«نقاشة» مسيحية تعيد ترميم مسجد بالفيوم

يثبت المصريون أنهم نسيج واحد ذو قلب واحد أمام العالم اجمع ولدينا الأسطي نرمين امرأة مسيحيه ذات طبيعة خاصة فضلا عن أنها تعمل بمهنة النقاشة باحترافية إلا أنها هي وزوجها عاطف زكي الذي يمتهن نفس المهنة لديهما روح وطنية عالية تجلت في قيامهما بإعادة ترميم مسجد وترخيمه بمنطقة الزاوية بمحافظة الفيوم.
الأسطي نرمين ( ست جدعة ) اتعلمت النقاشة في ظروف مرض زوجها بالنقرس علشان قوت يومها وقوت عيالها. ولأنها كمان بتحب مهنة النقاشة وطلاء الذهب هنعرف قصة الأسطي نرمين في السطور التالية التي قصتها ل »الأخبار»‬.
• في البداية يا أسطي نرمين إيه حكايتك ؟
- أنا من محافظة اسيوط مسقط رأسي وخالتي أول عمدة في مصر وتزوجت عاطف وأنجبت 3 أطفال، بنتان وولد وانتقلنا جميعا للقاهرة للشغل.
ومين علمك مهنة النقاشة ؟
- في البداية شغلتي كانت مبيض موبيليا بقشرة الدهب أو غيرها وكنت باستخدم فيها أدوات النقاشة فرشة ومعجون وسنفرة وعلمني زوجي عاطف المهنة واشتغلت معاه في النقاشة.
والنقاشة دي صعبة ؟
- مفيش شغلانة مش صعبة لازم تكون بتشتغل وانت حابب الشغلانة علشان تعرف تبدع فيها.
احكيلنا عن جوزك ؟
- جوزي عاطف بيشتغل في البحر الأحمر وبيشتغل ترميم أماكن أثرية وليه شغل كتير ترميم لأنه أشطر حد في الدنيا من وجهة نظري فرمم مجلس الشوري ورمم كنائس وحاجات أثرية كتير وكفاية إنه علمني كل حاجة.
وكان ليكي رد الجميل في مرض عاطف ؟
- حقيقي بشكر ربنا أنه بقي أحسن ونزل اشتغل تاني بعد ما أصيب بالنقرس ومكنش بيتحرك نزلت واشتغلت والكل عارف إن الأسطي نرمين ست بألف راجل.
وجوزك لما كنتي بتشتغلي معاه مش بيغير عليكي من الصنايعية؟
- مفيش راجل مش بيغير علي مراته طبعا كان بيغير ويخاف عليا لكن كان واثق فيا لأبعد الحدود وكمان عاطف مش بيسبني لواحدي خالص.
وإيه أكتر حاجات اشتغلتي عليها كانت ذكري لا تنسي ؟
- اشتغلت مع جوزي ترميم كنائس ومدهباتي (الطلاء بالذهب) لشغل كتير أوي وكمان عملنا ترميم وترخيم لمسجد رائع في الفيوم.
شايفة العلاقة بين المسلمين والمسيحيين إزاي؟
- كلنا إخوات كلنا مصريين وبنحب بعض عمر ما في حاجة هتفرقنا أبدا لا داخلية ولا خارجية.
وبتتعاملي إزاي مع ارتفاع الأسعار وشراء الخامات ؟
- والله الشغل قليل جدا جدا والنَّاس الحقيقة بقت تطلبنا قليل مش احنا بس احنا وكتير من الصنايعية بس اهو بنحاول.
انتي داخلة شغل النقاشة هواية ولا فلوس ؟
- الاتنين بس الأغلب هواية لو فكرة فلوس بس منا ممكن اشتغل في أي مستشفي أو أي مكان لكن بحب المهنة دي جدا.
وإيه أهم تكريماتك ؟
- كرمت من حزب مستقبل وطن بأمانة الفيوم وأماكن كتير.
بناتك فخورين بيكي أمام زمايلها ولا بيتحرجوا من مهنتك ؟
- فخورين بيا طبعا وبوالدهم الشغل مش عيب ولا حرام.
وما أهم أحلامك ؟
- نفسي بناتي يبقوا مهندسات ديكور علشان يساعدونا أنا وعاطف
ونفسي في شقة تساعدنا وتلمنا في الظروف الصعبة دي.
والتواصل معاكم ممكن يتم إزاي لو حد عاوز يستعين بيكم في شغل ؟
- من خلال صفحتنا علي الفيس بوك باسم نرمين ناجح النقاشة.