهوا: معلش يا ريس أنا طولت ورغيت وجبت صداع.. وأنا عارف إنك بتنام بدرى عشان شغلك.. بس لازم أقول لك كده.
واحنا هنا لا يعنينا طبعا كل الكلام ده.. لكن عندنا سؤال مهم بصراحة: إيه حالة الحميمية دى فى كلام عكاشة مع الرئيس؟ ويعنى إيه "جواز عرفى" مع الرئاسة والجيش؟ مش دى إهانة لمؤسسات الدولة برضه؟ إهانة للرئاسة والجيش إن الكلام عنهم يكون بالشكل ده.. بس الحقيقة برضه إن حالة الحميمية دى مش بنت النهاردة.. لأن الأستاذ توفيق قال على الهوا زمان.. إنه هو بنفسه كان أحد أركان الخطة اللى سماها خطة الخداع الاستراتيجى لإسقاط حكم الإخوان.. لما قال وأشاع وقتها إن السيسى إخوانى.. فالإخوان اتخدعوا طبعا وصدقوا.. وإن الكلام ده تم الاتفاق عليه فى جلسة داخل المخابرات الحربية لمدة 6 ساعات مع المسئولين هناك.
ومعلوماتنا إحنا هنا فى برنامج اشتباك.. إن توفيق عكاشة أكد نفس الكلام ده فى حوار خاص مع بعض الإعلاميين. بس قاله بقى بطريقة صعبة شوية إنها تتقال بالوضوح ده على الشاشة.. قال ان السيسى وهو مدير المخابرات الحربية طلبه واتكلم معاه فى مكتبه.. وان السيسى عمل تلميحات للفكرة دى.. قام عكاشة سأله بوضوح: هو سيادتك عايزنى أقول حاجة محددة؟ أقول إنك إخوانى يعنى؟ رد السيسى وقال: لأ بس يمكن الناس عايزة تسمع كدة.. وطبعا الأستاذ توفيق فهم على طول.
يعنى أنا الحقيقة مش عارف.. هل ينفع الكلام بالطريقة دى؟.. وهل الكلام ده صح وللا لأ؟ أكيد يعنى الرئاسة أو الجيش اللى الأستاذ توفيق بيقول إنهم متجوزينه عرفى مش حيطلعوا بيان مثلا يردوا به على عكاشة.. يبقى إحنا بقى قدامنا شواهد الأمور.. اللى بتقول إن عكاشة بيهدد الكل على الهوا.. وبيقول اللى هو عايزه.. وقناته بترجع بعد أيام رغم ديونها.. والأهم من كل ده إن توفيق عكاشة كان أحد المدعوين فى اللقاء الشهير للرئيس بالإعلاميين اللى بدأنا بعده برنامجنا.. اشتباك.
فيه ايه بالضبط يا ريس؟ هو سيادتك شايف إن الإعلام من خلال نموذج توفيق عكاشة ممكن يفيدك ويدعمك فى مشروعك؟ أنا أقول لك.. هو حيفيدك مع شرائح ويضرك مع شرائح.. حيفيدك جدًا.. وكمان حيضرك جدا.. ليه القلق ده؟
لسه حنوضح أكتر.. عن الإفادة والضرر.. وكمان عن القلق.. اللى أكيد حيزيد.. لما نقرب شوية أكتر من نموذج تانى.. بيمثله الأستاذ عبد الرحيم على.. لكن فى الحلقة الجاية.. ودايما شعارنا هو.. حنستناك ويسعدنا استمرارك.. لكن.. انت حر فى اختيارك.
[email protected]