يحدث في مصر

هالة أبو علم: سيداتى وسادتى مرحبا بكم فى حلقة جديدة من برنامجكم يحدث فى مصر
محمد موافى: موضوعنا اليوم هو موضوع هام جدا يشغل بال الكثيرين هو موضوع الهجرة وخاصة هجرة الشباب ولذلك معنا ومعكم اليوم الأستاذة ماجدة عبد الرحمن مستشارة وزيرة القوى العامة والهجرة للهجرة
هالة أبو علم: أهلا بحضرتك يا فندم
أ / ماجدة عبد الرحمن: أهلا بكم
محمد موافى: إسمحى لنا قبل ما نتكلم عن موضوع هجرة الشباب للخارج نشوف هذا التقرير ونرجع نتكلم ثانى عن موضوعنا
هالة أبو علم: مشاهدينا الكرام نرحب بضيفتنا فى الاستديو الأستاذة ماجدة عبد الرحمن مستشارة وزيرة القوى العاملة والهجرة أهلا بحضرتك معانا النهاردة وأنا هبتدى مع حضرتك بسؤال بس يوضح تاريخ ونشأة وزارة الهجرة وكيف كانت وكيف أصبحت الآن
أ / ماجدة عبد الرحمن : الحقيقة وزارة الهجرة أو قطاع الهجرة كما قدمتى حضرتك كانت فيما سبق وزارة الدولة لشئون الهجرة والمصريين فى الخارج أنشئت بقرار جمهورى رقم 574 فى سنة 1981 بإنشاء وزارة جديدة تسمى وزارة الدولة لشئون الهجرة والمصريين فى الخارج هذه الوزارة عملت كوزارة منذ 81 إلى 1996 ضم اختصاص الوزارة إلى وزارة القوى العاملة فأصبحت وزارة القوى العاملة والهجرة وأصبحت الهجرة قطاع ضمن قطاعات وزارة القوى العاملة والعمل بقى فى الوزارة بقى فيه وزيرة وزير واحد للقوى العاملة والهجرة
محمد موافى: يا فندم احنا فى التقديم قلنا إن فيه مشروعين كبار بتعنوا بهم المشروع الأول اللى هو نظام المعلومات للهجرة إيه المشروع ده؟
أ / ماجدة عبد الرحمن :حضرتك مشروع نظام معلومات الهجرة المتكامل هذا المشروع تم تنفيذه بين منظمة الهجرة الدولية والحكومة تمويل من الحكومة الإيطالية المشروع بدأ من سنة 2001 واستمر المرحلة الأولى لسنة 2005 المشروع ده كان الهدف منه إقامة قاعدة بيانات عن المصريين فى الخارج وكيف يمكن تسهيل توفير البيانات عن أعداد المصريين فى الخارج عن تجمعات المصريين فى الخارج بيانات عن النوادى والروابط والتجمعات والجمعيات المختلفة عن قاعدة بيانات عن المشروعات المتوفرة المتوفر عرضها على أبناءنا المصريين فى الخارج المشروعات الاستثمارية بالتعاون مع الهيئة العامة للاستثمار ووزارة الاستثمار أيضا قاعدة بيانات عن قوانين ونظم الهجرة المعمول بها
محمد موافى: طبعا دائمة التحديث؟
أ / ماجدة عبد الرحمن: بالضبط يا فندم فى دول المهجر وفى دول الاتحاد الأوروبى تحديدا
هالة أبو علم : ده خدمة .......
أ / ماجدة عبد الرحمن: خدمة للمصريين فى الخارج وخدمة للمصرى الراغب فى الهجرة بوفر له معلومات عن قوانين الهجرة الخاصة بدول الاتحاد الأوروبى ، قوانين الدخول ، قوانين الإقامة كيف يمكن للمصرى الراغب فى الهجرة إنه يطلع على بيانات ومعلومات الدولة
محمد موافى: وللا الفرص؟
أ / ماجدة عبد الرحمن: لا الفرص بتتوافر نتيجة لطلب الدول لعمالة مصرية فى تخصصات وقطاعات مختلفة بتطلبها من الوزارة وفقا لما هو متفق عليه لكن أنا بوفر على الشاب قبل ما يفكر إن هو مثلا هدى مثل المثل اللى احنا بنشتغل معاه دلوقتى فى إيطاليا قبل ما يسافر إلى إيطاليا يفتح الموقع بتاعنا موقعنا سهل جدا موقع قطاع الهجرة فى الوزارة www.emigration.gov.eg
محمد موافى:www.emigration.gov.eg
أ / ماجدة عبد الرحمن: www.emigration.gov.egحضرتك بيدخل على الموقع بيفتحه عندنا two facesيعنى عندنا وجهين ؛ وجه باللغة العربية وآخر باللغة الآنجليزية عايز يطلع المثقف أو اللى عايز يطلع بيدخل على الموقع الأجنبى اللى عايز يقرأ بالعربى بيدخل على الموقع بالعربى فيه مترجم قوانين ل 18 دولة أوروبية مترجمة باللغة العربية والآنجليزية اللى عايز يطلع ويقرأ ويعرف قوانين الدولة الراغب فيها زى إيطاليا مثلا بيطلع عليها وبيستفيد إيطاليا لما بتحب أو بترغب فى الحصول على عمالة مصرية فى قطاعات مطلوبة فى سوق العمل الإيطالى بتوافينا
محمد موافى: ده بيحصل بيطلبوا؟
أ / ماجدة عبد الرحمن: طبعا بيحصل
محمد موافى: يعنى الدول الأوربية بتطلب ناس؟
أ / ماجدة عبد الرحمن: آه طبعا
هالة أبو علم: يعنى فيه اتفاقية؟
أ / ماجدة عبد الرحمن: فيه اتفاقيات عاملاها بالذات إيطاليا احنا عندنا الوزارة معاها 12 اتفاقية مع 12 دولة عربية تم تحديث 3منها حديثا اتفاقية مع الأردن ، اتفاقية مع ليبيا ، اتفاقية مع قطر ونتيجة لاتفاقية الأردن وليبيا الأردن بتاخد فيما لا يقل عن 40 ألف عامل فى سوق العمل
هالة أبوعلم: أستاذة ماجدة أنا عايزة أقول لحضرتك حاجة طبعا فيه مشروع ثانى عايزين ندخل فيه بس قبل ما ندخل فى المشروع الثانى أنا عايزة أتكلم باستفاضة شوية عن المشروع الأولآنى اللى هو.........
أ / ماجدة عبد الرحمن: نظام معلومات الهجرة المتكامل؟
هالة أبوعلم: بالضبط كده يعنى من ضمن اسباب الهجرة غير الشرعية إن الشباب عنده أحلام كثير شايف إنها صعب تحقيقها فى مصر بيسافر وللأسف فيه بعض النصابين اللى بيضحكوا عليه وبيستغلوا هذه الأحلام فى تحقيق أرباح لهم أنا بشوف إن وزارة القوى العاملة والهجرة الحقيقة عاملة مجهود كبير جدا ولكن للأسف محدش يعرف عنه حاجة ومحدش يعرف عن المجهود الكبير اللى انتوا عاملينه ولا حد عارف إن فيه مواقع إلكترونية يدخلوا عليها وإن هم يقدروا من خلالها يحصلوا على فرص عمل هل ده قصور فى التعامل مع الإعلام هل الإعلام بعيد عنكم وللا إنتوا اللى بعيد عن الإعلام ؟
أ / ماجدة عبد الرحمن: لا الحقيقة لا احنا بعيد عن الإعلام ولا الإعلام بعيد عننا ومعلش يا أستاذة هالة لا مفيش قصور فى إن الناس تعرف عن قطاع الهجرة وعن الفرص اللى بتوفرها وزارة القوى العاملة والهجرة لآن احنا حضرتك لو جيتى لى حضرتك زيارة لوزارة القوى العاملة والهجرة وتقعدى بس عن بعد لإدارة الاستخدام الخارجى فى الوزارة ناهيكى عن قطاع الهجرة ، قطاع الهجرة خاص بالهجرة وخاص بسياسات الهجرة إنما إدارة الاستخدام الخارجى والقوى العاملة مش قادرة أوصف لحضرتك كم الشباب المتردد اليومى على هذا القطاع فى الوزارة للحصول على فرصة عمل لا
هالة أبوعلم: أمال حضرتك بتفسرى بإيه الناس اللى بتركب المركب وتروح فى البحر؟
أ / ماجدة عبد الرحمن : حلم الهجرة اللى بيرواد كل شاب متصور إن هو هيهاجر مش هيسافر دولة عربية يعمل هيهاجر دولة أوروبية علشان خاطر يبقى مليونير علشان ييجى يشترى الأرض ويبنى القصر أنا رحت زرت إحدى قرى الفيوم وهى أكثرالمحافظات تصديرا للعمالة غير الشرعية
هالة أبو علم: إسمها إيه ؟
أ / ماجدة عبد الرحمن: كاتون رحت زرتها قرية دخلت لقيت عبارة عن فلل وقصور أنا رحت ما لاقتشى فيها حد لقيت القرية مفيهاش ناس فيها ناس كبار ممكن سيدات ممكن أطفال مفيهاش شباب بيشتغل الشاب بيهاجر بيبقى هاجر قبل كده يعنى طبعا دى مش مرحلة حالية اللى أنا شفته ده مش بتاع دلوقتى اللى أنا شفته ده من فترة سابقة وفترة كثيرة سابقة إنما دلوقتى الشباب يشوف المنظر ده طبعا هوس يقول لك ده واحد جه سافر وجاب عمل قصر زى ده وحوش وجه يعنى انتى تتخيلى حضرتك اللى بيسافروا بالطريقة دى هل بيعمل العمل وبياخد المرتب اللى يسمح له إنه يبنى حاجة
محمد موافى: طب حضرتك لو فرضا إن واحد هاجرهجرة غير شرعية ونجح إنه يوصل القانون هناك بيعمل إيه؟
أ/ ماجدة عبد الرحمن: والله طالما شوف حضرتك بالنسبة لإيطاليا فيما سبق بقى مش حاليا كانوا بيطاردوا أى حد مهاجر هجرة غير شرعية بشكل يعنى عنيف جدا فى إيطاليا إنما فيما سبق كان بييجى ويهاجر يقعد ويشتغل فى بيتزا يقعد فى قرية يشتغل فلاح بيقعد فى قرية يشتغل بناء طالما إن هو مسالم مفيهوش أى مشاكل قانونية المهاجر هجرة غير شرعية بيبقى سعره أقل كثير جدا وأصحاب الأعمال الإيطاليين بياخدوه يشغلوه الفترة اللى فاتت إيطاليا طلعت مرسوم مع بداية عقد إتفاقية معانا بزيادة تدفق العمالة المصرية للعمل فى السوق الإيطالى اللى تم توقيعها فى نوفمبر 2005 إيطاليا فى خلال هذه الفترة طلعت مرسوم بتقنين أوضاع مش المصريين بس بشكل عام لتقنين أوضاع المهاجرين بطريقة غير شرعية لتحويلهم إلى مقيمين بطريقة شرعية
محمد موافى: إسمحى لى حضرتك بس نقف عند النقطة دى لآن دى محتاجة شرح أستأذن حضرتك بس نطلع فاصل ونرجع نناقش المسألة دى مشاهدينا فاصل قصير ونرجع ثانى نشوف مسألة قطاع الهجرة الشرعية و غير الشرعية ونشوف الدنيا ماشية إزاى ؟
فاصل
هالة أبوعلم: مرة أخرى نعود إليكم وإلى ضيفتنا الأستاذة ماجدة عبد الرحمن مستشار وزيرة القوى العاملة والهجرة لقطاع الهجرة والحديث كان يتصل بخصوص الهجرة غير الشرعية ودور القطاع يعنى فيه مش عايزة أقول محاربة الهجرة توجيهها إيه الدور اللى بتقوموا به؟
أ / ماجدة عبد الرحمن: الحقيقة الوزارة من خلال اختصاصها ومن خلال الدور المنوط بها بيتم العديد من الإجراءات أولا عشان أمنع الهجرة غير الشرعية لازم أجيب لها بديل ما هو البديل إن أنا أوفر فرص عمل أدى فرص عمل للشباب البطالة اللى زاد عددها فى فترة حالية كلنا نعلم بها لازم أوفر فرص عمل تم توفير العديد من فرص العمل فيما يقرب من 380 ألف فرصة عمل الرقم ده أو أكثر أو ما يزيد على ذلك كان فى آخر يناير 2010 يعنى من سنة ليناير 2010 آخر إحصاء كان يناير 2010
هالة أبو علم: ممكن أسأل حضرتك إيه أهم التخصصات اللى بيبقى عليها طلب بالنسبة للدول الأوروبية ؟
أ / ماجدة عبد الرحمن: لا أنا هقول لسيادتك فى جزئية الأعداد دى للعمل توفر فرص عمل داخلى فى مصر الأول بوفر له فرص عمل فى مصر
محمد موافى: عايز يهاجر ثانى بقى إيه الفرص المطلوبة؟
أ / ماجدة عبد الرحمن: الفرص المطلوبة دلوقتى بالنسبة للاتحاد الأوروبى تحديدا لآن الشباب يتجنن عشان يسافر أوروبا الحقيقة الاتفاقية الوحيدة اللى تم توقيعها كانت مع إيطاليا كان هناك اتفاقيات سابقة مع اليونان فى مجال صيد الأسماك والزراعة دى الاتفاقية دى سارية ودى عمالة موسمية بتسافر فى وقت الصيد وبترجع وبترجع ثانى
محمد موافى :أعدادهم أد إيه؟
أ / ماجدة عبد الرحمن: أعداد المصريين فى الخارج ما يقرب
محمد موافى: لا احنا بنتكلم عن الهجرة الموسمية أو العمل الموسمى
أ / ماجدة عبد الرحمن: العمل الموسمى ما يقرب أو الحقيقة مفيش حصر دقيق للرقم بس أعتقد إن هو ما يقرب من ما تعداش المليون مثلا يعنى أعداد المصريين فى الخارج كلهم 7 مليون ونصف وبعدين أنا عايزة أقول لحضرتك العمل الموسمى ده حاجة حديثة اتخذها الاتحاد الأوروبى دول الاتحاد الأوروبى فى فترة حالية نظرا للأزمة العالمية إنما كان اللى قبل كده كانوا متجهين للهجرة أنا دلوقتى مع إيطاليا فيه مرسوم هيصدر أو ربما يكون صدر فى الفترة دى فى طلب عمالة موسمية من مختلف الدول مش مختلف دول العالم تحديدا من مصر والمغرب وتونس والجزائر وبعض دول حوض البحر المتوسط عشان العمل فى مجال الزراعة ومجال السياحة فى سوق العمل الإيطالى
هالة أبو علم: طب هل الدولة بتدعم هذا القطاع لآنه قطاع مهم جدا؟
أ/ ماجدة عبد الرحمن: آه طبعا ده جزء أولا هو كان وزارة وله ميزانية مستقلة لما تم نقل اختصاصه لوزارة القوى العاملة نفس مخصصاته بتدعمه طبعا القطاع ده فيه وكيل أول وزارة رئيس قطاع فيه 2 وكلاء وزارات فيه ما يقرب من 6 مديرين عموم عدد مش كثير
محمد موافى: وفيه 6 برة مصر إيه دور....؟
أ/ ماجدة عبد الرحمن: ده بقى هنتكلم فيه عن المشروع الثانى مشروع الدعم المؤسسى من الهيئات الحكومية وغير الحكومية هذا المشروع بالتعاون مع الاتحاد الأوروبى ومع وزارة التشغيل اليونانية التعاون بيننا وبين اليونان والاتحاد الأوروبى ومعانا فى مصر الصندوق الاجتماعى للتنمية المشروع ده كان هدفه الأساسى إنشاء 6 مكاتب معلومات واستشارات هجرة فى 6 محافظات مصرية الأكثر تصديرا للعمالة وليست للعمالة غير الشرعية فقط هدف هذا المشروع إن المكاتب اللى تم إنشاءها فى ال 6 محافظات بتنشر معلومات واستشارات للشباب الراغب فى الهجرة إن هو إذا عاوز يهاجر طب ليه تهاجر ليه ما تحاولش إنك تلاقى فرصة عمل فى بلدك ليه ما تحاولش تعمل باعتبار إن الصندوق معانا فى هذا المشروع الصندوق الاجتماعى ليه ما تلجأش للصندوق الاجتماعى وتعمل لك مشروع سواء كان مشروع للصناعات الصغيرة مشروع للصناعة المتوسطة
هالة أبوعلم: أستاذة ماجدة دلوقتى احنا تعرفنا على دور هذا القطاع فى توفير فرص عمل للراغبين للشباب يعنى الراغبين فى العمل فى الداخل أو فى الخارج أعتقد إن فيه جانب آخر بيقوم به القطاع وهو توفير بقى الحماية لمن يعملون فى الخارج والدعم كمان ولو حد عنده مشكلة أعتقد إن انتوا برضه بتقوموا بحلها
أ/ ماجدة عبد الرحمن: وزارة القوى العاملة والهجرة دلوقتى مش قطاع فقط الوزارة كوزارة مسئولة عن رعاية المصريين فى الخارج مسئولة عن حل المشاكل اللى بتواجه المصريين فى الخارج سواء كان مهاجر أو مقيم فى الخارج بطريقة مؤقتة أو بطريقة دائمة مش هنتكلم بقى عن طريقة شرعية أوغير شرعية لا احنا هنتكلم إذا كان هذا المهاجر مهاجر مؤقت أو دائم إذا كان مهاجر مؤقت فهو بيعمل فى إحدى الدول العربية وبعض الدول الأوروبية أيضا
محمد موافى: يعنى لو عنده مشكلة فى إحدى الدول العربية على سبيل المثال يروح للسفارة أو القنصلية؟
أ/ ماجدة عبد الرحمن: يلجأ للسفارة القنصلية نظرا لآن السفارة فيها مستشارين عماليين تابعة للوزارة فى كل الدول العربية 15 مستشارة عمالية على مستوى الدول العربية و3 مستشارين عماليين فى الدول الأوروبية إيطاليا واليونان وجنيف
هالة أبوعلم: أنا أتذكر يا أستاذة ماجدة إن لما كان فيه مشكلة للمصريين العاملين فى ليبيا السيدة الوزيرة عائشة عبد الهادى سافرت بنفسها والتقت يعنى كانت بتمشى فى الشارع وهى حكت فى أحد اللقاءات يعنى إن هى كانت بتمشى فى الشارع وتشوف العاملين المصريين فى تجمعاتهم وتتكلم معاهم مباشرة بتحاول إن هى تحل المشكلة فالحقيقة يعنى دور ومجهود كبير بتقوم به الوزارة لكن زى ما قلت لحضرتك قبل كده محدش عارف المسئولية الملقاة على عاتق هذه الوزارة والأدوار اللى بتقوم بها هى أدوار متعددة داخل مصروخارج مصر
أ/ ماجدة عبد الرحمن: بالضبط يا فندم بالنسبة لليبيا تحديدا معالى الوزيرة سافرت أكثر من مرة يمكن 3 أو 4 مرات وأرسلت 3 مرات 3 لجان من موظفى الوزارة مع لعلم حضرتك فيه 2 مستشارين فى ليبيا واحد فى طرابلس وواحد فى بنغازى وأرسلت أكثر من 3 مرات لجان لبحث العمالة غير المنتظمة المصرية المقيمة فى ليبيا وقدرت أو استطاعت إن هى توفق أوضاع هذه العمالة بعقد أو بتوقيع عقود عمل مع أصحاب الأعمال اللى هم بيشتغلوا معاهم عشان إقامتهم تكون شرعية وعشان ما يتمش ترحيلهم ليبيا منفذ جيد للهجرة غير الشرعية لآن عن طريقها بيسافروا إلى إيطاليا واليونان وفرنسا فطبعا دول الاتحاد الأوروبى فى الفترة دى شديد جدا جدا على موضوع الهجرة غير الشرعية بالنسبة لهم وبيحاولوا يواجهوها بكافة الوسائل بما فيها بقى إنهم فيه اتصال مع ليبيا بإيقاف هذا النزيف من عندها علشان خاطر تقفل حدودها للهجرة غير الشرعية هتعمل إيه ليبيا هى هتطلع قانون أو قرار مش خاص بالعمالة المصرية تحديدا بالعكس بالنسبة للعمالة غير الشرعية المتواجدة فى ليبيا نظرا لآن زى ما قلت لحضرتك ليبيا يعنى دولة باب خلفى للهجرة غير الشرعية فليبيا اتخذت هذا القرار نتيجة للضغط الأوروبى عليها يعنى هى بتنظم سوقها وهى لها الحق إن هى تنظم سوقها بس بقى مش لازم وضغط مفاجئ كمان إنما الحمد لله قدرت القيادة السياسية يعنى
هالة أبوعلم: أنا شايفة حضرتك بتتكلمى كثير عن التعاون المصرى – الأوروبى وخصوصا مع إيطاليا طب ماذا عن التعاون المصرى – العربى ؟
أ/ ماجدة عبد الرحمن :هو سوق كبير برضه حضرتك احنا فيه 12 اتفاقية مع الدول العربية كلها مع معظم الدول العربية عندنا اتفاقيات بيننا وبينهم فى تنقل الأفراد فى تنظيم تدفق العمل بالنسبة للعمل مع السعودية عندنا مليون و 300 مصرى بيعملوا بالسعودية يمكن من أكثر الدول العربية استقبالا للعمالة المصرية مع الكويت مع الأردن ؛ الأردن فى الفترة الأخيرة سيادة الوزيرة عملت اتفاقية بتاخد كل سنة ما يقرب من 40 ألف فرصة عمل فى الأردن وعقود العمل فى الأردن بتراجع مراجعة دقيقة جدا وما بتتنفذش شوف بقى حضرتك لازم يبقى فيه مشاكل أصل المشكلة فردية واحدة يعنى 40 ألف واحد سافروا لما يبقى فيه 10 فيهم مشاكل إيه يعنى ما هو لازم
محمد موافى: طب ال10 اللى عندهم مشكلة دول بنساعدهم وللا؟
أ/ ماجدة عبد الرحمن: طبعا هنجيبهم مصر ما هم هيرجعوا بلدهم بنحل لهم مشكلتهم مش لازم تبقى مع صاحب العمل وطالما فيه اتفاقية بين دولتين يبقى لازم تتحل
هالة أبوعلم: على فكرة يا أستاذة ماجدة سمعنا إن فيه مشروع لآنهاء موضوع الكفيل هل ده هيساعد فى حل المشاكل ؟
أ/ ماجدة عبد الرحمن:بالنسبة للكويت والسعودية ما أعتقدش إن هم يلغوا ما أعتقدش هو نهى تماما فى البحرين ، الكويت بتدرسه دلوقتى فى البرلمان بقى لها سنة بس لسة ما صدرش قرار بس الكويت مش هتنهيه هى هتنظم العلاقة بين صاحب العمل والعامل
هالة أبوعلم: طب هل ده يقضى على جزء من المشاكل ؟
أ/ ماجدة عبد الرحمن: طبعا أكيد وبعدين على فكرة نظام الكفيل مش معظمه المشكلة بتيجى من جانب واحد المشكلة ساعات بتبقى جاية من الجانبين من جانب صاحب العمل ومن جانب العامل
محمد موافى: بس فى النهاية صاحب العمل قوى والعامل ضعيف.
أ/ ماجدة عبد الرحمن: طبعا لآن فى الكويت بياخد باسبوره
محمد موافى: فى أى دولة عربية ؟
أ/ ماجدة عبد الرحمن: بتاعه المشكلة فى السعودية إنه بياخد الباسبور بتاعه وما بيدهو لهوش بيبقى معاه فقط الفيزا عارف حضرتك لو زى أى دولة والباسبور مع صاحبه مفيش مشكلة مش عاجبه الشغل هيمشى يا يروح عمل آخر يا يسيب البلد ويمشى ويرجع بلده
هالة أبو علم: انتوا لغيتوه فى البحرين لكن فى السعودية ........؟
أ/ ماجدة عبد الرحمن: السعودية لا نظام الكفيل شديد جدا فى السعودية وكان لهم مبررهم الحقيقة إن السعودية مترامية الأطراف إزاى يقدروا يظبطوا ومعظمها عمالة خارجية يعنى مش سعوديين كلهم إزاى يقدروا ينظموا نظام العمل
محمد موافى: هنرجع لنظام الرق عشان يقدروا يظبطوا
أ/ ماجدة عبد الرحمن: لا نظام الكفيل مش درجة الرق
محمد موافى: ما يقدرش يتحرك غير لما ياخد ؟
أ/ ماجدة عبد الرحمن: هى السعودية فقط والحقيقة وزارة القوى العاملة مع وزارة الخارجية والجهات المعنية بتحاول بقدرالإمكان تحل هذه المشكلة
هالة أبوعلم: طيب عايزة أسأل حضرتك بالنسبة للهجرة غير الشرعية نرجع ثانى للموضوع ده لآنه موضوع مهم جدا لآن كل يوم بنشوف فى الجرايد وبنقرأ عن مركب غرقت وشباب غرق يعنى مشاكل كبيرة جدا إيه الدور يعنى إيه الخطط المستقبلية اللى حاطاها وزارة القوى العاملة والهجرة لمحاربة هذه الظاهرة ؟
أ/ ماجدة عبد الرحمن: الحقيقة وزارة القوى العاملة بتحاول بقدر الإمكان إنها تفتح مجال هجرة جديدة غير الأسواق التقليدية بالنسبة للاتحاد الأوروبى فيها مشكلة دلوقتى عشان الهجرة غير الشرعية بنحاول نجد فرص هجرة جديدة فيه السوق الكندى مثلا رغم ارتفاع المستوى المطلوب للتخصصات إلا إنها طالبة فى مجال البترول ليس مهندسين وكده إنما عمالة فبنحاول معاملة الوزيرة من خلال علاقاتها سافرت إلى إيطاليا ، سافرت كندا ، سافرت فرنسا يعنى بتنتقل بنفسها إلى الدول اللى هى مقصد الشباب للهجرة عشان تقدر توفر ما هى دى محاولات من الوزارة إن احنا نبعد شوية عن الأسواق التقليدية الموجودة ونفتح فرص عمل فى مناطق أخرى
محمد موافى: أستاذة ماجدة عبد الرحمن مستشارة وزيرة القوى العاملة والهجرة لشئون الهجرة شكرا جزيلا يا فندم هاجرنا ورحنا وجينا ورجعنا فى مصر فى يحدث فى مصر شكرا جزيلا لحضرتك
أ/ ماجدة عبد الرحمن: ميرسى
هالة أبو علم: وأعتقد أستاذة ماجدة إن هذا القطاع محتاج لحلقات ثانية نتكلم فيه لآن مشاكله متشعبة بعض الشئ ومرة ثانية بشكر حضرتك
أ/ ماجدة عبد الرحمن: قطاع الهجرة بيعمل أكثر من كده محتاج لحلقات وحلقات
هالة أبو علم: شكرا لكم مشاهدينا الكرام ونلتقى معكم فى حلقة قادمة من يحدث فى مصر