يحدث في مصر

هالة أبوعلم : مشاهدينا الأعزاء مساء الخير وأهلا بكم فى حلقة جديدة من برنامج يحدث فى مصر هذه الليلة سوف نتحدث عن الشركة القابضة للمستحضرات الحيوية واللقاحات التى كانت حتى عام 2002 هيئة عامة ثم تم تحويلها الى شركة قابضه
محمدموافى :لتطويرالأمصال واللقاحات بتحاول الشركة الحصول على قرض قيمته 50 مليون دولار من البنك الدولى لإقامة مشاريع جديدة تابعه ليها يكون مقرها فى مدينة 6 اكتوبر المشروع الأول لانتاج مصل للانفلونزا الموسمية والثانى لانتاج لقاح الكَلِبْ والثالث لانتاج لقاح الضرن .
هالة أبوعلم :ومشاهدينا سوف نتحدث الليله أيضا عن مصنع انتاج لقاح لانفلونزا الطيور الإستخدام البيطرى ونتحدث أيضا عن المعامل التابعة للشركة وقضايا أخرى شائكة سوف نفتح ملفتها ولكن نرحب فى البداية بضيفنا فى الإستديو الدكتور محمد ربيع رئيس الشركة القابضة للمستحضرات الحيوية واللقاحات بنرحب بحضرتك دكتورمحمد .
د/محمد ربيع : أهلا بك
محمد موافى : أهلا يا دكتور نبدأ نشوف تقرير ونرجع نناقش المسألة على طول .
د/محمد ربيع : إتفضل .
فاصل "تقرير"
الهيئة المصرية العامة للمستحضرات الحيوية واللقاحات هى أحدى الهيئات الرائدة فى مجال توفيرالأمصال واللقاحات انشئت عام 1973 وشهدت تطورا كبيرا حتى أصبحت صرحا علميا متكاملا .
"الدكتور/ مها سعد الدين رئيس قطاع البحوث والتطوير بالشركة:الشركة القابضة للمستحضرات الحيوية واللقاحات شركة رائدة فى انتاج الأمصال واللقاحات ليس على مستوى مصر فقط ولكن على مستوى الشرق الأوسط وأفريقيا وانشئت سنة 1939 كانت أول جهة لانتاج الأمصال واللقاحات بمصروالشرق الأوسط وكانت لانتاج لقاح الكوليرا وفى سنة 2003 صدر القرار الجمهورى بانشاء الشركة القابضة وتشتمل على ثلاث شركات الشركة المصريه لانتاج الأمصال واللقاحات والأدوية والشركة المصرية لخدمات نقل الدم والشركة المصرية لانتاج الأدوية اللقاحات البيطرية .
الدكتورعاطف بكساوى .. رئيس الشركة القابضة للأمصال البيطرية :الشركة البيطرية مسؤوله عن تدبير جميع إحتياجات اللقاحات المطلوبة للدولة فهى بتشارك فى عمل الأمن القومى لحماية الثروة الحيوانية داخل جمهورية مصر العربيه ان هى بتدبر اللقاحات المسؤله عن عملية تحسين الثروة الحيوانية لحماية الفرد ضد الأمراض المشتركة .. بتقول بتنفيذ متطلبات الهيئة العامة للخدمات البيطرية من جميع انواع التحصينات زى لقاحات انفلونزا الطيور وحمى الوادى المتصدع وخلافه . "
وتسعى الهيئة دوما لتطوير ذاتها من خلال توفيرالتمويل اللازم للأبحاث وتجهيزالمعامل بأحدث الأجهزة المتطورة إضافةً الى تدريب العاملين بها فى أرقى المراكزالعلمية .
فاصل
محمد موافى : دكتورأهلا بحضرتك مرة ثانية شوفنا التقرير نشاط ملحوظ وحتى باحثين شباب حاجة تفرح هل ممكن إختصار إسم الشركة للان هى الدرع اللى بيحاول يحمى مصر من أى وباء ؟
د/محمد ربيع : أكيد يا أستاذ محمد لان طبعا الشركة لها دور رائد فى القصة بتاعة حماية المواطنين من الأوبئة ومن الأمراض بكافة انواعها انا بس عايزأصلح معلومة قيلت هنا ان الشركة انشئت سنة 1973 ودا مش مظبوط هى الشركة الحقيقة انشئت أوبدأت نشاطها صحيح من كشركة انما مجزء من وزارة الصحة فى عام 1897 بحب أركزعلى النقطة ديه فبنتكلم على 113 سنة انهاردة . .
محمد موافى : انما شركة ذات صياغة قانونية لكلمة شركة فى التاريخ اللى إحنا قلناه .
د/محمد ربيع :آه 2002 بالظبط بناءاً على قرار من رئيس الجمهورية فالشركة طبعا حضرتك منفرده فى قصة المستحضرات الحيوية واللقاحات وبرضه عايز أضيف قبل ما أتكلم الى فاتسيرا ان هذه الصناعة على مستوى العالم تقلست تماما وأصبح اللى بيشتغل فى هذا المجال على مستوى العالم هم 44 شركة فقط وإحنا إحدى ال 44 شركه فديه حاجة لازم نعتز بها كمصريين ولازم نفتخر بها كبلد وكوطن ان إحنا عندنا هذه الصناعة فى بلاد كثيرة جدا من 202 دوله على مستوى العالم ما عندهاش خالص والكل بيعتمد على الإستيراد.
هالة أبوعلم : هل هى صناعة مكلفة مثلا عشان كده مش موجودة بانتشار واسع مثلا ؟
د/محمد ربيع : آه هى مكلفة جدا .
هالة أبوعلم : لكن الدول الثانية دول غنيه مثلا من ضمنها الدول الأوربية والولايات المتحدة .. دول غنيه إيه المشكلة عندهم .
د/محمد ربيع : لأ ..لأ ما انا بقول لحضرتك هى موجوده فى 44 دوله طبعا معظمها متمركزة فى أمريكا وفى أوروبا وناحية اليابان كده انما بقية العالم ماعندهمش زى ما سيادتك ذكرت هى صناعة صعبة جدا صناعة مكلفة جدا .
محمد موافى : بس مربحة جدا يا دكتور؟
د/محمد ربيع : لأ بالعكس .
محمد موافى : يعنى الهاجس الأخيربتاع انفلونزا الخنازير دا لما لقينا أرباح طائلة لشركات عالمية .
د/محمد ربيع : يعنى ديه حاجة ما نقدرش نقيس عليها قوى يا أستاذ محمد انما نقيس على الآداء العام للشركات يعنى الصناعة ديه بأقول لحضرتك هى مكلفة جدا وأرباحها ضعيفة جدا وبالتالى اللى كان شغَّال فيها يعنى مثلا سيادتك لما تفتح النت وتشوف سنة 1960 كان فيه كام شركة شغَّالين فى هذا المجال وانهاردة فيه كام شركه أقدر أقول لك ان هى تقلصت مثلا بنسبة 50% سى مثلا فى الستينيات كان فيه 100 شركه انهاردة بيكمل .
هالة أبوعلم : يعنى بيتساقطوا ؟
د/محمد ربيع : بالظبط على أساس ان هم بيلجأو حضرتك للأدويه العاديه – الأدويه الكيماوية العادية اللى هى طبعا بتكسب بشكل أفضل وبشكل أسرع يعنى .
هالة أبوعلم : بس حضرتك برضه ما وضحتش لنا الدور اللى بتقوم به لحماية مصر من الآوبئة اللى؟
د/محمد ربيع : هقول .. إحنا أولا كشركة قابضة زى ما حضر تفضلت وقلت فى 2002 كنا هيئة تبع وزارة الصحة أصبحنا شركة انفصلنا عن الوزارة وأصبحت شركة لها مجلس إدارتها ولها ذمتها المالية المنفصلة وكلام من دا على أساس ان دا كان إتجاه الدولة ان هى تبدأ تتخلص من مجموعة من الانشطة من ضمنها صناعة الأمصال واللقاحات وتبقى شركة قائمة بذاتها تقدر تخطط بشكل أفضل أو تقدر توفر المطلوب منها بشكل أفضل غير ما تكون طبعا مرتبطة بالوزارة أوبالدولة فإحنا دورنا الأساسى بيقوم على البحث العلمى – بيقوم على الانتاج المحلى وبنقوم على عملية التسويق فى الآخر فى الداخل وفى الخارج .
محمد موافى : طيب يا دكتور إحنا لوإتكلمنا أيه أهم الأمصال مثلا فى الفترة الأخيرة اللى انتجتها الشركة ؟
د/محمد ربيع : بص حضرتك قبل ما أقول على اللى انتجتها الشركة أقول ان فيه حاجة إسمها جدول التطعيمات الإجبارى ودا جدول بيبقى فيه مجموعة من التطعيمات اللقاحات اللى موجوده بنديها لأطفالنا حديثى الولاده لحاد سن المدارس .
محمد موافى : الثلاثى وشلل الأطفال والدرن؟
د/محمد ربيع : بالظبط .. آه تمام .
هالة أبوعلم : والحصبه ؟
د/محمد ربيع : آه والحصبه بالظبط .
محمد موافى : كل دا انتاج مصر ؟
د/محمد ربيع : لأ كل دا مش انتاج مصر يعنى برضه للأسف الانتاج المصرى لا يتعدى 25% من الإستهلاك المحلى والباقى الحقيقة مازلنا بنجيبه مستورد انما إحنا فى دورنا ان إحنا ان شاء الله نتوسع فى قصة الانتاج المحلى لان هو دا طبعا مستقبل الشركة على المدى القصير وعلى المدى البعيد .
هالة أبوعلم : حضرتك ذكرت أهم الأمصال أو اللقاحات اللى بيتم إستيرادها إيه اللى انتوا بتنتجوه بقى ؟
د/محمد ربيع : إحنا بننتج اللى هواللقاح الثلاثى والثلاثى دا بيتكون من اللى هو الديفتريا ومن التيتانوس من السعال الديكى بننتجه وبننتج جزئيا لقاح شلل الأطفال وكنا بننتج لقاح الدرن بس للأسف نتيجة التطوير أو إحنا كنا هنطور مصنع فوقفنا انتاجه ويتبقى بعد كده التهاب الكبد الوبائى B عشان انا بأتكلم دلوقت على جدول التطعيمات الإجبارى ويتبقى بعد كدا ال MMR اللى هو الحصبه والحصبة الألمانى والغده دول مستوردين .. أحنا لو بصينا لجدول الطلبات هنلاقى ان إحنا نوفر حوالى ثلثه تقريبا محلى الثلثين بنجيبهم مستوردين دا جوه الجدول أما خارج الجدول فى حاجات طبعا كتير.
محمد موافى :قبل منخش على خارج الجدول امتى الثلثين دول يبقى انتاج مصرى100% ؟
د/محمد ربيع : هأقول لحضرتك حاجة بص هو مشكلة مصر الأبحاث والتطوير – الأبحاث والتطوير فى مصر مازالت ضعيفة جدا جدا نتيجة طبعا عدم الإهتمام ونتيجة عدم توفير الموارد المالية اللازمة وعدم تدريب الكوادر البشرية فلو إحنا هناخدها وإحنا اللى هنبدأ نبحث فيها يعنى بص حضرتك أى دوا أو أى لقاح أو أى مصل دائما بيتكلموا على من 7 الى 14 سنة عشان تنتجه انما لو إحنا إستوردنا بقى التكنولوجيا ودا طبعا – وياريت ان انا أجيب التكنولوجيا من الخارج دا لا تتعدى القصة ديه أكثر من سنتين .
هالة أبوعلم : نعم يعنى بالنسبة مثلا لمرض انفلونزا الطيور وانفلونزا الخنازير هل هناك دور بتقول به الشركة حاليا لإخراج أبحاث جديدة تتنال هذين المرضين مثلا أو مثلا هى توصلت بالفعل لبعض اللقاحات أو أمصال خاصه بها ؟
د/محمد ربيع : طيب انا هأتكلم عن الانفلونزا أولا الموسمية حضرتك إحنا لا ننتج الانفلونزا الموسمية لسبب فى الحقيقه ان هى إستهلاكها فى مصر ضعيف جدا جدا جدا فمن الناحية الإقتصاديه هى غير إقتصادية ان إحنا ننتج انفلونزا موسمية انما إحنا رغم ذلك يعنى بعد الفترة السابقى قررنا فعلا ان إحنا ننتج الانفلونزا الموسمية وهنحاول نوجد أسواق خارجية بخلاف السوق المصرى .. انفلونزا الخنازير طبعا لما جت يمكن هى ديه اللى أضافت أهمية وجود لقاح للانفلونزا – انفلونزا الطيور طبعا الحمد الله هى ما إتنقلتش من انسان لانسان وبالتالى ما فيش لقاح لانفلونزا الطيور ببنى آدمين انما فيه لقاح انفلونزا الطيور للطيور نفسها وديه تبع الشركة البيطرية عندنا فإحنا ان شاء الله فى مشروع حاليا دلوقت فى الخطة الإستيراتيجية للشركة ان فى خلال ان شاء الله سنتين إعتبارا من شهر 7 اللى جاى هنبدأ ننشئ المصنع اللى هيبقى خاص لانتاج اللقاح لانفلونزا الطيور للإستخدام البيطرى حضرتك .
هالة أبوعلم : خضرتك كمان أشرت لحاجة مهمة جدا مرض الكبد الوبائى B .
د/محمد ربيع : التهاب الكبد الوبائى B آه .
هالة أبوعلم : فى الحقيقة ان دلوقت إحنا كنا متصورين ان الإلتهاب الكبدى الوبائى C هو أخطر من B ولكن فى التفرة الأخيرة قالوا ان B وA بقوا أخطر حتى من C وبالتالى لما حضرتك قلت ان انتوا بتنتجوا لقاح لهذا المرض دا حاجة مهمة جدا .
د/محمد ربيع : آه ؤإحنا بنستورده يا أستاذة هالة – بنستورد لقاح إلتهاب الكبد الوبائى B عشان بقول لحضرتك دا جزء من الجدول للتطعيمات فلازم نوفره للأطفاف .
محمد موافى : بيصيب الأطفال أكثر ؟
د/محمد ربيع : بيصيب الأطفال آه .
هالة أبوعلم : طيب هودلوقت تقدرو تقولوا ان لما أكتشفنا ان B أخطر من C لانه بيصيب أو بيعمل تليف فى الكبد .
د/محمد ربيع : كلهم حضرتك بالظبط .
هالة أبوعلم : طيب ليه بيقولوا ان هو ؟
د/محمد ربيع : عشان حضرتك الCإحنا مش عايزين نتكلم طبى قوى انما هأقول لحضرتك معلومه صغيره الCبيعتبروه فيرس خامل يعنى غير نشط فالانسان بيتعايش به حضرتك عشان كده هو خطورته أقل من B انما Bشرس بييجى يعتبر فيرس شرس .
هالة أبوعلم : أيوه يعنى ممكن ينهى على حياة الانسان فى خلال فترة صغيرة مثلا ؟
د/محمد ربيع : لأ مش فتره صغيره لأ طبعا مش فتره صغيره بس بيقدر يحصن من صحة الانسان يعنى كويس.
محمد موافى :وإحنا منستورده 100% ؟
د/محمد ربيع : آه بنستورد للأسف 100% .
هالة أبوعلم : طيب هل حضرتك بتنصح ان إحنا نبتدى – ما حدش الحقيقة بيتحصن ضده ؟
د/محمد ربيع : لأ إزَّاى اللى هو فى جدول التصعيمات الإجبارية من سنة حاجة و90 حضرتك .
هالة أبوعلم : إجبارية بالنسبة للأطفال .
محمد موافى : كل الأطفال أخذوه .
هالة أبوعلم : الأطفال ودا بيستمر ولا بيحتاج جرعة تنشيطية ؟
د/محمد ربيع :لأ خلاص هو بيأخذ ال 3 جرعات بتاعته وخلاص بيحتاجش تانى خلاص انما فيه أجيال طبعا ما إتطعمتش .
محمد موافى : نقف عند الأجيال اللى ما إتطعمتش وناخد فاصل ونرجع تانى نشوف الأجيال ديه .. فاصل مشاهدينا ونرجع تانى حوارنا مع الدكتور محمد ربيع أرجوكم أبقوا معنا .
فاصل
هالة أبوعلم : مرة أخرى نرحب بالدكتور محمد ربيع رئيس الشركة القابضة للأمصال واللقاحات – دكتورمحمد وزيرالصحة الدكتورحاتم الجبلى أكد ان الشركة القابضة للأمصال واللقاحات مرت فى فترة من الفترات بأوقات عصيبة هذه الفترة تطلب إعادة هيكلة الشركة والتصدى للممارسات غيرالمسؤلة فيها حضرتك وضح لنا هذا الأمر لانه مش واضح ؟
د/محمد ربيع : انا توليت مسؤلية هذه الشركة فى منتصف عام 2006 قبل هذا التاريخ الشركة مرت بفترة كانت عصيبة جدا من حيث الناحيه الإدارية بمعنى ان كان فيه إتجاه فى الشركة لتعظيم مثلا إستيراد المستحضرات الحيوية واللقاحات على حساب الانتاج المحلى وبالتالى فيه بعض المسطلحات الحيوية اللى كانت بتنتج وقف انتاجها يعنى لأسباب التطوير ماشى انما فى نفس الوقت كان فيه توسع فى الإستيراد وبالتالى الشركة الحقيقة تعثرت ماليا بسبب قصة الإستيراد للمسطلحات الحيوية .
محمد موافى : وكان لازم إعادة الهيكله .
د/محمد ربيع : آه كان لازم إعادة هيكلة الشركة .
محمد موافى : دلوقت الوضع المادى إيه يا دكتور ؟
د/محمد ربيع : والله الوضع المادى إتحسن نسبيا لان برضه عشان أكون صادق الشركة مازالت بتعانى قلة فى السيولة المالية ومازال ليها ديون متراكمه وفى نفس الوقت زى ما قلت فى الأول للأستاذه هالة هامش ربح عندنا ضعيف جدا .
محمد موافى : ديون لمين للجهات اللى بتستورد منها ؟
د/محمد ربيع : ديون للبنوك وللضرائب ولبعض الموردين اللى بنستورد منهم .
هالة أبوعلم : يعنى معنى كده ان انتوا ممكن تكونوا بتلاقوا بعض العقبات أو التحديات بالنسبة لإيجاد التكلفة الماديه المناسبة للان انتوا تقوموا بالأبحاث وان انتوا تنتجوا أيضا الأمصار واللقاحات اللى مصر بتبقى محتاجاها .
د/محمد ربيع : آه دا جزء من القضية لان إحنا ما عندناش زى ما قلت سيولة مالية كافية ان إحنا طبعا نعمل أبحاث زى الشركات العالمية انما إحنا بنحاول حضرتك بنلجأ للجهات المانحة اللى هى بتدى منح مالية للجهات البحثية والحمد لله نجحنا بحد كبير برضه ان إحنا نحصل على مبلغ كويس قوى للأبحاث بتاعتنا .
محمد موافى : بس يا دكتورفيه كلام إحنا على طول بنسمع ان مصر مليانه باحثين وعلماء والمركز القومى للبحوث موجود على مقربة من بكسيرة يعنى المسألة .. حضرتك دلوقت بتفاجئنى ان ما عندناش باحثين .
د/محمد ربيع :لأ مش ما عندناش باحثين عندنا باحثين وعندنا أبحاث بس يعنى لو قارناها بالدول العالمية كعدد باحثين وكقدرة ماليه أو اللى بيتصرف على الأبحاث طبعا إحنا يا جماعة بعاد كل البعد عن المعدل العالمى.
هالة أبوعلم : طيب إحنا ليه دائما بنتأخر فى انتاج بعض الأمصال أو اللقاحات مثلا الخاصة بمرض الانفلونزا الموسمية يعنى إحنا متأخرين فى الموضوع دا رغم ان هو قديم ؟
د/محمد ربيع : آه هو قديم من سنة 76 فعلا انما إحنا ما انتجناهوش لان كان إستهلاكنا لحاد السنة اللى فاتت قبل القصة بتاعة انفلونزا الخنازير حوالى 400 ألف جرعة فى السنة او 500 ألف جرعة فى السنة يعنى ال80 مليون شخص بيستهلكوا 400 ألف اولى 500 ألف جرعة فى السنة .
هالة أبوعلم : طيب ما فيش جدوى إقتصاديه ؟
د/محمد ربيع : ما فيش جدوى إقتصاديه فكنا بنستورده من الخارج .
هالة أبو علم : دلوقت فكركوا نتجه للتسويق يعنى انتاجه إستهلاكه محليا وبعدين الإتجاه الى التسويق ؟
د/محمد ربيع : وهنصدر ان شاء الله بإذن الله .
محمد موافى : يا دكتور طالما حضرتك هتنتج إحنا عايزين نطمن الناس – يعنى الناس 400 ألف من 80 مليون فيه ناس خايفة هل له الأعراض جانبية هى المسألة إيه؟
د/محمد ربيع :لأ هقول لحضرتك انا بأتكلم يا أستاذ موافى على ال400 الف أو ال500 ألف انا بأتكلم على لقاح انفلونزا الموسمية العاديه ما ليش دعوا بالخنازير خالص .
محمد موافى : لأ انا بتكلم على الموسمية برضه هل لها أى أعراض جانبية ؟
د/محمد ربيع : لأ خالص انا عايز ءاكد لحضرتكم وللساده المشاهدين ان لقاح الانفلونزا الموسمية آمن وبيستخدم على مستوى العالم من سنة 76 والدول المتقدمة حضرتك بتوصل نسبة التطعيم فيها لهذا اللقاح الى حوالى 25% من تعداد السكان يبقى انت بتتكلم على مصر عايز 20 مليون جرحة لو إحنا زى لدول الأخرى انما إحنا للأسف عشان ما فيش وعى عند الناس وما فيش إقبال فبالتالى طبعا الإستهلاك بتاعه قليل .
محمد موافى : طيب وأمصال الأمراض المستوطنة؟
د/محمد ربيع : بمعنى إيه حضرتك الإتهاب الكبدى مثلا عشان هو دا المتوطن فى مصر مثلا ولا انفلونزا ال
هالة أبوعلم : البلهارسيا مثلا هل ليها.. ؟
د/محمد ربيع :البلهارسيا مالهاش تطعيم انما ليهاعلاج .
هالة : الحميات مالهاش برضه تطعيم ؟
د/محمد ربيع : بعنى إيه برضه المحميات حضرتك ؟
هالة أبوعلم : يعنى الحمة الشوكية مثلا ؟
د/محمد ربيع : لأ الحمة الشوكية لها تطعيم .
هالة أبوعلم : لها تطعيم ؟
د/محمد ربيع : آه طبعا .
هالة أبوعلم : وبرضه لأطفال مش للكبار ؟
د/محمد ربيع : آه طبعا للأطفال ولسن المدارس .
محمد موافى : دا بننتجه ولا بنستورده ؟
د/محمد ربيع : دا بينتح برضه نصف انتاج .. يعنى إيه نصف انتاج عشان برضه أوضح للساده المشاهدين الانتاج حضرتك بيبدأ من الفيرس أو من البكتريا نفسها ويعنى بنعمل عملية التخمر ونبدا ننتج الماده نفسها من البكتريا أو من الفيرس دا بعتبروه من الألف للياء فإحنا عندنا مسطلحات بننتجها من الأف للياء من الفيرس والبكتريا أما فيه مسطلحات ثانيه حضرتك بنجيبها مستورده من بره نصف تصنيع وإحنا بنكمل تصنيعها زى الألتهاب السحائى اللى هو ( الألف والجيم ) ال Cو Eاللى هو الحمة الشوكية وزى البوليو اللى هو شلل الأطفال بنجيبه نصف مصنع وفيه بعض برضه مسطلحات الثانيه بنجيبها نصف مصنع
هالة أبوعلم : طيب بالنسبة لمرض السكر وانتاج الانسولين لمرضى السكر أعتقد ان انتوا دخلتوا المجال دا ؟
د/محمد ربيع : آه بالظبط مؤخرا حضرتك.
محمد موافى : مصنع ؟
د/محمد ربيع : آه عندنا مصنع لانتاج الانسولين بنستورد برضه الكرستال من بره يعنى يعتبر برضه نصف مصنع يعنى بنجيب الكرستال الماده الخام بنجيبها من بره مش إحنا اللى بنعمل الماده الخام ودا الفرق الكبير فهانجيب الماده الخام من بره حضرتك وبعدين بنصنع .
محمد موافى : ودا برضه بيوفر كتيريا دكتور .
د/محمد ربيع : آه طبعا أكيد .. لأ انا عايز أقول حاجة يعنى هى كل مصر حضرتك شغَّاله على ان المواد الخام بتيجى من بره يمكن فاكثروا من الشركات القليلة جدا فى مصر ويمكن تكون الوحيدة فى مصر اللى بتبدأ من أول الفيرس واخد بال حضرتك .
هالة أبوعلم : طيب بالنسبة للانفلونزا الموسمية أعتقد ان الفيرس بتاعها بيتغيرمن سنة لسنة فالمسألة فعلا مكلفه زى ما حضرتك بتقول عشان كده انتوا بتدخلوا المجال دا متأخر .
د/محمد ربيع : لأ حضرتك هى مالهاش علاقه بدخولنا فى المجال حضرتك هو طبعا تغيير الفيرس وتحوره حضرتك – هو فيه منظمة الصحة العالمية لو سيادتك طبعا بتسمعى عليها هى المسؤلة عن ان هى تدى لحضرتك كل سنة تركيبة الفيرس لان هى بيحصل إيه ان هى بتأخذ من مصر وبتأخذ من باكستان وبتأخذ من الهند وبتأخذ من كل حتة إحنا بنعزل هذا الفيرس وبنبعته لمنظمة الصحة العالمية هى بتشوف التركيبة الجينية بتاعتة وبتشوف إيه اللى سائد دلوقت وبتبدأ تدى الشركات المصنعة هذه التركيبة الجينية ويبدأوا هم يصنعوا على أساس التركيبه الجديدة بتاعة هذا .
محمد موافى :الأبحاث والتصنيع يا دكتوركان فيه أخبار وعملنا لقاءات ان علماء من المركز القومى للبحوث انتجوا مصل لانفلونزا الطيور ولم يتم انتاجه .
هالة أبوعلم : بس كفاءته 20% فقط ؟
د/محمد ربيع : لأ بص حضرتك هو اللى حصل بالظبط ان هو المركزالقومى للبحوث قال ان هو توصل لانتاج لقاح لانفلونزا الطيورللإستخدام البيطرى وكان عايزشركة زى فاكسيرا تنتجه على المستوى الصناعى بقه – المستوى التجارى – يعنى هو مثلا انتج 100 جرعة هو عايزحد ينتج 400 مليون جرعة كويس فبنعمل حاجة إسمها إسكيلنج أب فاللى حصل بالظبط إحنا عملنا معاه فعلا إتفاقية ان إحنا نأخذ هذا اللقاح اللى هو حضره وهنختبره فى حته محايده لا عندنا فى فاكسيرا ولا عنده فى المركز القومى للبحوث وكان الإتجاة ان إحنا نحلله فى وزارة الزراعة وتم فعلا تحليله فى وزارة الزراعة وبعد كده قِيل يعنى انا ما جاليش ورق رسمى عشان أكون صادق أمام السادة المشاهدين ان انا جالى ورق بالنتتيجة انما انا سمعت النتيجة لا تتعدى كده ال20% .
محمد موافى : بس إحنا كده فى جزر منعزلة يا دكتور يعنى العلماء فى جانب وناس تطبيقيين فى جانب ؟
د/محمد ربيع : لأ حضرتك لأ..لأ بس هو دا الطبيعى انك انت أى دواء فى الدنيا بيخش مرحلة بحثية لحاد ما بينتج على المستوى المعملى بيسموه البايوسكيل أو اللاب سكيل وبعد كدا بأخذوه يكبروه على المستوى الصناعى .
هالة أبوعلم : يعنى دلوقت د. محمد العلاقه بينكم وبين المركز القومى للبحوث هذه العلاقة هل هى علاقة تنافسية ولا علاقة شراكة تعاون ؟
د/محمد ربيع : لأ هى تكميلية حضرتك ما فيش أى تنافس بيننا وبين المركزالقومى للبحوث إطلاقا بالعكس إحنا عندنا كذا مشر وع منشأين معاه انما انا بأتكلم على القصة بتاعة انفلونزا الطيور دا كنا إحنا هنكمل الشغل بتاعه حضرتك بس لما لقينا طبعا اللقاح مش جايب النتيجة المرجوة.
هالة أبوعلم : طيب بالنسبة للأدوية الشركة بتستورد بعض اللقاحات والأمصال وبتستكمل عليها أو بتستوردها وتوزعها او بتنتجها فى الفترة الأخيرة طيب بالنسبة للأدوية هل بتقول بانتاج أدويه بتصنيع أدوية؟
د/محمد ربيع : عندنا بعض الأدوية البيوتكنولوجية عشان برضه انا عايزأركزعلى الحتة ديه يعنى إحنا ما عندناش الأدويه العاديه زى الأسبرين ودوا الضغط ودوا السكر طبعا بخلاف الانسولين انا بتكلم على الأدويه اللى هو مثلا الأقراص إحنا عندنا أدويه بيوتكنولوجيه يعنى إيه مثلا زى الانسولين ده بيعتبر دواء بيتكنولوجى مش كيماوى عندنا حاجة إسمها اللى هو جروب هرمون اللى هو هرمونات النمو دية برضه يعنى عندنا مجموعة مسطلحات البيوتكنولوجية اللى هى أصلها بيولوجى واخد بال حضرتك وليس أصلها كيماوى .
محمد موافى :دكتور وفيه نشاط الدم دا نشاط منفصل ؟
د/محمد ربيع : آه بالظبط كده .
محمد موافى : طيب حضرتك ندى فكرة للناس .
د/محمد ربيع : أحنا عندنا 3 شركات كان المفروض نقول الكلام ده فى الأول عندنا 3 شركات شركة متخصصة فى انتاج أمصال ولقاحات وأدوية بيتكنولوجيه للإستخدام الآدمى ديه شركة نفس الشركة ديه للإستخدام البيطرى اللى هى الشركة البيطرية والشركة والثالثة الحقيقة برضه مجال متفرد جدا اللى هو الدم ومشتقاته ديه برضه الشركة الوحيدة فى مصر وبرضة فى المنطقة العربية
محمد موافى :لما حد بيتزنق بيروح فاكسيرا على طول ؟
د/محمد ربيع :بالظبط .. إحنا عندنا طبعا بنك دم وعندنا وحده علاجيه بتعالج جميع الأمراض اللى هى ليها علاقه بالدم زى السالسينيا وموفيليا وما الى ذلك فإحنا برضه متفردين وعندنا مصنع لانتاج مشتقات الدم حضرتك اللى هو زى الألبومين وزى الجماجلوبلن وزى فاكتور إيت وفاكتور نين والحاجاد ديه كلها إحنا برضه نعتبر متفردين .
هالة أبوعلم : طيب إيه المشروعات المستقبلية اللى الشركة بتنوى ان هى تنفذها فى المستقبل ؟
د/محمد ربيع : هأقول لحضرتك الشركة الأولانية اللى هى شركة الأمصال واللقاحات عندنا حضرتك 5 مشاريع عندنا مشروع لانتاج لقاح انفلونزا الموسمية ودا بدانا فيه فعلا فى 6 اكتوبر عندنا مشروع حضرتك لتطوير مصنع الأمصال – الأمصال لما أقول مصل يا جماعة اللى هو مصل ضد العقرب وضد والثعبان وضد الديفتريا وضد التيتانوس فده المصنع الثانى منطوره دا موجود حاليا بس هنطور مصنع جديد مكانه فى 6 اكتوبر وعندنا مصنع لانتاج ان شاء الله لقاح الكلب اللى هو شان لما حد يعضه كلب لاقدر الله أو أى حاجة ثانيه وعندنا
محمد موافى : دا قديم قوى دا – دا من زمان .
د/محمد ربيع : لأ دا كان موجود حضرتك بس بنستورد حاليا – كان موجود زمان خالص بس طبعا كان نظام مختلف كان حقن فى البطن 21 حقنه وبتاع .
محمد موافى : كان الواحد بيعيش فى رعب .
هالة : لكن دلوقت بقى إيه ؟
د/محمد ربيع : دلوقت خمسه حضرتك .
هالة أبوعلم : فى البطن برضه ؟
د/محمد ربيع : لأ بتتاخد فى الذراع .
محمد موافى : يعنى نتعض عادى يا دكتور ما نخافش نتعض ما نقلقش يعنى هههه ؟
د/محمد ربيع : لأ ان شاء الله بربنا يسترمفيش عض بإذن الله .
هالة أبو لم : ودا موجود يادكتور عندكوا بس ولا موجود فى الصيدليات والمستشفيات ؟
د/محمد ربيع :لأ موجود عندنا إحنا والمستشفيات اللى هى زى مثلا مستشفى المنيرة فيه بعض المستشفيات بتخلى عندها هذا اللقاح بس مش كل المستشفيات طبعا انما إحنا عندنا طبعا متواجدين وبالتالى وإحنا طبعا شغالين ال24 ساعة .
محمد موافى : لو مسكنا مصنع مصنع وصلنا لحد إيه ؟
د/محمد ربيع : لأ إحنا لسه حضرتك فى البداية عشان أكون صادق مع حضرتك إحنا لسه فى البدايه يعنى مصنع الانفلونزا يادوب بدانا نحفرالأرض فى أول إبريل فإحنا ماشيين دلوقت فى عملية الحفر وهيأخذ سنتين ان شاء الله مصنع الأمصال ومصنع اللقاح الكلب
محمد موافى : سنتين عشان يبقى مصنع قائم ؟
د/محمد ربيع : آه يطلع الانتاج بتاعه وينزل السوق ان شاء الله ونصدر منه بإذن الله ليها سنتين ان شاء الله ,الشركة الثانية بقى عشان حضرتك سألتينى على المشاريع الشركة الثانيه اللى هى شركة قناة نقل الدم اللى هى متخصصة فى انتاج الدم ومشتقاته عندنا ليها برضه حوالى مشروعين كبارقوى مشروع انتاج سرنجات آمنه ومشروع انتاج المحاليل العلاجيه حضرتك وعندنا المشروع الثالث مهم جدا اللى هو مشتقات الدم بس برضه على المستوى العالمى انهاردة .
هالة أبوعلم : اللى هى مثلا زى البلازما ؟
د/محمد ربيع : آه زى القلب من حضرتك يعنى ناخد البلازما فعلا وخدا بال حضرتك ونعمل لها حاجة إسمها تكسير فراكشن إيشن ونأخذ من هذه البلازما بقه مشتقات كتيرة قوى ناخد منه القلب ..ز. وهكذا فده مشروع قومى برضه مهم جدا ان إحنا فى مصر يبقى عندنا كان موجود والحقيقة إتقفل نتيجة برضه التطوير فدول ال 3 مشاريع المهمين قوى لشركة خدمات نقل الدم .
هالة أبوعلم : دلوقت مسألة نقل الدم .
د/محمد ربيع : البيطرية ناقص مشروع معلهش ناقص مشروعين مشروع انتاج لقاح انفلونزا الطيور والإستخدام البيطرى وانتاج لقاح حمى الوادى المتصدع ولقاح الحمى القلاعية .
هالة أبوعلم : لأ دا انتوا قدامكوا خطه إستيراتيجية كبيرة جدا فمحتاجة مجهود بس طبعا ان شاء الله ربنا يوفقوا .
د/محمد ربيع : آه هى ديه بالظبط .. ان شاء الله .. يعنى هو حضرتك الانتاج المحلى يعنى انا مؤمن بصراحة مصرلومش هيبقى فيها انتاج محلى يبقى كلام مش صحيح .
هالة أبوعلم : طبعا .. طبعا .. انا عايزه من حضرتك نصيحتين للساده المشاهدين الأولى خاصة بمسألة نقل الدم إزَّاى يتأكدوا المسألة ديه بتخوف جدا مسألة ان شخص يُنقل إليه دم مش آمن فانا عايزه نصيحة من حضرتك النصيحة الثانية إمتى إذا كانوا يقبلوا على انهم يتم تلقيحهم بمصل الانفلونزا الموسمية إذا كنت حضرتك بتنصحهم بهذه المسألة ولا لأ وإمتى شهر إيه ؟
د/محمد ربيع : هأبدا من الانفلونزا الموسمية لان طبعا الحمد لله هو السنة اللى فاتت بدأ الوعى عند الشعب بصفة عامة ان الانفلونزا دا برضه مرض ويجب بر ضه ان إحنا نقى نفسنا منه فانا بانصح كل الناس إلا طبعا الناس اللى منكن يبقى لها ظروفها الصحية لا تسمح ودا طبعا قليلة جدا يبدأو يأخذوا تطعين اللى هو الانفلونزا الموسمية فى نهاية شهر سبتمبر بداية شهر أكتوبرلحاد نقول ديسمبر يبقى عندنا 3 أشهر اكتوبر نوفمبر ديسمبر بنتطعم فيهم ضد الانفلونزا الموسمية فيه انهاردة دكاتره كتير قوى بدأت تعترف ان هذا التطعيم مفيد جدا وفى حالات كتيره يعنى .
محمد موافى : نقل الدم ؟
د/محمد ربيع : نقل الدم طبعا بنصح ان حد لو لاقدر الله هيتنقل له دم طبعا يتنقل له دم فى مكان معتمد ومش فى عياده عاديه او فى مستشفى عاديه لأ لازم يكون فعلا فى حته ليها سمعه جيده فى نقل الدم لان طبعا حضرتك عارفه نقل الدم بيستلزم ان إحنا بنجرى إختبارات دقيقة جدا ومتخصصة جدا عشان نتأكد ان الدام فعلا خالى من أى .. وآمن فعلا للإستخدام الآدمى .
محمد موافى :دكتور محمد ربيه رئيس الشركة القابضة للأمصال الحيوية واللقاحات شكرا – وشكرا على هذا المجهود ولحاد ما نشوف المشاريع القائمة نشكر حضرتك شكر جزيل
د/محمد ربيع : شكرا .. ان شاء الله
محمد موافى : شكرا يا هالة .
هالة أبوعلم : شكرا محمد ونشكر أيضا مشاهدينا الكرام انتهت حلقتنا انهاردة من يحدث فى مصر وحتى نلقاكم فى حلقات أخرى لكم منا كل التحية .
محمد موافى : دمت فى رعاية الله