أحمد عفيفي يكتب: أخرك يا تيفة في الحلقة.. طبق بيض بصفارين !!

مين ابن المجنونة اللي اتفق معاك يا توفيق افندي يا بن الحاج عكاشة انك تاخد 20000 دولار في الساعة مقابل كل حلقة في رمضان .. كنت نايم عريان لا مؤاخذة ، ولا حلمت حلم ليلة صيف انك في الفسحة بتاعت دوار الست والدتك " حران يا حبة عيني " وقاعد عريان الا من البفتة ابو استك .. والواد ابنك ماسك خرطوم الميه وهاتك يا رش على وشك وجسمك .. فرحت معسلك تعسيلة وشفت خير اللهم ما اجعله خير واحد لابس ابيض في ابيض وايده فيها شعر ، ورجله فيها شعر ، و" ... " برضه فيها شعر ، على رأى جورج سيدهم في " اهلا يا دكتور" .. قرب منك وحسّس على قفاك وقال لك : انا جي لك من طرف الشيخ الفلاني " طويل العمر يطول عمره وينصره على مين يعاديه " .. وشافك " اللي هو طويل العمر " في حلقة من حلقاتك ومكنش يعرفك .. افتكر في الأول انه بيتفرج على مسرحية وقعد يضحك عليك وانت بتقفل بقك وتفتحه ، كأنك بترفع غطا بلاعة وتقفلها تاني .. بعدين لقاك بتتكلم في السياسة فافتكر انك نجاح الموجي في " المتزوجون " لما قاعد يهبّل في الكلام وفاكر ان اللي بيقول ده سياسة .. بس عمنا الشيخ طويل العمر قعد يتفرج عليك ولسه فاكر انك ممثل كوميدي وسأل نفسه : الله .. هو مفيش غير ميتين ام الجدع ده في المسرحية .. 4 ساعات يا متخلف منك لنفسك كده .. ده انت لو كنت هيفاء وهبي بجلالة قدرها حازهق واحوّل القناة.

المهم .. مخدش في باله اليوم ده واستنى اليوم التاني يتفرج عليك ، فطلعت له في الضلمة وهو مش واخد خوانة واحدة عندك اسمها حياة الدرديري .. الراجل اتخض واستعاذ بالله من الشيطان الرجيم : مين الولّية الدكر دي؟ .. ركّز معاها حبتين ، لقاها بتتكلم ، وترفع حاجب وتنزل حاجب ، وتشاور بصباعها تتوعد وتهدد الإخوان وكل بتوع التحرير .. وكل شوية تجيب سيرتك وتقول الإعلامي الفذ الدكتور توفيق عكاشة .. اللي لو عطش بيشرب توفيق عكاشة .. اللي لو كان مزنوق بيخش الحمام .. ولو الحمام مشغول يفك زنقة في الفسحاية بتاعت امه .. أصله راجل فلاح وعلى طبيعته .. ممكن يطلع عليكم في البرنامج بالجلابية ويهرش في قفاه ، ويلعب في مناخيره ، ويفرك في صوابع رجليه ويشم ايده ويقول أحمدك يارب ..

المهم في الأخر.. عمنا الشيخ عرف ان انت لا ممثل ولا نيلة ، والبت اللي معاك " الشغالة " عندك برضه لا ممثلة ولا هباب .. وان انت وهى بتقدموا برنامج أعفن منكم اسمه " مصر اليوم " وان القناة بتاعت الست والدتك .. عشان كده بتبرطع فيها براحتك .. واليوم اللي ما تقدمش فيه تيجي ضيف مع البت حياة ، واذا ما جتش تتصل بالتليفون وتعمل مداخلة يجي ساعة ونص .. وتقعد تعبّط في الكلام وتستغبى ، وكلمة م الشرق على كلمة م الغرب .. واسمك قال ايه بتتكلم في السياسة ، كأنك بتفهم وانت البعيد لامؤاخذة " ... " متعرفش الإلف من كوز الدرة.

بس عمنا الشيخ صاحب قناة عربية بتدفع الشىء الفلاني وبعتني ليك عشان اعرض عليك انك تعمل 30 حلقة في رمضان .. محدش حيتفرج عليها غيره هو وأهل بيته .. أصلهم رغم العز والجاه اللي هما فيه ساعات بيحسوا بالزهق ويبقى نفسهم يتفرجوا على اى أراجوز يضحكّهم .. فإيه طلباتك يا تيفة؟

قام تيفة قال له : انا القناة بتاعتي بيشوفها 190 مليون مشاهد والبرنامج بتاعي .. إضرب الرقم في 5 وشوف انا استحق كام.

قام الراجل رد : وانت جبت الرقم ده منين يا تيفة .. ان كان اللي بيتكلم مجنون فالمستمع عاقل .. أكيد تقصد 190 نفر من بلدكم هما اللي بيتفرجوا عليك.

قام تيفة اتعصب وحلف بالطلاق ، وان مراته تكون متحرمة عليه زي امه واخته ان الرقم صحيح والدليل عدد الاشارات.

الراجل كاد يفقد أعصابه وقال له : تقصد اللي بيعدّوا ويقلّبوا في القنوات " فتخبطهم الفراعين في سكتهم .. فيلقوك في وشهم فيضحكوا شوية و" يتفوا " عليك ويحولوا.

تيفة بعصبية : انت جي ليه وعايز ايه بالضبط .. الملافظ سعد يا سيد .. خلصني.

الراجل : الشيخ عايزك .. انت عايز كام؟

تيفة : النص ساعة ب 10000 والساعة الا ربع 15 والساعة الكاملة 20000 دولار.

الراجل : ليه انشالله .. لاري كينغ سعادتك وانا مش واخد بالي.

تيفة : مين لاري كينج ده ؟

الراجل : كمان مش عارف أشهر مذيع في العالم .. ولسانك طول كده.

تيفة وقد شعر ان السبوبة حتروح منه فقال : م الأخر الشيخ بتاعكم عايز يدفع كام؟

رد الرجل : مش حيدفع فلوس من الأساس

تيفة : أمال حيدفع إيه؟

الراجل : هو عارف انك فلاح وتتباهى دائما انك فلاح

تيفة : طبعا .. بس خلّصني .. عايز يدفع ايه؟

رد الراجل : انت عايز إيه غير الفلوس .. حاجة كده تليق بمقامك وتنفعك.

تيفة : الحلقة بجاموستين .. يعني التلاتين حلقة ب 60 جاموسة.

الراجل : ليه يا روح خالتك .. انت حتفتح عكا؟

تيفة : بلاش جاموستين .. خليهم حمارين؟

الراجل : كتير

تيفة : طيب عشر بطات ووزتين .

الرجل : برضه كتير

تيفة : طيب جوزين حمام

الرجل : كتير يا تيفة

تيفة وقد فاض به: امال عايز ايه بالضبط؟

الراجل : هو طبق بيض بصفارين على ال 30 حلقة .. عاجبك ولا امشي؟

تيفة : طيب .. وحياة الدرديري الشغالة عندي حتاخد ايه ؟

الراجل : حتاخد على قفاها

تيفة مجبرا : هات العنوان .. وسلم لي على طويل العمر!