مش يا جماعة ، اختيار المذيعة ده له شروط ومواصفات ، ولا المسألة كده جهجهوني؟ .. على حد علمي ومعلوماتي ، له طبعا شروط .. أولها قدر معقول جدا من المعلومات والثقافة العامة .. دي واحدة .. التانية وجه مقبول وله حضور عند المشاهدين .. التالتة اللياقة والأدب امام الكاميرا " وتصيع زي ماهى عايزه في بيتها او في الحارة اللي جات منها " .. والحاجات التلاتة دول بالصلاة ع النبي كده مش موجودين في اللي اسمها حياة الدرديري .. ف بأمارة إيه الهانم المتخلفة بتذيع ؟ .. هل ممكن تتصور مثلا ان زكية زكريا ممكن تبقى مذيعة رغم خفة دمها اللي محصلتش ؟ .. طيب ايه رأيكم بقى ان حياة الدرديري شبه زكية زكريا بالضبط ، والاختلاف الوحيد بيت الاتنين ان دمها يلطش مديرية بضباطها ولواءاتها وعساكرها.
نمسكها واحدة واحدة .. القدر المعقول من المعلومات .. اختنا " ميح " .. أجهل من دابة تمشي على أربع .. كل اللي بتعمله قبل ما تطلع تحط 10 كيلو ماكياج على وشها اللي عامل زي الحلة اللي البامية " شاطت " فيها واتحرقت .. ومعاها شوية ورق بتقرا منه .. ومش ممكن تنسى ابدا اللي جابها وعيّنها وبلانا بيها .. المتخلف مثلها تماما توفيق افندي عكاشة .. الناس كلها انتقدتها بكلامها عن تيفة بمناسبة ومن غير مناسبة .. وهى أبدا .. راسها والف جزمة .. مينفعش تقدم حلقة من غير سيرة سي توفيق .. طيب ندخل ع التانية .. الوجه المقبول اللي له حضور .. ودي " تاخد فيها " صفر من عشرة .. فزي ما قلت شبه زكية زكريا. التالتة .. اللياقة والأدب وهو ده موضوع مقالي النهارده .. فلا هى عندها لياقة بتعريفة .. ولا هى عندها أدب .. بل دعني أقولها واطسها في وش أهلها : قليلة الأدب! .. ليه بقى ؟ .. التليفزيون والبرامج التليفزيونية مش معمولة عشان " نشرشح " للناس اللي مختلفين معانا .. متضايقة من فلانة .. اول ما تصحي م النوم ومن غير ما تطسي وشك بشوية ميه ، روحي لحد عندها واردحي لها براحتك وافرشي لها الملاية كمان .. بس لمّا تطلعي علينا بطلعتك البهية .. لازم تكوني محترمة .. قبل ما تدخلي الاستوديو تسيبي الزبالة بتاعتك على باب 4 في مدينة الإنتاج .. وانت راجعة البيت تاخديها معاكي تاني .. متخفيش محدش حياخدها ، الا اذا كان جربان ومعفن ومش مكفيه جربه وعفانته. الموضوع يا سادة ان المذيعة ريهام سعيد اللي في قناة " النهار" جابت طليقة توفيق عكاشة ولا واحدة كانت تعرفه واتجوزها عرفي ، ومعاها ولد بتقول ان ابنها من سي توفيق .. وتيفة بينكر ده .. عادي جدا .. مغلطتش ريهام سعيد .. وكلنا فاكرين حكاية احمد الفيشاوي مع اللي اسمها هند على ما اذكر وكانت قضية رأى عام .. يعني لا حرج على ريهام سعيد من طرح الموضوع .. وان كان في رأيي المتواضع لا يستحق .. لكن ماشي .. معندهاش حاجة النهارده الست ريهام ، فقالت نجيب مرات توفيق .. يقوم عم توفيق صاحب الموضوع والقضية يرد عليها .. برضه ماشي .. وان كان رده فيه كتير من قلة اللياقة والأدب ، انما نعدّيها .. مال أهلك انت بقى يا حياة الدرديري بالموضوع ده عشان تعملي حلقة عليه .. والاقي المواقع تكتب : حياة الدرديري تكشف عن فضيحة جنسية ل ريهام سعيد .. اى والله العظيم مكتوب كده .. وفتحت الرابط عشان اعرف إيه الحكاية .. الاقي واحدة " شرشوحة " فارشة الملاية لمذيعة محترمة وفين يوجعك.. كلام بقى حقير من نوعية خلي الطابق مستور .. مش عايزة اتكلم اكتر من كده .. وتطلع المسألة في الأخر ان ريهام سعيد كانت متجوزة واحد في سن أبوها " هى حرة طبعا " .. راجل أعمال كبير .. ومحدش من أصحابها يعرف انه جوزها .. فاكرينه انوها .. قام شاب صغير شاف ريهام سعيد واعجب بيها ، فراح يخطبها من جوزها وهو فاكر انه أبوها .. وساعتها بقى - وهنا الفضيحة الجنسية من وجهة نظر حياة " المعفنة " - الناس كلها عرفت ان ريهام سعيد متجوزة واحد في سن أبوها .. بس خلاص! يا تك ستين وكسة ياللي على وكستك يا حياة .. وفيها إيه دي .. في سن أبوها ولا حتى جدها .. مالك انت ومال اهلك .. وبعدين فين الفضيحة في الكلام اللي قلتيه؟ .. هى اللي تتجوز أد أبوها كأنها والعياذ بالله زانية .. ثم إش دخلك انت من الاصل في الموضوع .. صاحب الشأن اتكلم وخلاص .. إش حشرك انت بقى يا متخلفة .. تقبلي مثلا لو فسرت دفاعك المستميت عن توفيق عكاشة ان انا أشير او ألمح بمجرد كلمة .. الله أعلم ايه اللي بينهم .. البيبان المقفولة ياما بتداري ؟ .. تقبلي مني الكلام ده ؟ .. اولا استحالة انزل لمستواك المنحط وانت بتتكلمي عن واحدة ست زيك بالأسلوب القذر ده .. مع ان اللي زيك مينفعش معاه غير الكلام " الوسخ " عشان تتربي قبل ما تجرحي واحدة ست محترمة كل اللي عملته انها اتجوزت واحد أد ابوها! م الاخر يا بنت الدرديري .. انا عارف انك مش طايقة تسمعي اسمي من ساعة ما كتبت مقال عنك من سنة تقريبا كان عنوانه " مذيعة ناقصها شنب وتبقى راجل صايع " .. وكانت المناسبة برضه كلامك القذر عن بنت زيك اللي هى " ست البنات " اللي اتعرت في الشارع وانكشف لحمها للعالم كله على ايد عساكر وضباط الجيش .. انت فاكره طبعا قلتي ايه عنها وطعنتيها في شرفها علانية وكنتم القناة الوحيدة العفنة اللي تناولت موضوع ست البنات بالطريقة الوسخة دي .. وكان طبعا سي توفيق هو قائد الحملة ومعاكوا اللي اسمه احمد وزة .. " الا بالمناسبة .. هو راح فين .. كان رافع عليا قضية ولحد دلوقتي ماجنيش استدعاء من النيابة " .. وانتوا التلاتة عايزين يتولع فيكم بجاز .. لا علم ولا ثقافة ولا خبرة ولا طلة حلوة .. مفيش غير الأباحة وقلة الأدب .. يا تك القرف انت واللي مشغلك!!
